EeseDharmaSanātana Library
35काण्ड 4 · सूक्त 35
Atharvaveda Śaunaka Kand 4, Sukta 35.
7 shlokबयमो॑द॒नं प्र॑थम॒जा ऋ॒तस्य॑ प्र॒जाप॑ति॒स्तप॑सा ब्र॒ह्मणेऽप॑चत्।
यो लो॒कानां॒ विधृ॑ति॒र्नाभि॒रेषा॒त् तेनौ॑द॒नेनाति॑ तराणि मृ॒त्युम् ॥१॥
bayamo॑da॒naṃ pra॑thama॒jā ṛ॒tasya॑ pra॒jāpa॑ti॒stapa॑sā bra॒hmaṇe’pa॑cat | yo lo॒kānāṃ॒ vidhṛ॑ti॒rnābhi॒reṣā॒t tenau॑da॒nenāti॑ tarāṇi mṛ॒tyum || १ ||
येनात॑रन् भूत॒कृतोऽति॑ मृ॒त्युं यम॒न्ववि॑द॒न् तप॑सा॒ श्रमे॑ण ।
यं प॒पाच॑ ब्र॒ह्मणे॒ ब्रह्म॒ पूर्वं॒ तेनौ॑द॒नेनाति॑ तराणि मृ॒त्युम् ॥२॥
yenāta॑ran bhūta॒kṛto’ti॑ mṛ॒tyuṃ yama॒nvavi॑da॒n tapa॑sā॒ śrame॑ṇa | yaṃ pa॒pāca॑ bra॒hmaṇe॒ brahma॒ pūrvaṃ॒ tenau॑da॒nenāti॑ tarāṇi mṛ॒tyum || २ ||
यो दा॒धार॑ पृथि॒वीं वि॒श्वभो॑जसं॒ यो अ॒न्तरि॑क्ष॒मापृ॑णा॒द् रसे॑न ।
यो अस्त॑भ्ना॒द् दिव॑मू॒र्ध्वो म॑हि॒म्ना तेनौ॑द॒नेनाति॑ तराणि मृ॒त्युम् ॥३॥
yo dā॒dhāra॑ pṛthi॒vīṃ vi॒śvabho॑jasaṃ॒ yo a॒ntari॑kṣa॒māpṛ॑ṇā॒d rase॑na | yo asta॑bhnā॒d diva॑mū॒rdhvo ma॑hi॒mnā tenau॑da॒nenāti॑ tarāṇi mṛ॒tyum || ३ ||
यस्मा॒न्मासा॒ निर्मि॑तास्त्रिं॒शद॑राः संवत्स॒रो यस्मा॒न्निर्मि॑तो॒ द्वाद॑शारः ।
अ॒हो॒रा॒त्रा यं प॑रि॒यन्तो॒ नापुस्तेनौ॑दनेनाति॑ तराणि मृ॒त्युम् ॥४॥
yasmā॒nmāsā॒ nirmi॑tāstriṃ॒śada॑rāḥ saṃvatsa॒ro yasmā॒nnirmi॑to॒ dvāda॑śāraḥ | a॒ho॒rā॒trā yaṃ pa॑ri॒yanto॒ nāpustenau॑danenāti॑ tarāṇi mṛ॒tyum || ४ ||
यः प्रा॑ण॒दः प्रा॑ण॒दवा॑न् ब॒भूव॒ यस्मै॑ लो॒का घृ॒तव॑न्तः॒ क्षर॑न्ति ।
ज्योति॑ष्मतीः प्र॒दिशो॒ यस्य॒ सर्वा॒स्तेनौ॑द॒नेनाति॑ तराणि मृ॒त्युम् ॥५॥
yaḥ prā॑ṇa॒daḥ prā॑ṇa॒davā॑n ba॒bhūva॒ yasmai॑ lo॒kā ghṛ॒tava॑ntaḥ॒ kṣara॑nti | jyoti॑ṣmatīḥ pra॒diśo॒ yasya॒ sarvā॒stenau॑da॒nenāti॑ tarāṇi mṛ॒tyum || ५ ||
यस्मा॑त् प॒क्वाद॒मृतं॑ संब॒भूव॒ यो गा॑य॒त्र्या अधि॑पतिर्ब॒भूव॑ ।
यस्मि॒न् वेदा॒ निहि॑ता वि॒श्वरू॑पा॒स्तेनौ॑द॒नेनाति॑ तराणि मृ॒त्युम् ॥६॥
yasmā॑t pa॒kvāda॒mṛtaṃ॑ saṃba॒bhūva॒ yo gā॑ya॒tryā adhi॑patirba॒bhūva॑ | yasmi॒n vedā॒ nihi॑tā vi॒śvarū॑pā॒stenau॑da॒nenāti॑ tarāṇi mṛ॒tyum || ६ ||
अव॑ बाधे द्वि॒षन्तं॑ देवपी॒युं स॒पत्ना॒ ये मेऽप॒ ते भ॑वन्तु ।
ब्र॒ह्मौ॒द॒नं वि॑श्व॒जितं॑ पचामि शृ॒ण्वन्तु॑ मे श्र॒द्दधा॑नस्य दे॒वाः ॥७॥
ava॑ bādhe dvi॒ṣantaṃ॑ devapī॒yuṃ sa॒patnā॒ ye me’pa॒ te bha॑vantu | bra॒hmau॒da॒naṃ vi॑śva॒jitaṃ॑ pacāmi śṛ॒ṇvantu॑ me śra॒ddadhā॑nasya de॒vāḥ || ७ ||