EeseDharmaSanātana Library
7काण्ड 4 · सूक्त 7
Atharvaveda Śaunaka Kand 4, Sukta 7.
7 shlokवारि॒दं वा॑रयातै वर॒णाव॑त्या॒मधि॑ ।
तत्रा॒मृत॒स्यासि॑क्त॒ तेना॑ ते वारये वि॒षम् ॥१॥
vāri॒daṃ vā॑rayātai vara॒ṇāva॑tyā॒madhi॑ | tatrā॒mṛta॒syāsi॑kta॒ tenā॑ te vāraye vi॒ṣam || १ ||
अ॒र॒सं प्रा॒च्यंऽवि॒षम॑र॒सं यदु॑दी॒च्यऽम्।
अथे॒दम॑धरा॒च्यं॑ कर॒म्भेण॒ वि क॑ल्पते ॥२॥
a॒ra॒saṃ prā॒cyaṃ’vi॒ṣama॑ra॒saṃ yadu॑dī॒cya’m | athe॒dama॑dharā॒cyaṃ॑ kara॒mbheṇa॒ vi ka॑lpate || २ ||
क॒र॒म्भं कृ॒त्वा ति॒र्यंऽपीबस्पा॒कमु॑दार॒थिम्।
क्षु॒धा किल॑ त्वा दुष्टनो जक्षि॒वान्त्स न रू॑रुपः ॥३॥
ka॒ra॒mbhaṃ kṛ॒tvā ti॒ryaṃ’pībaspā॒kamu॑dāra॒thim | kṣu॒dhā kila॑ tvā duṣṭano jakṣi॒vāntsa na rū॑rupaḥ || ३ ||
वि ते॒ मदं॑ मदावति श॒रमि॑व पातयामसि ।
प्र त्वा॑ च॒रुमि॑व॒ येष॑न्तं॒ वच॑सा स्थापयामसि ॥४॥
vi te॒ madaṃ॑ madāvati śa॒rami॑va pātayāmasi | pra tvā॑ ca॒rumi॑va॒ yeṣa॑ntaṃ॒ vaca॑sā sthāpayāmasi || ४ ||
परि॒ ग्राम॑मि॒वाचि॑तं॒ वच॑सा स्थापयामसि ।
तिष्ठा॑ वृ॒क्ष इ॑व॒ स्थाम्न्यभ्रि॑खाते॒ न रू॑रुपः ॥५॥
pari॒ grāma॑mi॒vāci॑taṃ॒ vaca॑sā sthāpayāmasi | tiṣṭhā॑ vṛ॒kṣa i॑va॒ sthāmnyabhri॑khāte॒ na rū॑rupaḥ || ५ ||
प॒वस्तै॑स्त्वा॒ पर्य॑क्रीणन् दू॒र्शेभि॑र॒जिनै॑रु॒त।
प्र॒क्रीर॑सि॒ त्वमो॑ष॒धेऽभ्रि॑खाते॒ न रू॑रुपः ॥६॥
pa॒vastai॑stvā॒ parya॑krīṇan dū॒rśebhi॑ra॒jinai॑ru॒ta | pra॒krīra॑si॒ tvamo॑ṣa॒dhe’bhri॑khāte॒ na rū॑rupaḥ || ६ ||
अना॑प्ता॒ ये वः॑ प्रथ॒मा यानि॒ कर्मा॑णि चक्रि॒रे॑।
वी॒रान्नो॒ अत्र॒ मा द॑भ॒न् तद् व॑ ए॒तत्पु॒रो द॑धे ॥७॥
anā॑ptā॒ ye vaḥ॑ pratha॒mā yāni॒ karmā॑ṇi cakri॒re॑ | vī॒rānno॒ atra॒ mā da॑bha॒n tad va॑ e॒tatpu॒ro da॑dhe || ७ ||