EeseDharmaSanātana Library
30काण्ड 4 · सूक्त 30
Atharvaveda Śaunaka Kand 4, Sukta 30.
8 shlokअ॒हं रु॒द्रेभि॒र्वसु॑भिश्चराम्य॒हमा॑दि॒त्यैरु॒त वि॒श्वदे॑वैः ।
अ॒हं मि॒त्रावरु॑णो॒भा बि॑भर्म्य॒हमि॑न्द्रा॒ग्नी अ॒हम॒श्विनो॒भा ॥१॥
a॒haṃ ru॒drebhi॒rvasu॑bhiścarāmya॒hamā॑di॒tyairu॒ta vi॒śvade॑vaiḥ | a॒haṃ mi॒trāvaru॑ṇo॒bhā bi॑bharmya॒hami॑ndrā॒gnī a॒hama॒śvino॒bhā || १ ||
अ॒हं राष्ट्री॑ सं॒गम॑नी॒ वसू॑नां चिकि॒तुषी॑ प्रथ॒मा य॒ज्ञिया॑नाम्।
तां मा॑ दे॒वा व्य॑दधुः पुरु॒त्रा भूरि॑स्थात्रां॒ भूर्या॑वे॒शय॑न्तः ॥२॥
a॒haṃ rāṣṭrī॑ saṃ॒gama॑nī॒ vasū॑nāṃ ciki॒tuṣī॑ pratha॒mā ya॒jñiyā॑nām | tāṃ mā॑ de॒vā vya॑dadhuḥ puru॒trā bhūri॑sthātrāṃ॒ bhūryā॑ve॒śaya॑ntaḥ || २ ||
अ॒हमे॒व स्व॒यमि॒दं व॑दामि॒ जुष्टं॑ दे॒वाना॑मुत मानु॑षाणाम्।
यं का॒मये॒ तन्त॑मु॒ग्रं कृ॑णोमि॒ तं ब्र॒ह्माणं॒ तमृषिं॒ तं सु॑मे॒धाम् ॥३॥
a॒hame॒va sva॒yami॒daṃ va॑dāmi॒ juṣṭaṃ॑ de॒vānā॑muta mānu॑ṣāṇām | yaṃ kā॒maye॒ tanta॑mu॒graṃ kṛ॑ṇomi॒ taṃ bra॒hmāṇaṃ॒ tamṛṣiṃ॒ taṃ su॑me॒dhām || ३ ||
मया॒ सोऽन्न॑मत्ति॒ यो वि॒पश्य॑ति॒ यः प्रा॒णति॒ य ईं शृ॒णोत्यु॒क्तम्।
अ॒म॒न्तवो॒ मां त उप॑ क्षियन्ति श्रु॒धि श्रु॑त श्रु॒द्धेयं॑ ते वदामि ॥४॥
mayā॒ so’nna॑matti॒ yo vi॒paśya॑ti॒ yaḥ prā॒ṇati॒ ya īṃ śṛ॒ṇotyu॒ktam | a॒ma॒ntavo॒ māṃ ta upa॑ kṣiyanti śru॒dhi śru॑ta śru॒ddheyaṃ॑ te vadāmi || ४ ||
अ॒हं रु॒द्राय॒ धनु॒रा त॑नोमि ब्रह्म॒द्विषे॒ शर॑वे॒ हन्त॒वा उ॑ ।
अ॒हं जना॑य स॒मदं॑ कृणोम्य॒हं॑ द्यावा॑पृथि॒वी आ वि॑वेश ॥५॥
a॒haṃ ru॒drāya॒ dhanu॒rā ta॑nomi brahma॒dviṣe॒ śara॑ve॒ hanta॒vā u॑ | a॒haṃ janā॑ya sa॒madaṃ॑ kṛṇomya॒haṃ॑ dyāvā॑pṛthi॒vī ā vi॑veśa || ५ ||
अ॒हं सोम॑माह॒नसं॑ बिभर्म्य॒हं त्वष्टा॑रमु॒त पू॒षणं॒ भग॑म्।
अ॒हं द॑धामि॒ द्रवि॑णा ह॒विष्म॑ते सुप्रा॒व्या॒३ यज॑मानाय सुन्व॒ते ॥६॥
a॒haṃ soma॑māha॒nasaṃ॑ bibharmya॒haṃ tvaṣṭā॑ramu॒ta pū॒ṣaṇaṃ॒ bhaga॑m | a॒haṃ da॑dhāmi॒ dravi॑ṇā ha॒viṣma॑te suprā॒vyā॒३ yaja॑mānāya sunva॒te || ६ ||
अ॒हं सु॑वे पि॒तर॑मस्य मू॒र्धन् मम॒ योनि॑र॒प्स्व॑१न्तः स॑मु॒द्रे।
ततो॒ वि ति॑ष्ठे॒ भुव॑नानि॒ विश्वो॒तामूं द्यां व॒र्ष्मणोप॑ स्पृशामि ॥७॥
a॒haṃ su॑ve pi॒tara॑masya mū॒rdhan mama॒ yoni॑ra॒psva॑१ntaḥ sa॑mu॒dre | tato॒ vi ti॑ṣṭhe॒ bhuva॑nāni॒ viśvo॒tāmūṃ dyāṃ va॒rṣmaṇopa॑ spṛśāmi || ७ ||
अ॒हमे॒व वात॑ इव॒ प्र वा॑म्या॒रभ॑माणा॒ भुव॑नानि॒ विश्वा॑ ।
प॒रो दि॒वा प॒र ए॒ना पृ॑थि॒व्यौताव॑ती महि॒म्ना सं ब॑भूव ॥८॥
a॒hame॒va vāta॑ iva॒ pra vā॑myā॒rabha॑māṇā॒ bhuva॑nāni॒ viśvā॑ | pa॒ro di॒vā pa॒ra e॒nā pṛ॑thi॒vyautāva॑tī mahi॒mnā saṃ ba॑bhūva || ८ ||