EeseDharmaSanātana Library
6काण्ड 4 · सूक्त 6
Atharvaveda Śaunaka Kand 4, Sukta 6.
8 shlokब्रा॒ह्म॒णो ज॑ज्ञे प्रथ॒मो दश॑शीर्षो॒ दशा॑स्यः ।
स सोमं॑ प्रथ॒मः प॑पौ॒ स चकारार॒सं वि॒षम् ॥१॥
brā॒hma॒ṇo ja॑jñe pratha॒mo daśa॑śīrṣo॒ daśā॑syaḥ | sa somaṃ॑ pratha॒maḥ pa॑pau॒ sa cakārāra॒saṃ vi॒ṣam || १ ||
याव॑ती॒ द्यावा॑पृथि॒वी व॑रि॒म्णा यावत् स॒प्त सिन्ध॑वो वितष्ठि॒रे।
वाचं॑ वि॒षस्य॒ दूष॑णीं॒ तामि॒तो निर॑वादिषम् ॥२॥
yāva॑tī॒ dyāvā॑pṛthi॒vī va॑ri॒mṇā yāvat sa॒pta sindha॑vo vitaṣṭhi॒re | vācaṃ॑ vi॒ṣasya॒ dūṣa॑ṇīṃ॒ tāmi॒to nira॑vādiṣam || २ ||
सु॒प॒र्णस्त्वा॑ ग॒रुत्मा॒न्विष॑ प्रथ॒ममा॑वयत्।
नामी॑मदो॒ नारू॑रुप उ॒तास्मा॑ अभवः पि॒तुः ॥३॥
su॒pa॒rṇastvā॑ ga॒rutmā॒nviṣa॑ pratha॒mamā॑vayat | nāmī॑mado॒ nārū॑rupa u॒tāsmā॑ abhavaḥ pi॒tuḥ || ३ ||
यस्त॒ आस्य॒त् पञ्चा॑ङ्गुरिर्व॒क्राच्चि॒दधि॒ धन्व॑नः ।
अ॒प॒स्क॒म्भस्य॑ श॒ल्यान्निर॑वोचम॒हं वि॒षम् ॥४॥
yasta॒ āsya॒t pañcā॑ṅgurirva॒krācci॒dadhi॒ dhanva॑naḥ | a॒pa॒ska॒mbhasya॑ śa॒lyānnira॑vocama॒haṃ vi॒ṣam || ४ ||
श॒ल्याद्वि॒षं निर॑वोचं प्राञ्ज॑नादु॒त प॒र्ण॒धेः ।
अ॒पा॒ष्ठाच्छृङ्गा॒त्कुल्म॑ला॒न्निर॑वोचमहं वि॒ष॑म् ॥५॥
śa॒lyādvi॒ṣaṃ nira॑vocaṃ prāñja॑nādu॒ta pa॒rṇa॒dheḥ | a॒pā॒ṣṭhācchṛṅgā॒tkulma॑lā॒nnira॑vocamahaṃ vi॒ṣa॑m || ५ ||
अ॒र॒सस्त॑ इषो श॒ल्योऽथो॑ ते अ॒र॒सं वि॒षम्।
उ॒तार॒सस्य॑ वृ॒क्षस्य॒ धनु॑ष्टे अरसार॒सम् ॥६॥
a॒ra॒sasta॑ iṣo śa॒lyo’tho॑ te a॒ra॒saṃ vi॒ṣam | u॒tāra॒sasya॑ vṛ॒kṣasya॒ dhanu॑ṣṭe arasāra॒sam || ६ ||
ये अपी॑ष॒न् ये अदि॑ह॒न् य आस्य॒न् ये अ॒वासृ॑जन्।
सर्वे॒ ते वध्र॑यः कृ॒ता वध्रि॑र्विषगि॒रिः कृतः ॥७॥
ye apī॑ṣa॒n ye adi॑ha॒n ya āsya॒n ye a॒vāsṛ॑jan | sarve॒ te vadhra॑yaḥ kṛ॒tā vadhri॑rviṣagi॒riḥ kṛtaḥ || ७ ||
वध्र॑यस्ते खनि॒तारो॒ वध्रि॒स्त्वम॑स्योषधे ।
वध्रिः॒ स पर्व॑तो गि॒रिर्यतो॑ जा॒तमि॒दं वि॒षम् ॥८॥
vadhra॑yaste khani॒tāro॒ vadhri॒stvama॑syoṣadhe | vadhriḥ॒ sa parva॑to gi॒riryato॑ jā॒tami॒daṃ vi॒ṣam || ८ ||