EeseDharmaSanātana Library
36काण्ड 4 · सूक्त 36
Atharvaveda Śaunaka Kand 4, Sukta 36.
10 shlokतान्त्स॒त्यौजाः॒ प्र द॑हत्व॒ग्निर्वै॑श्वान॒रोवृषा॑ ।
यो नो॑ दुर॒स्याद् दिप्सा॒च्चाथो॒ यो नो॑ अराति॒यात् ॥१॥
tāntsa॒tyaujāḥ॒ pra da॑hatva॒gnirvai॑śvāna॒rovṛṣā॑ | yo no॑ dura॒syād dipsā॒ccātho॒ yo no॑ arāti॒yāt || १ ||
यो नो॒ दिप्स॒ददि॑प्सतो॒ दिप्स॑तो॒ यश्च॒ दिप्स॑ति ।
वै॒श्वा॒न॒रस्य॒ दंष्ट्र॑योर॒ग्नेरपि॑ दधामि॒ तम् ॥२॥
yo no॒ dipsa॒dadi॑psato॒ dipsa॑to॒ yaśca॒ dipsa॑ti | vai॒śvā॒na॒rasya॒ daṃṣṭra॑yora॒gnerapi॑ dadhāmi॒ tam || २ ||
य आ॑ग॒रे मृ॒गय॑न्ते प्रतिक्रो॒शेऽमावा॒स्ये।
क्र॒व्यादो॑ अ॒न्यान् दिप्स॑तः॒ सर्वां॒स्तान्त्सह॑सा सहे ॥३॥
ya ā॑ga॒re mṛ॒gaya॑nte pratikro॒śe’māvā॒sye | kra॒vyādo॑ a॒nyān dipsa॑taḥ॒ sarvāṃ॒stāntsaha॑sā sahe || ३ ||
सहे॑ पिशा॒चान्त्सह॑सैषां॒ द्रवि॑णं ददे ।
सर्वा॑न् दुरस्य॒तो ह॑न्मि॒ सं म॒ आकू॑तिरृद्यताम् ॥४॥
sahe॑ piśā॒cāntsaha॑saiṣāṃ॒ dravi॑ṇaṃ dade | sarvā॑n durasya॒to ha॑nmi॒ saṃ ma॒ ākū॑tirṛdyatām || ४ ||
ये दे॒वास्तेन॒ हास॑न्ते॒ सूर्ये॑ण मिमते ज॒वम्।
न॒दीषु॒ पर्व॑तेषु॒ ये सं तैः प॒शुभि॑र्विदे ॥५॥
ye de॒vāstena॒ hāsa॑nte॒ sūrye॑ṇa mimate ja॒vam | na॒dīṣu॒ parva॑teṣu॒ ye saṃ taiḥ pa॒śubhi॑rvide || ५ ||
तप॑नो अस्मि पिशा॒चानां॑ व्या॒घ्रो गोम॑तामिव ।
श्वानः॑ सिं॒हमि॑व दृ॒ष्ट्वा ते न वि॑न्दन्ते॒ न्यञ्च॑नम् ॥६॥
tapa॑no asmi piśā॒cānāṃ॑ vyā॒ghro goma॑tāmiva | śvānaḥ॑ siṃ॒hami॑va dṛ॒ṣṭvā te na vi॑ndante॒ nyañca॑nam || ६ ||
न पि॑शा॒चैः सं श॑क्नोमि॒ न स्ते॒नैर्न व॑न॒र्गुभिः॑ ।
पि॒शा॒चास्तस्मा॑न्नश्यन्ति॒ यम॒हं ग्राम॑मावि॒शे ॥७॥
na pi॑śā॒caiḥ saṃ śa॑knomi॒ na ste॒nairna va॑na॒rgubhiḥ॑ | pi॒śā॒cāstasmā॑nnaśyanti॒ yama॒haṃ grāma॑māvi॒śe || ७ ||
यं ग्राम॑मावि॒शत॑ इ॒दमु॒ग्रं सहो॒ मम॑ ।
पि॒शा॒चास्तस्मा॑न्नश्यन्ति॒ न पा॒पमुप॑ जानते ॥८॥
yaṃ grāma॑māvi॒śata॑ i॒damu॒graṃ saho॒ mama॑ | pi॒śā॒cāstasmā॑nnaśyanti॒ na pā॒pamupa॑ jānate || ८ ||
ये मा॑ क्रो॒धय॑न्ति लपि॒ता ह॒स्तिनं॑ म॒शका॑ इव ।
तान॒हं म॑न्ये॒ दुर्हि॑ता॒न् जने॒ अल्प॑शयूनिव ॥९॥
ye mā॑ kro॒dhaya॑nti lapi॒tā ha॒stinaṃ॑ ma॒śakā॑ iva | tāna॒haṃ ma॑nye॒ durhi॑tā॒n jane॒ alpa॑śayūniva || ९ ||
अ॒भि तं निरृ॑तिर्धत्ता॒मश्व॑मिवाश्वाभि॒धान्या॑ ।
म॒ल्वो यो मह्यं॒ क्रुध्य॑ति॒ स उ॒ पाशा॒न्नमु॑च्यते ॥१०॥
a॒bhi taṃ nirṛ॑tirdhattā॒maśva॑mivāśvābhi॒dhānyā॑ | ma॒lvo yo mahyaṃ॒ krudhya॑ti॒ sa u॒ pāśā॒nnamu॑cyate || १० ||