EeseDharmaSanātana Library
27काण्ड 4 · सूक्त 27
Atharvaveda Śaunaka Kand 4, Sukta 27.
7 shlokम॒रुतां॑ मन्वे॒ अधि॑ मे ब्रुवन्तु॒ प्रेमं वाजं॒ वाज॑साते अवन्तु ।
आ॒शूनि॑व सु॒यमा॑नह्व ऊ॒तये॑ ते नो॑ मुञ्च॒न्त्वंह॑सः ॥१॥
ma॒rutāṃ॑ manve॒ adhi॑ me bruvantu॒ premaṃ vājaṃ॒ vāja॑sāte avantu | ā॒śūni॑va su॒yamā॑nahva ū॒taye॑ te no॑ muñca॒ntvaṃha॑saḥ || १ ||
उत्स॒मक्षि॑तं॒ व्यच॑न्ति॒ ये सदा॒ य आ॑सि॒ञ्चन्ति॒ रस॒मोष॑धीषु ।
पु॒रो द॑धे मरुतः॒ पृश्नि॑मातृंस्ते नो॑ मुञ्च॒न्त्वंह॑सः ॥२॥
utsa॒makṣi॑taṃ॒ vyaca॑nti॒ ye sadā॒ ya ā॑si॒ñcanti॒ rasa॒moṣa॑dhīṣu | pu॒ro da॑dhe marutaḥ॒ pṛśni॑mātṛṃste no॑ muñca॒ntvaṃha॑saḥ || २ ||
पयो॑ धेनू॒नां रस॒मोष॑धीनां ज॒वमर्व॑तां कवयो॒ य इन्व॑थ ।
श॒ग्मा भ॑वन्तु म॒रुतो॑ नः स्यो॒नास्ते नो॑ मुञ्च॒न्त्वंह॑सः ॥३॥
payo॑ dhenū॒nāṃ rasa॒moṣa॑dhīnāṃ ja॒vamarva॑tāṃ kavayo॒ ya inva॑tha | śa॒gmā bha॑vantu ma॒ruto॑ naḥ syo॒nāste no॑ muñca॒ntvaṃha॑saḥ || ३ ||
अ॒पः स॑मु॒द्राद् दिव॒मुद् व॑हन्ति दि॒वस्पृ॑थि॒वीम॒भि ये सृ॒जन्ति॑ ।
ये अ॒द्भिरीशा॑ना म॒रुत॒श्चर॑न्ति ते नो॑ मुञ्च॒न्त्वंह॑सः ॥४॥
a॒paḥ sa॑mu॒drād diva॒mud va॑hanti di॒vaspṛ॑thi॒vīma॒bhi ye sṛ॒janti॑ | ye a॒dbhirīśā॑nā ma॒ruta॒ścara॑nti te no॑ muñca॒ntvaṃha॑saḥ || ४ ||
ये की॒लाले॑न त॒र्पय॑न्ति ये घृ॒तेन॒ ये वा॒ वयो॒ मेद॑सा संसृ॒जन्ति॑ ।
ये अ॒द्भिरीशा॑ना म॒रुतो॑ व॒र्षय॑न्ति॒ ते नो॑ मुञ्च॒न्त्वंह॑सः ॥५॥
ye kī॒lāle॑na ta॒rpaya॑nti ye ghṛ॒tena॒ ye vā॒ vayo॒ meda॑sā saṃsṛ॒janti॑ | ye a॒dbhirīśā॑nā ma॒ruto॑ va॒rṣaya॑nti॒ te no॑ muñca॒ntvaṃha॑saḥ || ५ ||
यदीदि॒दं मरु॑तो॒ मारु॑तेन॒ यदि॑ देवा॒ दैव्ये॑ने॒दृगार॑ ।
यू॒यमी॑शिध्वे वसव॒स्तस्य॒ निष्कृ॑ते॒स्ते नो॑ मुञ्च॒न्त्वंह॑सः ॥६॥
yadīdi॒daṃ maru॑to॒ māru॑tena॒ yadi॑ devā॒ daivye॑ne॒dṛgāra॑ | yū॒yamī॑śidhve vasava॒stasya॒ niṣkṛ॑te॒ste no॑ muñca॒ntvaṃha॑saḥ || ६ ||
ति॒ग्ममनी॑कं विदि॒तं सह॑स्व॒न्मारु॑तं॒ शर्धः॒ पृत॑नासू॒ग्रम्।
स्तौमि॑ म॒रुतो॑ नाथि॒तो जो॑हवीमि॒ ते नो॑ मुञ्च॒न्त्वंह॑सः ॥७॥
ti॒gmamanī॑kaṃ vidi॒taṃ saha॑sva॒nmāru॑taṃ॒ śardhaḥ॒ pṛta॑nāsū॒gram | staumi॑ ma॒ruto॑ nāthi॒to jo॑havīmi॒ te no॑ muñca॒ntvaṃha॑saḥ || ७ ||