EeseDharmaSanātana Library
38काण्ड 4 · सूक्त 38
Atharvaveda Śaunaka Kand 4, Sukta 38.
7 shlokउ॒द्भि॒न्द॒तीं सं॒जय॑न्तीमप्स॒रां सा॑धुदे॒विनी॑म्।
ग्लहे॑ कृ॒तानि॑ कृण्वा॒नाम॑प्स॒रां तामि॒ह हु॑वे ॥१॥
u॒dbhi॒nda॒tīṃ saṃ॒jaya॑ntīmapsa॒rāṃ sā॑dhude॒vinī॑m | glahe॑ kṛ॒tāni॑ kṛṇvā॒nāma॑psa॒rāṃ tāmi॒ha hu॑ve || १ ||
वि॒चि॒न्व॒तीमा॑कि॒रन्ती॑मप्स॒रां सा॑धुदे॒विनी॑म्।
ग्लहे॑ कृ॒तानि॑ गृह्णा॒नाम॑प्स॒रां तामि॒ह हु॑वे ॥२॥
vi॒ci॒nva॒tīmā॑ki॒rantī॑mapsa॒rāṃ sā॑dhude॒vinī॑m | glahe॑ kṛ॒tāni॑ gṛhṇā॒nāma॑psa॒rāṃ tāmi॒ha hu॑ve || २ ||
यायैः॑ परि॒नृत्य॑त्या॒ददा॑ना कृ॒तं ग्लहा॑त्।
सा नः॑ कृ॒तानि॑ सीष॒ती प्र॒हामा॑प्नोतु मा॒यया॑ ।
सा नः॒ पय॑स्व॒त्यैतु॒ मा नो॑ जैषुरि॒दं धन॑म् ॥३॥
yāyaiḥ॑ pari॒nṛtya॑tyā॒dadā॑nā kṛ॒taṃ glahā॑t | sā naḥ॑ kṛ॒tāni॑ sīṣa॒tī pra॒hāmā॑pnotu mā॒yayā॑ | sā naḥ॒ paya॑sva॒tyaitu॒ mā no॑ jaiṣuri॒daṃ dhana॑m || ३ ||
या अ॒क्षेषु॑ प्र॒मोद॑न्ते॒ शुचं॒ क्रोधं॑ च॒ बिभ्र॑ती ।
आ॒न॒न्दिनीं॑ प्रमो॒दिनी॑मप्स॒रां तामि॒ह हु॑वे ॥४॥
yā a॒kṣeṣu॑ pra॒moda॑nte॒ śucaṃ॒ krodhaṃ॑ ca॒ bibhra॑tī | ā॒na॒ndinīṃ॑ pramo॒dinī॑mapsa॒rāṃ tāmi॒ha hu॑ve || ४ ||
सूर्य॑स्य र॒श्मीननु॒ याः स॒ञ्चर॑न्ति॒ मरी॑चीर्वा॒ या अ॑नुस॒ञ्चर॑न्ति ।
यासा॑मृष॒भो दू॑र॒तो वा॒जिनी॑वान्त्स॒द्यः सर्वाँन् लो॒कान् प॒र्यैति॒ रक्ष॑न्।
स न॒ ऐतु॒ होम॑मि॒मं जु॑षा॒णो॒३ऽन्तरि॑क्षेण स॒ह वा॒जिनी॑वान् ॥५॥
sūrya॑sya ra॒śmīnanu॒ yāḥ sa॒ñcara॑nti॒ marī॑cīrvā॒ yā a॑nusa॒ñcara॑nti | yāsā॑mṛṣa॒bho dū॑ra॒to vā॒jinī॑vāntsa॒dyaḥ sarvām̐n lo॒kān pa॒ryaiti॒ rakṣa॑n | sa na॒ aitu॒ homa॑mi॒maṃ ju॑ṣā॒ṇo॒३’ntari॑kṣeṇa sa॒ha vā॒jinī॑vān || ५ ||
अ॒न्तरि॑क्षेन स॒ह वा॑जिनीवन् क॒र्कीं व॒त्सामि॒ह र॑क्ष वाजिन्।
इ॒मे ते॑ स्तो॒का ब॑हु॒ला एह्य॒र्वाङि॒यं ते॑ क॒र्कीह ते॒ मनो॑ऽस्तु ॥६॥
a॒ntari॑kṣena sa॒ha vā॑jinīvan ka॒rkīṃ va॒tsāmi॒ha ra॑kṣa vājin | i॒me te॑ sto॒kā ba॑hu॒lā ehya॒rvāṅi॒yaṃ te॑ ka॒rkīha te॒ mano॑’stu || ६ ||
अ॒न्तरि॑क्षेण स॒ह वा॑जिनीवन् क॒र्कीं व॒त्सामि॒ह र॑क्ष वाजिन्।
अ॒यं घा॒सो अ॒यं व्र॒ज इ॒ह व॒त्सां नि ब॑ध्नीमः ।
य॒था॒ना॒म व॑ ईश्महे॒ स्वाहा॑ ॥७॥
a॒ntari॑kṣeṇa sa॒ha vā॑jinīvan ka॒rkīṃ va॒tsāmi॒ha ra॑kṣa vājin | a॒yaṃ ghā॒so a॒yaṃ vra॒ja i॒ha va॒tsāṃ ni ba॑dhnīmaḥ | ya॒thā॒nā॒ma va॑ īśmahe॒ svāhā॑ || ७ ||