EeseDharmaSanātana Library
34काण्ड 4 · सूक्त 34
Atharvaveda Śaunaka Kand 4, Sukta 34.
8 shlokब्रह्मा॑स्य शी॒र्षं बृ॒हद॑स्य पृ॒ष्ठं वा॑मदे॒व्यमु॒दर॑मोद॒नस्य॑ ।
छन्दां॑सि प॒क्षौ मुख॑मस्य स॒त्यं वि॑ष्टा॒री जा॒तस्तप॒सोऽधि॑ य॒ज्ञः ॥१॥
brahmā॑sya śī॒rṣaṃ bṛ॒hada॑sya pṛ॒ṣṭhaṃ vā॑made॒vyamu॒dara॑moda॒nasya॑ | chandāṃ॑si pa॒kṣau mukha॑masya sa॒tyaṃ vi॑ṣṭā॒rī jā॒tastapa॒so’dhi॑ ya॒jñaḥ || १ ||
अ॒न॒स्थाः पू॒ताः पव॑नेन शु॒द्धाः शुच॑यः॒ शुचि॒मपि॑ यन्ति लो॒कम्।
नैषां शि॒श्नं प्र द॑हति जा॒तवे॑दाः स्व॒र्गे लो॒के ब॒हु स्त्रैण॑मेषाम् ॥२॥
a॒na॒sthāḥ pū॒tāḥ pava॑nena śu॒ddhāḥ śuca॑yaḥ॒ śuci॒mapi॑ yanti lo॒kam | naiṣāṃ śi॒śnaṃ pra da॑hati jā॒tave॑dāḥ sva॒rge lo॒ke ba॒hu straiṇa॑meṣām || २ ||
वि॒ष्टा॒रिण॑मोद॒नं ये पच॑न्ति॒ नैना॒नव॑र्तिः सचते क॒दा च॒न।
आस्ते॑ य॒म उप॑ याति दे॒वान्त्सं ग॑न्ध॒र्वैर्मदते सो॒म्येभिः॑ ॥३॥
vi॒ṣṭā॒riṇa॑moda॒naṃ ye paca॑nti॒ nainā॒nava॑rtiḥ sacate ka॒dā ca॒na | āste॑ ya॒ma upa॑ yāti de॒vāntsaṃ ga॑ndha॒rvairmadate so॒myebhiḥ॑ || ३ ||
वि॒ष्टा॒रिण॑मोद॒नं ये पच॑न्ति॒ नैना॑न् य॒मः परि॑ मुष्णाति॒ रेतः॑ ।
र॒थी ह॑ भू॒त्वा र॑थ॒यान॑ ईयते प॒क्षी ह॑ भू॒त्वाति॒ दिवः॒ समे॑ति ॥४॥
vi॒ṣṭā॒riṇa॑moda॒naṃ ye paca॑nti॒ nainā॑n ya॒maḥ pari॑ muṣṇāti॒ retaḥ॑ | ra॒thī ha॑ bhū॒tvā ra॑tha॒yāna॑ īyate pa॒kṣī ha॑ bhū॒tvāti॒ divaḥ॒ same॑ti || ४ ||
ष॒ य॒ज्ञानां॒ वित॑तो॒ वहि॑ष्ठो विष्टा॒रिणं॑ प॒क्त्वा दि॒वमा विवे॑श ।
आ॒ण्डीकं॑ कुमु॑दं॒ सं त॑नोति॒ बिसं॑ शा॒लूकं॒ शफ॑को मुला॒ली।
ए॒तास्त्वा॒ धारा॒ उप॑ यन्तु॒ सर्वाः॑ स्व॒र्गे लो॒के मधु॑म॒त् पिन्व॑माना॒ उप॑ त्वा तिष्ठन्तु पुष्क॒रिणीः॒ सम॑न्ताः ॥५॥
ṣa॒ ya॒jñānāṃ॒ vita॑to॒ vahi॑ṣṭho viṣṭā॒riṇaṃ॑ pa॒ktvā di॒vamā vive॑śa | ā॒ṇḍīkaṃ॑ kumu॑daṃ॒ saṃ ta॑noti॒ bisaṃ॑ śā॒lūkaṃ॒ śapha॑ko mulā॒lī | e॒tāstvā॒ dhārā॒ upa॑ yantu॒ sarvāḥ॑ sva॒rge lo॒ke madhu॑ma॒t pinva॑mānā॒ upa॑ tvā tiṣṭhantu puṣka॒riṇīḥ॒ sama॑ntāḥ || ५ ||
घृ॒तह्र॑दा॒ मधु॑कूलाः॒ सुरो॑दकाः क्षी॒रेण॑ पू॒र्णा उ॑द॒केन॑ द॒ध्ना।
ए॒तास्त्वा॒ धारा॒ उप॑ यन्तु॒ सर्वाः॑ स्व॒र्गे लो॒के मधु॑म॒त् पिन्व॑माना॒ उप॑ त्वा तिष्ठन्तु पुष्क॒रिणीः॒ सम॑न्ताः ॥६॥
ghṛ॒tahra॑dā॒ madhu॑kūlāḥ॒ suro॑dakāḥ kṣī॒reṇa॑ pū॒rṇā u॑da॒kena॑ da॒dhnā | e॒tāstvā॒ dhārā॒ upa॑ yantu॒ sarvāḥ॑ sva॒rge lo॒ke madhu॑ma॒t pinva॑mānā॒ upa॑ tvā tiṣṭhantu puṣka॒riṇīḥ॒ sama॑ntāḥ || ६ ||
च॒तुरः॑ कु॒म्भांश्च॑तु॒र्धा द॑दामि क्षी॒रेण॑ पू॒र्नाँ उ॑द॒केन॑ द॒ध्ना।
ए॒तास्त्वा॒ धारा॒ उप॑ यन्तु॒ सर्वाः॑ स्व॒र्गे लो॒के मधु॑म॒त् पिन्व॑माना॒ उप॑ त्वा तिष्ठन्तु पुष्क॒रिणीः॒ सम॑न्ताः ॥७॥
ca॒turaḥ॑ ku॒mbhāṃśca॑tu॒rdhā da॑dāmi kṣī॒reṇa॑ pū॒rnām̐ u॑da॒kena॑ da॒dhnā | e॒tāstvā॒ dhārā॒ upa॑ yantu॒ sarvāḥ॑ sva॒rge lo॒ke madhu॑ma॒t pinva॑mānā॒ upa॑ tvā tiṣṭhantu puṣka॒riṇīḥ॒ sama॑ntāḥ || ७ ||
इ॒ममो॑द॒नं नि द॑धे ब्राह्म॒णेषु॑ विष्टा॒रिणं॑ लोक॒जितं॑ स्व॒र्ग॑म्।
स मे॒ मा क्षे॑ष्ट स्व॒धया॒ पिन्व॑मानो वि॒श्वरू॑पा धे॒नुः का॑म॒दुघा॑ मे अस्तु ॥८॥
i॒mamo॑da॒naṃ ni da॑dhe brāhma॒ṇeṣu॑ viṣṭā॒riṇaṃ॑ loka॒jitaṃ॑ sva॒rga॑m | sa me॒ mā kṣe॑ṣṭa sva॒dhayā॒ pinva॑māno vi॒śvarū॑pā dhe॒nuḥ kā॑ma॒dughā॑ me astu || ८ ||