EeseDharmaSanātana Library
29काण्ड 4 · सूक्त 29
Atharvaveda Śaunaka Kand 4, Sukta 29.
7 shlokम॒न्वे वां॑ मित्रावरुणावृतावृधौ॒ सचे॑तसौ॒ द्रुह्व॑णो॒ यौ नु॒देथे॑ ।
प्र स॒त्यावा॑न॒मव॑थो॒ भरे॑षु॒ तौ नो॑ मुञ्चत॒मंह॑सः ॥१॥
ma॒nve vāṃ॑ mitrāvaruṇāvṛtāvṛdhau॒ sace॑tasau॒ druhva॑ṇo॒ yau nu॒dethe॑ | pra sa॒tyāvā॑na॒mava॑tho॒ bhare॑ṣu॒ tau no॑ muñcata॒maṃha॑saḥ || १ ||
सचे॑तसौ॒ द्रुह्व॑णो॒ यौ नु॒देथे॒ प्र स॒त्यावा॑न॒मव॑थो॒ भरे॑षु ।
यौ गच्छ॑थो नृ॒चक्ष॑सौ ब॒भ्रुणा॑ सु॒तं तौ नो॑ मुञ्चत॒मंह॑सः ॥२॥
sace॑tasau॒ druhva॑ṇo॒ yau nu॒dethe॒ pra sa॒tyāvā॑na॒mava॑tho॒ bhare॑ṣu | yau gaccha॑tho nṛ॒cakṣa॑sau ba॒bhruṇā॑ su॒taṃ tau no॑ muñcata॒maṃha॑saḥ || २ ||
यावङ्गि॑रस॒मव॑थो॒ याव॒गस्तिं॒ मित्रा॑वरुणा ज॒मद॑ग्नि॒मत्रिम्।
यौ क॒श्यप॒मव॑थो॒ यौ वसि॑ष्ठं॒ तौ नो॑ मुञ्चत॒मंह॑सः ॥३॥
yāvaṅgi॑rasa॒mava॑tho॒ yāva॒gastiṃ॒ mitrā॑varuṇā ja॒mada॑gni॒matrim | yau ka॒śyapa॒mava॑tho॒ yau vasi॑ṣṭhaṃ॒ tau no॑ muñcata॒maṃha॑saḥ || ३ ||
यौ श्या॒वाश्व॒मव॑थो वाध्र्य॒श्वं मित्रा॑वरुणा पुरुमी॒ढमत्रिम्।
यौ वि॑म॒दमव॑थः स॒प्तव॑ध्रिं॒ तौ नो॑ मुञ्चत॒मंह॑सः ॥४॥
yau śyā॒vāśva॒mava॑tho vādhrya॒śvaṃ mitrā॑varuṇā purumī॒ḍhamatrim | yau vi॑ma॒damava॑thaḥ sa॒ptava॑dhriṃ॒ tau no॑ muñcata॒maṃha॑saḥ || ४ ||
यो भ॒रद्वा॑जमव॑थो॒ यौ ग॒विष्ठि॑रं वि॒श्वामि॑त्रं वरुण मित्र॒ कुत्स॑म्।
यौ क॒क्षीव॑न्त॒मव॑थः प्रोत कण्वं॒ तौ नो॑ मुञ्चत॒मंह॑सः ॥५॥
yo bha॒radvā॑jamava॑tho॒ yau ga॒viṣṭhi॑raṃ vi॒śvāmi॑traṃ varuṇa mitra॒ kutsa॑m | yau ka॒kṣīva॑nta॒mava॑thaḥ prota kaṇvaṃ॒ tau no॑ muñcata॒maṃha॑saḥ || ५ ||
यौ मेधा॑तिथि॒मव॑थो॒ यौ त्रि॒शोकं॒ मित्रा॑वरुणावु॒शनां॑ का॒व्यं यौ।
यौ गोत॑म॒मव॑थः प्रोत मुद्ग॑लं तौ नो॑ मुञ्चत॒मंह॑सः ॥६॥
yau medhā॑tithi॒mava॑tho॒ yau tri॒śokaṃ॒ mitrā॑varuṇāvu॒śanāṃ॑ kā॒vyaṃ yau | yau gota॑ma॒mava॑thaḥ prota mudga॑laṃ tau no॑ muñcata॒maṃha॑saḥ || ६ ||
ययो॒ रथः॑ स॒त्यव॑र्त्म॒र्जुर॑श्मिर्मिथु॒या चर॑न्तमभि॒याति॑ दू॒षय॑न्।
स्तौमि॑ मि॒त्रावरु॑णौ नाथि॒तो जो॑हवीमि॒ तौ नो॑ मुञ्चत॒मंह॑सः ॥७॥
yayo॒ rathaḥ॑ sa॒tyava॑rtma॒rjura॑śmirmithu॒yā cara॑ntamabhi॒yāti॑ dū॒ṣaya॑n | staumi॑ mi॒trāvaru॑ṇau nāthi॒to jo॑havīmi॒ tau no॑ muñcata॒maṃha॑saḥ || ७ ||