EeseDharmaSanātana Library
32काण्ड 4 · सूक्त 32
Atharvaveda Śaunaka Kand 4, Sukta 32.
7 shlokयस्ते॑ म॒न्योऽवि॑धद् वज्र सायक॒ सह॒ ओजः॒ पुष्य॑ति॒ विश्व॑मानु॒षक्।
सा॒ह्याम॒ दास॒मार्यं॒ त्वया॑ यु॒जा व॒यं सह॑स्कृतेन॒ सह॑सा॒ सह॑स्वता ॥१॥
yaste॑ ma॒nyo’vi॑dhad vajra sāyaka॒ saha॒ ojaḥ॒ puṣya॑ti॒ viśva॑mānu॒ṣak | sā॒hyāma॒ dāsa॒māryaṃ॒ tvayā॑ yu॒jā va॒yaṃ saha॑skṛtena॒ saha॑sā॒ saha॑svatā || १ ||
म॒न्युरिन्द्रो॑ म॒न्युरे॒वास॑ दे॒वो म॒न्युर्होता॒ वरु॑णो जा॒तवे॑दाः ।
म॒न्युर्विश॑ ईडते॒ मानु॑षी॒र्याः पा॒हि नो॑ मन्यो॒ तप॑सा स॒जोषाः॑ ॥२॥
ma॒nyurindro॑ ma॒nyure॒vāsa॑ de॒vo ma॒nyurhotā॒ varu॑ṇo jā॒tave॑dāḥ | ma॒nyurviśa॑ īḍate॒ mānu॑ṣī॒ryāḥ pā॒hi no॑ manyo॒ tapa॑sā sa॒joṣāḥ॑ || २ ||
अ॒भीऽहि मन्यो त॒वस॒स्तवी॑या॒न् तप॑सा यु॒जा वि ज॑हि॒ शत्रू॑न्।
अ॒मि॒त्र॒हा वृ॑त्र॒हा द॑स्यु॒हा च॒ विश्वा॒ वसू॒न्या भ॑रा॒ त्वं नः॑ ॥३॥
a॒bhī’hi manyo ta॒vasa॒stavī॑yā॒n tapa॑sā yu॒jā vi ja॑hi॒ śatrū॑n | a॒mi॒tra॒hā vṛ॑tra॒hā da॑syu॒hā ca॒ viśvā॒ vasū॒nyā bha॑rā॒ tvaṃ naḥ॑ || ३ ||
त्वं हि म॑न्यो अ॒भिभू॑त्योजाः स्वयं॒भूर्भामो॑ अभिमातिषा॒हः ।
वि॒श्वच॑र्षणिः॒ सहु॑रिः॒ सही॑यान॒स्मास्वोजः॒ पृत॑नासु धेहि ॥४॥
tvaṃ hi ma॑nyo a॒bhibhū॑tyojāḥ svayaṃ॒bhūrbhāmo॑ abhimātiṣā॒haḥ | vi॒śvaca॑rṣaṇiḥ॒ sahu॑riḥ॒ sahī॑yāna॒smāsvojaḥ॒ pṛta॑nāsu dhehi || ४ ||
अ॒भा॒गः सन्नप॒ परे॑तो अस्मि॒ तव॒ क्रत्वा॑ तवि॒षस्य॑ प्रचेतः ।
तं त्वा॑ मन्यो अक्र॒तुर्जि॑हीडा॒हं स्वा त॒नूर्ब॑ल॒दावा॑ न॒ एहि॑ ॥५॥
a॒bhā॒gaḥ sannapa॒ pare॑to asmi॒ tava॒ kratvā॑ tavi॒ṣasya॑ pracetaḥ | taṃ tvā॑ manyo akra॒turji॑hīḍā॒haṃ svā ta॒nūrba॑la॒dāvā॑ na॒ ehi॑ || ५ ||
अ॒यं ते॑ अ॒स्म्युप॑ न॒ एह्य॒र्वाङ् प्र॑तीची॒नः स॑हुरे विश्वदावन्।
मन्यो॑ वज्रिन्न॒भि न॒ आ व॑वृत्स्व॒ हना॑व॒ दस्यूं॑रुत बो॑ध्या॒पेः ॥६॥
a॒yaṃ te॑ a॒smyupa॑ na॒ ehya॒rvāṅ pra॑tīcī॒naḥ sa॑hure viśvadāvan | manyo॑ vajrinna॒bhi na॒ ā va॑vṛtsva॒ hanā॑va॒ dasyūṃ॑ruta bo॑dhyā॒peḥ || ६ ||
अ॒भि प्रेहि॑ दक्षिण॒तो भ॑वा॒ नोऽधा॑ वृ॒त्राणि॑ जङ्घनाव॒ भूरि॑ ।
जु॒होमि॑ ते ध॒रुणं॒ मध्वो॒ अग्र॑मु॒भावु॑पां॒शु प्र॑थ॒मा पि॑बाव ॥७॥
a॒bhi prehi॑ dakṣiṇa॒to bha॑vā॒ no’dhā॑ vṛ॒trāṇi॑ jaṅghanāva॒ bhūri॑ | ju॒homi॑ te dha॒ruṇaṃ॒ madhvo॒ agra॑mu॒bhāvu॑pāṃ॒śu pra॑tha॒mā pi॑bāva || ७ ||