EeseDharmaSanātana Library
3काण्ड 4 · सूक्त 3
Atharvaveda Śaunaka Kand 4, Sukta 3.
7 shlokउदि॒तस्त्रयो॑ अक्रमन् व्या॒घ्रः पुरु॑षो॒ वृकः॑ ।
हिरु॒ग्घि यन्ति॒ सिन्ध॑वो॒ हिरु॑ग् दे॒वो वन॒स्पति॒र्हिरु॑ङ्नमन्तु॒ शत्र॑वः ॥१॥
udi॒tastrayo॑ akraman vyā॒ghraḥ puru॑ṣo॒ vṛkaḥ॑ | hiru॒gghi yanti॒ sindha॑vo॒ hiru॑g de॒vo vana॒spati॒rhiru॑ṅnamantu॒ śatra॑vaḥ || १ ||
परे॑णैतु प॒था वृकः॑ पर॒मेणो॒त तस्क॑रः ।
परे॑ण द॒त्वती॒ रज्जुः॒ परे॑णाघा॒युर॑र्षतु ॥२॥
pare॑ṇaitu pa॒thā vṛkaḥ॑ para॒meṇo॒ta taska॑raḥ | pare॑ṇa da॒tvatī॒ rajjuḥ॒ pare॑ṇāghā॒yura॑rṣatu || २ ||
अ॒क्ष्यौऽच ते॒ मुखं॑ च ते व्याघ्र जम्भयामसि ।
आत् सर्वा॑न् विंश॒तिं न॒खान् ॥३॥
a॒kṣyau’ca te॒ mukhaṃ॑ ca te vyāghra jambhayāmasi | āt sarvā॑n viṃśa॒tiṃ na॒khān || ३ ||
व्या॒घ्रं द॒त्वतां॑ व॒यं प्र॑थ॒मं ज॑म्भयामसि ।
आदु॑ ष्टे॒नमथो॒ अहिं॑ यातु॒धान॒मथो॒ वृक॑म् ॥४॥
vyā॒ghraṃ da॒tvatāṃ॑ va॒yaṃ pra॑tha॒maṃ ja॑mbhayāmasi | ādu॑ ṣṭe॒namatho॒ ahiṃ॑ yātu॒dhāna॒matho॒ vṛka॑m || ४ ||
यो अ॒द्य स्ते॒न आय॑ति॒ स संपि॑ष्टो॒ अपा॑यति ।
प॒थाम॑पध्वं॒सेनै॒त्विन्द्रो॒ वज्रे॑ण हन्तु॒ तम् ॥५॥
yo a॒dya ste॒na āya॑ti॒ sa saṃpi॑ṣṭo॒ apā॑yati | pa॒thāma॑padhvaṃ॒senai॒tvindro॒ vajre॑ṇa hantu॒ tam || ५ ||
मू॒र्णा मृ॒गस्य॒ दन्ता॒ अपि॑शीर्णा उ पृ॒ष्टयः॑ ।
नि॒म्रुक्ते॑ गो॒धा भ॑वतु नी॒चाय॑च्छश॒युर्मृ॒गः ॥६॥
mū॒rṇā mṛ॒gasya॒ dantā॒ api॑śīrṇā u pṛ॒ṣṭayaḥ॑ | ni॒mrukte॑ go॒dhā bha॑vatu nī॒cāya॑cchaśa॒yurmṛ॒gaḥ || ६ ||
यत् सं॒यमो॒ न वि य॑मो॒ वि य॑मो॒ यन्न सं॒यमः॑ ।
इ॒न्द्र॒जाः सो॑म॒जा आ॑थर्व॒णम॑सि व्याघ्र॒जम्भ॑नम् ॥७॥
yat saṃ॒yamo॒ na vi ya॑mo॒ vi ya॑mo॒ yanna saṃ॒yamaḥ॑ | i॒ndra॒jāḥ so॑ma॒jā ā॑tharva॒ṇama॑si vyāghra॒jambha॑nam || ७ ||