EeseDharmaSanātana Library
4काण्ड 4 · सूक्त 4
Atharvaveda Śaunaka Kand 4, Sukta 4.
8 shlok६ अग्निः, सरस्वती, ब्रह्मणस्पतिः। अनुष्टप्, ४ पुरउष्णिक्, ६-७ भुरिक्।
यां त्वा॑ गन्ध॒र्वो अख॑न॒द् वरु॑णाय मृ॒तभ्र॑जे ।
तां त्वा॑ व॒यं ख॑नाम॒स्योष॑धिं शेप॒हर्ष॑णीम् ॥१॥
६ agniḥ, sarasvatī, brahmaṇaspatiḥ | anuṣṭap, ४ purauṣṇik, ६-७ bhurik | yāṃ tvā॑ gandha॒rvo akha॑na॒d varu॑ṇāya mṛ॒tabhra॑je | tāṃ tvā॑ va॒yaṃ kha॑nāma॒syoṣa॑dhiṃ śepa॒harṣa॑ṇīm || १ ||
उदु॒षा उदु॒ सूर्य॒ उदि॒दं मा॑म॒कं वचः॑ ।
उदे॑जतु प्र॒जाप॑ति॒र्वृषा॒ शुष्मे॑ण वा॒जिना॑ ॥२॥
udu॒ṣā udu॒ sūrya॒ udi॒daṃ mā॑ma॒kaṃ vacaḥ॑ | ude॑jatu pra॒jāpa॑ti॒rvṛṣā॒ śuṣme॑ṇa vā॒jinā॑ || २ ||
यथा॑ स्म ते वि॒रोह॑तो॒ऽभित॑प्तमि॒वान॑ति ।
तत॑स्ते॒ शुष्म॑वत्तरमि॒यं कृ॑णो॒त्वोष॑धिः ॥३॥
yathā॑ sma te vi॒roha॑to॒’bhita॑ptami॒vāna॑ti | tata॑ste॒ śuṣma॑vattarami॒yaṃ kṛ॑ṇo॒tvoṣa॑dhiḥ || ३ ||
उच्छुष्मौष॑धीनां॒ सार॑ ऋष॒भाणा॑म्।
सं पुं॒सामि॑न्द्र॒ वृष्ण्य॑म॒स्मिन्धे॑हि तनूवशिन् ॥४॥
ucchuṣmauṣa॑dhīnāṃ॒ sāra॑ ṛṣa॒bhāṇā॑m | saṃ puṃ॒sāmi॑ndra॒ vṛṣṇya॑ma॒smindhe॑hi tanūvaśin || ४ ||
अ॒पां रसः॑ प्रथम॒जोऽथो॒ वन॒स्पती॑नाम्।
उ॒त सोम॑स्य॒ भ्राता॑स्यु॒तार्शम॑सि॒ वृष्ण्य॑म् ॥५॥
a॒pāṃ rasaḥ॑ prathama॒jo’tho॒ vana॒spatī॑nām | u॒ta soma॑sya॒ bhrātā॑syu॒tārśama॑si॒ vṛṣṇya॑m || ५ ||
अ॒द्याग्ने॑ अ॒द्य स॑वितर॒द्य दे॑वि सरस्वति ।
अ॑द्यास्य ब्र॑ह्मणस्पते॒ धनु॑रि॒वा ता॑नया॒ पसः॑ ॥६॥
a॒dyāgne॑ a॒dya sa॑vitara॒dya de॑vi sarasvati | a॑dyāsya bra॑hmaṇaspate॒ dhanu॑ri॒vā tā॑nayā॒ pasaḥ॑ || ६ ||
आहं त॑नोमि ते॒ पसो॒ अधि॒ ज्यामि॑व॒ धन्व॑नि ।
क्रम॒स्वर्श॑ इव रो॒हित॒मन॑वग्लायता॒ सदा॑ ॥७॥
āhaṃ ta॑nomi te॒ paso॒ adhi॒ jyāmi॑va॒ dhanva॑ni | krama॒svarśa॑ iva ro॒hita॒mana॑vaglāyatā॒ sadā॑ || ७ ||
अश्व॑स्याश्वत॒रस्या॒जस्य॒ पेत्व॑स्य च ।
अथ॑ ऋष॒भस्य॒ ये वाजा॒स्तान॒स्मिन्धे॑हि तनूवशिन् ॥८॥
aśva॑syāśvata॒rasyā॒jasya॒ petva॑sya ca | atha॑ ṛṣa॒bhasya॒ ye vājā॒stāna॒smindhe॑hi tanūvaśin || ८ ||