EeseDharmaSanātana Library
9काण्ड 4 · सूक्त 9
Atharvaveda Śaunaka Kand 4, Sukta 9.
10 shlokएहि॑ जी॒वं त्राय॑माणं॒ पर्व॑तस्या॒स्यक्ष्य॑म्।
विश्वे॑भिर्दे॒वैर्द॒त्तं प॑रि॒धिर्जीव॑नाय॒ कम् ॥१॥
ehi॑ jī॒vaṃ trāya॑māṇaṃ॒ parva॑tasyā॒syakṣya॑m | viśve॑bhirde॒vairda॒ttaṃ pa॑ri॒dhirjīva॑nāya॒ kam || १ ||
प॒रि॒पाणं॒ पुरु॑षाणां परि॒पाणं॒ गवा॑मसि ।
अश्वा॑ना॒मर्व॑तां परि॒पाणा॑य तस्थिषे ॥२॥
pa॒ri॒pāṇaṃ॒ puru॑ṣāṇāṃ pari॒pāṇaṃ॒ gavā॑masi | aśvā॑nā॒marva॑tāṃ pari॒pāṇā॑ya tasthiṣe || २ ||
उ॒तासि॑ परि॒पाणं॑ यातु॒जम्भ॑नमाञ्जन ।
उ॒तामृत॑स्य॒ त्वं वे॒त्थाथो॑ असि जीव॒भोज॑न॒मथो॑ हरितभेष॒जम् ॥३॥
u॒tāsi॑ pari॒pāṇaṃ॑ yātu॒jambha॑namāñjana | u॒tāmṛta॑sya॒ tvaṃ ve॒tthātho॑ asi jīva॒bhoja॑na॒matho॑ haritabheṣa॒jam || ३ ||
यस्या॑ञ्जन प्र॒सर्प॒स्यङ्ग॑मङ्गं॒ परु॑ष्परुः ।
ततो॒ यक्ष्मं॒ वि बा॑धस उ॒ग्रो मध्यम॒शीरि॑व ॥४॥
yasyā॑ñjana pra॒sarpa॒syaṅga॑maṅgaṃ॒ paru॑ṣparuḥ | tato॒ yakṣmaṃ॒ vi bā॑dhasa u॒gro madhyama॒śīri॑va || ४ ||
नैनं॒ प्राप्नो॑ति श॒पथो॒ न कृ॒त्या नाभि॒शोच॑नम्।
नैनं॒ विष्क॑न्धमश्नुते॒ यस्त्वा॒ बिभ॑र्त्याञ्जन ॥५॥
nainaṃ॒ prāpno॑ti śa॒patho॒ na kṛ॒tyā nābhi॒śoca॑nam | nainaṃ॒ viṣka॑ndhamaśnute॒ yastvā॒ bibha॑rtyāñjana || ५ ||
अ॒स॒न्म॒न्त्रा॑द् दु॒ष्वप्न्याद् दुष्कृ॒ताच्छम॑लादु॒त।
दु॒र्हार्द॒श्चक्षु॑षो घो॒रात् तस्मा॑न्नः पाह्याञ्जन ॥६॥
a॒sa॒nma॒ntrā॑d du॒ṣvapnyād duṣkṛ॒tācchama॑lādu॒ta | du॒rhārda॒ścakṣu॑ṣo gho॒rāt tasmā॑nnaḥ pāhyāñjana || ६ ||
इ॒दं वि॒द्वाना॑ञ्जन स॒त्यं व॑क्ष्यामि॒ नानृ॑तम्।
स॒नेय॒मश्वं॒ गाम॒हमा॒त्मानं॒ तव॒ पूरुष ॥७॥
i॒daṃ vi॒dvānā॑ñjana sa॒tyaṃ va॑kṣyāmi॒ nānṛ॑tam | sa॒neya॒maśvaṃ॒ gāma॒hamā॒tmānaṃ॒ tava॒ pūruṣa || ७ ||
त्रयो॑ दा॒सा आञ्ज॑नस्य त॒क्मा ब॒लास॒ आदहिः॑ ।
वर्षि॑ष्ठः॒ पर्व॑तानां त्रिक॒कुन्नाम॑ ते पि॒ता ॥८॥
trayo॑ dā॒sā āñja॑nasya ta॒kmā ba॒lāsa॒ ādahiḥ॑ | varṣi॑ṣṭhaḥ॒ parva॑tānāṃ trika॒kunnāma॑ te pi॒tā || ८ ||
यदाञ्ज॑नं त्रैककु॒दं जा॒तं हि॒मव॑त॒स्परि॑ ।
या॒तूंश्च॒ सर्वा॑ञ्ज॒म्भय॒त् सर्वा॑श्च यातुधा॒न्यः ॥९॥
yadāñja॑naṃ traikaku॒daṃ jā॒taṃ hi॒mava॑ta॒spari॑ | yā॒tūṃśca॒ sarvā॑ñja॒mbhaya॒t sarvā॑śca yātudhā॒nyaḥ || ९ ||
यदि॒ वासि॑ त्रैककु॒दं यदि॑ यामु॒नमु॒च्यसे॑ ।
उ॒भे ते॑ भ॒द्रे॑ नाम्नी॒ ताभ्यां॒ नः पाह्याञ्जन ॥१०॥
yadi॒ vāsi॑ traikaku॒daṃ yadi॑ yāmu॒namu॒cyase॑ | u॒bhe te॑ bha॒dre॑ nāmnī॒ tābhyāṃ॒ naḥ pāhyāñjana || १० ||