EeseDharmaSanātana Library
5काण्ड 4 · सूक्त 5
Atharvaveda Śaunaka Kand 4, Sukta 5.
7 shlokस॒हस्र॑शृङ्गो वृष॒भो यः स॑मु॒द्रादु॒दाच॑रत्।
तेना॑ सह॒स्येऽना व॒यं नि जना॑न्त्स्वापयामसि ॥१॥
sa॒hasra॑śṛṅgo vṛṣa॒bho yaḥ sa॑mu॒drādu॒dāca॑rat | tenā॑ saha॒sye’nā va॒yaṃ ni janā॑ntsvāpayāmasi || १ ||
न भूमिं॒ वातो॒ अति॑ वाति॒ नाति॑ पश्यति॒ कश्च॒न।
स्त्रिय॑श्च॒ सर्वाः॑ स्वा॒पय॒ शुन॒श्चेन्द्र॑सखा॒ चर॑न् ॥२॥
na bhūmiṃ॒ vāto॒ ati॑ vāti॒ nāti॑ paśyati॒ kaśca॒na | striya॑śca॒ sarvāḥ॑ svā॒paya॒ śuna॒ścendra॑sakhā॒ cara॑n || २ ||
प्रो॒ष्ठे॒श॒यास्त॑ल्पेश॒या नारी॒र्या व॑ह्य॒शीव॑रीः ।
स्त्रियो॒ याः पुण्य॑गन्धय॒स्ताः सर्वाः॑ स्वापयामसि ॥३॥
pro॒ṣṭhe॒śa॒yāsta॑lpeśa॒yā nārī॒ryā va॑hya॒śīva॑rīḥ | striyo॒ yāḥ puṇya॑gandhaya॒stāḥ sarvāḥ॑ svāpayāmasi || ३ ||
एज॑देजदजग्रभं॒ चक्षुः॑ प्रा॒णम॑जग्रभम्।
अङ्गा॑न्यजग्रभं॒ सर्वा॑ रात्री॑णामतिशर्व॒रे ॥४॥
eja॑dejadajagrabhaṃ॒ cakṣuḥ॑ prā॒ṇama॑jagrabham | aṅgā॑nyajagrabhaṃ॒ sarvā॑ rātrī॑ṇāmatiśarva॒re || ४ ||
य आस्ते॒ यश्चर॑ति॒ यश्च॒ तिष्ठ॑न्वि॒पश्य॑ति ।
तेषां॒ सं द॑ध्मो॒ अक्षी॑णि॒ यथे॒दं ह॒र्म्यं तथा॑ ॥५॥
ya āste॒ yaścara॑ti॒ yaśca॒ tiṣṭha॑nvi॒paśya॑ti | teṣāṃ॒ saṃ da॑dhmo॒ akṣī॑ṇi॒ yathe॒daṃ ha॒rmyaṃ tathā॑ || ५ ||
स्वप्तु॑ मा॒ता स्वप्तु॑ पि॒ता स्वप्तु॒ श्वा स्वप्तु॑ वि॒श्पतिः॑ ।
स्वप॑न्त्वस्यै ज्ञा॒तयः॒ स्वप्त्व॒यम॒भितो॒ जनः॑ ॥६॥
svaptu॑ mā॒tā svaptu॑ pi॒tā svaptu॒ śvā svaptu॑ vi॒śpatiḥ॑ | svapa॑ntvasyai jñā॒tayaḥ॒ svaptva॒yama॒bhito॒ janaḥ॑ || ६ ||
स्वप्न॑ स्वप्नाभि॒कर॑णेन॒ सर्वं॒ नि स्वापया॒ जन॑म्।
ओ॒त्सू॒र्यम॒न्यान्त्स्वा॒पया॑व्यु॒षं जा॑गृताद॒हमिन्द्र॑ इ॒वारि॑ष्टो॒ अक्षि॑तः ॥७॥
svapna॑ svapnābhi॒kara॑ṇena॒ sarvaṃ॒ ni svāpayā॒ jana॑m | o॒tsū॒ryama॒nyāntsvā॒payā॑vyu॒ṣaṃ jā॑gṛtāda॒hamindra॑ i॒vāri॑ṣṭo॒ akṣi॑taḥ || ७ ||