EeseDharmaSanātana Library
31काण्ड 4 · सूक्त 31
Atharvaveda Śaunaka Kand 4, Sukta 31.
7 shlokत्वया॑ मन्यो स॒रथ॑मारु॒जन्तो हर्ष॑माणा हृषि॒तासो॑ मरुत्वन्।
ति॒ग्मेष॑व॒ आयु॑धा सं॒शिशा॑ना॒ उप॒ प्र य॑न्तु॒ नरो॑ अ॒ग्निरू॑पाः ॥१॥
tvayā॑ manyo sa॒ratha॑māru॒janto harṣa॑māṇā hṛṣi॒tāso॑ marutvan | ti॒gmeṣa॑va॒ āyu॑dhā saṃ॒śiśā॑nā॒ upa॒ pra ya॑ntu॒ naro॑ a॒gnirū॑pāḥ || १ ||
अ॒ग्निरि॑व मन्यो त्विषि॒तः स॑हस्व सेना॒नीर्नः॑ सहुरे हू॒त ए॑धि ।
ह॒त्वाय॒ शत्रू॒न् वि भ॑जस्व॒ वेद॒ ओजो॒ मिमा॑नो॒ वि मृधो॑ नुदस्व ॥२॥
a॒gniri॑va manyo tviṣi॒taḥ sa॑hasva senā॒nīrnaḥ॑ sahure hū॒ta e॑dhi | ha॒tvāya॒ śatrū॒n vi bha॑jasva॒ veda॒ ojo॒ mimā॑no॒ vi mṛdho॑ nudasva || २ ||
सह॑स्व मन्यो अ॒भिमा॑तिम॒स्मै रु॒जन् मृ॒णन् प्र॑मृ॒णन् प्रेहि॒ शत्रू॑न्।
उ॒ग्रं ते॒ पाजो॑ न॒न्वा रु॑रुध्रे व॒शी वशं॑ नयासा एकज॒ त्वम् ॥३॥
saha॑sva manyo a॒bhimā॑tima॒smai ru॒jan mṛ॒ṇan pra॑mṛ॒ṇan prehi॒ śatrū॑n | u॒graṃ te॒ pājo॑ na॒nvā ru॑rudhre va॒śī vaśaṃ॑ nayāsā ekaja॒ tvam || ३ ||
एको॑ बहू॒नाम॑सि मन्य ईडि॒ता विशं॑विशं यु॒द्धाय॒ सं शि॑शाधि ।
अकृ॑त्तरु॒क् त्वया॑ यु॒जा व॒यं द्यु॒मन्तं॒ घोषं॑ विज॒याय॑ कृण्मसि ॥४॥
eko॑ bahū॒nāma॑si manya īḍi॒tā viśaṃ॑viśaṃ yu॒ddhāya॒ saṃ śi॑śādhi | akṛ॑ttaru॒k tvayā॑ yu॒jā va॒yaṃ dyu॒mantaṃ॒ ghoṣaṃ॑ vija॒yāya॑ kṛṇmasi || ४ ||
वि॒जे॒ष॒कृदिन्द्र॑ इवानवब्र॒वो॒३ऽस्माकं॑ मन्यो अधि॒पा भ॑वे॒ह।
प्रि॒यं ते॒ नाम॑ सहुरे गृणीमसि वि॒द्मा तमुत्सं॒ यत॑ आब॒भूथ॑ ॥५॥
vi॒je॒ṣa॒kṛdindra॑ ivānavabra॒vo॒३’smākaṃ॑ manyo adhi॒pā bha॑ve॒ha | pri॒yaṃ te॒ nāma॑ sahure gṛṇīmasi vi॒dmā tamutsaṃ॒ yata॑ āba॒bhūtha॑ || ५ ||
आभू॑त्या सह॒जा व॑ज्र सायक॒ सहो॑ बिभर्षि सहभूत॒ उत्त॑रम्।
क्रत्वा॑ नो मन्यो स॒ह मे॒द्येऽधि महाध॒नस्य पुरुहूत सं॒सृजि॑ ॥६॥
ābhū॑tyā saha॒jā va॑jra sāyaka॒ saho॑ bibharṣi sahabhūta॒ utta॑ram | kratvā॑ no manyo sa॒ha me॒dye’dhi mahādha॒nasya puruhūta saṃ॒sṛji॑ || ६ ||
संसृ॑ष्टं धन॑मु॒भयं॑ स॒माकृ॑तम॒स्मभ्यं॑ धत्तां॒ वरु॑णश्च म॒न्युः ।
भियो॒ दधा॑ना॒ हॄदये॑षु॒ शत्र॑वः॒ परा॑जितासो अप॒ नि ल॑यन्ताम् ॥७॥
saṃsṛ॑ṣṭaṃ dhana॑mu॒bhayaṃ॑ sa॒mākṛ॑tama॒smabhyaṃ॑ dhattāṃ॒ varu॑ṇaśca ma॒nyuḥ | bhiyo॒ dadhā॑nā॒ hṝdaye॑ṣu॒ śatra॑vaḥ॒ parā॑jitāso apa॒ ni la॑yantām || ७ ||