EeseDharmaSanātana Library
37काण्ड 4 · सूक्त 37
Atharvaveda Śaunaka Kand 4, Sukta 37.
12 shlokत्वया॒ पूर्व॒मथ॑र्वाणो ज॒घ्नू रक्षां॑स्योषधे ।
त्वया॑ जघान क॒श्यप॒स्त्वया॒ कण्वो॑ अ॒गस्त्यः॑ ॥१॥
tvayā॒ pūrva॒matha॑rvāṇo ja॒ghnū rakṣāṃ॑syoṣadhe | tvayā॑ jaghāna ka॒śyapa॒stvayā॒ kaṇvo॑ a॒gastyaḥ॑ || १ ||
त्वया॑ व॒यम॑प्स॒रसो॑ गन्ध॒र्वांस्चा॑तयामहे ।
अज॑शृ॒ङ्ग्यज॒ रक्षः॒ सर्वा॑न् ग॒न्धेन॑ नाशय ॥२॥
tvayā॑ va॒yama॑psa॒raso॑ gandha॒rvāṃscā॑tayāmahe | aja॑śṛ॒ṅgyaja॒ rakṣaḥ॒ sarvā॑n ga॒ndhena॑ nāśaya || २ ||
न॒दीं य॑न्त्वप्स॒रसो॒ऽपां ता॒रम॑वश्व॒सम्।
गु॒ल्गु॒लूः पीला॑ नल॒द्यौ॒३क्षग॑न्धिः प्रमन्द॒नी।
तत् परे॑ताप्सरसः॒ प्रति॑बुद्धा अभूतन ॥३॥
na॒dīṃ ya॑ntvapsa॒raso॒’pāṃ tā॒rama॑vaśva॒sam | gu॒lgu॒lūḥ pīlā॑ nala॒dyau॒३kṣaga॑ndhiḥ pramanda॒nī | tat pare॑tāpsarasaḥ॒ prati॑buddhā abhūtana || ३ ||
यत्रा॑श्व॒त्था न्य॒ग्रोधा॑ महावृ॒क्षाः शि॑ख॒ण्डिनः॑ ।
तत् परे॑ताप्सरसः॒ प्रति॑बुद्धा अभूतन ॥४॥
yatrā॑śva॒tthā nya॒grodhā॑ mahāvṛ॒kṣāḥ śi॑kha॒ṇḍinaḥ॑ | tat pare॑tāpsarasaḥ॒ prati॑buddhā abhūtana || ४ ||
यत्र॑ वः प्रे॒ङ्खा हरि॑ता॒ अर्जु॑ना उ॒त यत्रा॑घा॒ताः क॑र्क॒र्यः सं॒वद॑न्ति ।
तत् परे॑ताप्सरसः॒ प्रति॑बुद्धा अभूतन ॥५॥
yatra॑ vaḥ pre॒ṅkhā hari॑tā॒ arju॑nā u॒ta yatrā॑ghā॒tāḥ ka॑rka॒ryaḥ saṃ॒vada॑nti | tat pare॑tāpsarasaḥ॒ prati॑buddhā abhūtana || ५ ||
एयम॑ग॒न्नोष॑धीनां वी॒रुधां॑ वी॒र्याऽवती ।
अ॒ज॒शृ॒ङ्ग्यऽराट॒की ती॑क्ष्णशृ॒ङ्गी व्यृऽषतु ॥६॥
eyama॑ga॒nnoṣa॑dhīnāṃ vī॒rudhāṃ॑ vī॒ryā’vatī | a॒ja॒śṛ॒ṅgya’rāṭa॒kī tī॑kṣṇaśṛ॒ṅgī vyṛ’ṣatu || ६ ||
आ॒नृत्य॑तः शिख॒ण्डिनो॑ गन्ध॒र्वस्या॑प्सराप॒तेः ।
भि॒नद्मि॑ मु॒ष्कावपि॑ यामि॒ शेपः॑ ॥७॥
ā॒nṛtya॑taḥ śikha॒ṇḍino॑ gandha॒rvasyā॑psarāpa॒teḥ | bhi॒nadmi॑ mu॒ṣkāvapi॑ yāmi॒ śepaḥ॑ || ७ ||
भी॒मा इन्द्र॑स्य हे॒तयः॑ श॒तमृ॒ष्टीर॑य॒स्मयीः॑ ।
ताभि॑र्हविर॒दान् ग॑न्ध॒र्वान॑वका॒दान् व्यृऽषतु ॥८॥
bhī॒mā indra॑sya he॒tayaḥ॑ śa॒tamṛ॒ṣṭīra॑ya॒smayīḥ॑ | tābhi॑rhavira॒dān ga॑ndha॒rvāna॑vakā॒dān vyṛ’ṣatu || ८ ||
भी॒मा इन्द्र॑स्य हे॒तयः॑ श॒तमृ॒ष्टीर्हि॑र॒ण्ययीः॑ ।
ताभि॑र्हविर॒दान् ग॑न्ध॒र्वान॑वका॒दान् व्युऽषतु ॥९॥
bhī॒mā indra॑sya he॒tayaḥ॑ śa॒tamṛ॒ṣṭīrhi॑ra॒ṇyayīḥ॑ | tābhi॑rhavira॒dān ga॑ndha॒rvāna॑vakā॒dān vyu’ṣatu || ९ ||
अ॒व॒का॒दान॑भिशो॒चान॒प्सु ज्यो॑तय माम॒कान्।
पि॒शा॒चान्त्सर्वा॑नोषधे॒ प्र मृ॑णीहि॒ सह॑स्व च ॥१०॥
a॒va॒kā॒dāna॑bhiśo॒cāna॒psu jyo॑taya māma॒kān | pi॒śā॒cāntsarvā॑noṣadhe॒ pra mṛ॑ṇīhi॒ saha॑sva ca || १० ||
स्वेवैकः॑ क॒पिरि॒वैकः॑ कुमा॒रः स॑र्वकेश॒कः ।
प्रियो दृश इ॑व भू॒त्वा ग॑न्ध॒र्वः स॑चते॒ स्त्रिय॑स्त॑मि॒तो ना॑शयामसि॒ ब्रह्म॑णा वी॒र्याऽवता ॥११॥
svevaikaḥ॑ ka॒piri॒vaikaḥ॑ kumā॒raḥ sa॑rvakeśa॒kaḥ | priyo dṛśa i॑va bhū॒tvā ga॑ndha॒rvaḥ sa॑cate॒ striya॑sta॑mi॒to nā॑śayāmasi॒ brahma॑ṇā vī॒ryā’vatā || ११ ||
जा॒या इद् वो॑ अप्स॒रसो॒ गन्ध॑र्वाः॒ पत॑यो यू॒यम्।
अप धावतामर्त्या॒ मर्त्या॒न् मा स॑चध्वम् ॥१२॥
jā॒yā id vo॑ apsa॒raso॒ gandha॑rvāḥ॒ pata॑yo yū॒yam | apa dhāvatāmartyā॒ martyā॒n mā sa॑cadhvam || १२ ||