EeseDharmaSanātana Library
33काण्ड 4 · सूक्त 33
Atharvaveda Śaunaka Kand 4, Sukta 33.
8 shlokअप॑ नः॒ शोशु॑चद॒घमग्ने॑ शुशु॒ग्ध्या र॒यिम्।
अप॑ नः॒ शोशु॑चद॒घम् ॥१॥
apa॑ naḥ॒ śośu॑cada॒ghamagne॑ śuśu॒gdhyā ra॒yim | apa॑ naḥ॒ śośu॑cada॒gham || १ ||
सु॒क्षे॒त्रि॒या सु॑गातु॒या व॑सू॒या च॑ यजामहे ।
अप॑ नः॒ शोशु॑चद॒घम् ॥२॥
su॒kṣe॒tri॒yā su॑gātu॒yā va॑sū॒yā ca॑ yajāmahe | apa॑ naḥ॒ śośu॑cada॒gham || २ ||
प्र यद् भन्दि॑ष्ठ एषां॒ प्रास्माका॑सश्च सू॒रयः॑ ।
अप॑ नः॒ शोशु॑चद॒घम् ॥३॥
pra yad bhandi॑ṣṭha eṣāṃ॒ prāsmākā॑saśca sū॒rayaḥ॑ | apa॑ naḥ॒ śośu॑cada॒gham || ३ ||
प्र यत् ते॑ अग्ने सू॒रयो॒ जाये॑महि॒ प्र ते॑ व॒यम्।
अप॑ नः॒ शोशु॑चद॒घम् ॥४॥
pra yat te॑ agne sū॒rayo॒ jāye॑mahi॒ pra te॑ va॒yam | apa॑ naḥ॒ śośu॑cada॒gham || ४ ||
प्र यद॒ग्नेः सह॑स्वतो वि॒श्वतो॒ यन्ति॑ भा॒नवः॑ ।
अप॑ नः॒ शोशु॑चद॒घम् ॥५॥
pra yada॒gneḥ saha॑svato vi॒śvato॒ yanti॑ bhā॒navaḥ॑ | apa॑ naḥ॒ śośu॑cada॒gham || ५ ||
त्वं हि वि॑श्वतोमुख वि॒श्वतः॑ परि॒भूरसि॑ ।
अप॑ नः॒ शोशु॑चद॒घम् ॥६॥
tvaṃ hi vi॑śvatomukha vi॒śvataḥ॑ pari॒bhūrasi॑ | apa॑ naḥ॒ śośu॑cada॒gham || ६ ||
द्विषो॑ नो विश्वतोमु॒खाति॑ ना॒वेव॑ पारय ।
अप॑ नः॒ शोशु॑चद॒घम् ॥७॥
dviṣo॑ no viśvatomu॒khāti॑ nā॒veva॑ pāraya | apa॑ naḥ॒ śośu॑cada॒gham || ७ ||
स नः॒ सिन्धु॑मिव ना॒वाति॑ पर्ष स्व॒स्तये॑ ।
अप॑ नः॒ शोशु॑चद॒घम् ॥८॥
sa naḥ॒ sindhu॑miva nā॒vāti॑ parṣa sva॒staye॑ | apa॑ naḥ॒ śośu॑cada॒gham || ८ ||