EeseDharmaSanātana Library
26काण्ड 4 · सूक्त 26
Atharvaveda Śaunaka Kand 4, Sukta 26.
7 shlokम॒न्वे वां॑ द्यावापृथिवी सुभोजसौ॒ सचे॑तसौ॒ ये अप्र॑थेथा॒ममि॑ता॒ योज॑नानि ।
प्र॒ति॒ष्ठे ह्यभ॑वतं॒ वसू॑नां॒ ते नो॑ मुञ्चत॒मंह॑सः ॥१॥
ma॒nve vāṃ॑ dyāvāpṛthivī subhojasau॒ sace॑tasau॒ ye apra॑thethā॒mami॑tā॒ yoja॑nāni | pra॒ti॒ṣṭhe hyabha॑vataṃ॒ vasū॑nāṃ॒ te no॑ muñcata॒maṃha॑saḥ || १ ||
प्र॒ति॒ष्ठे ह्यभ॑वत॒ वसू॑नां॒ प्रवृ॑द्धे देवी सुभगे उरूची ।
द्यावा॑पृथिवी॒ भव॑तं मे स्यो॒ने ते नो॑ मुञ्चत॒मंह॑सः ॥२॥
pra॒ti॒ṣṭhe hyabha॑vata॒ vasū॑nāṃ॒ pravṛ॑ddhe devī subhage urūcī | dyāvā॑pṛthivī॒ bhava॑taṃ me syo॒ne te no॑ muñcata॒maṃha॑saḥ || २ ||
अ॒स॒न्ता॒पे सु॒तप॑सौ हुवे॒ऽहमु॒र्वी ग॑म्भी॒रे क॒विभि॑र्नम॒स्येऽ।
द्यावा॑पृथिवी॒ भव॑तं मे स्यो॒ने ते नो॑ मुञ्चत॒मंह॑सः ॥३॥
a॒sa॒ntā॒pe su॒tapa॑sau huve॒’hamu॒rvī ga॑mbhī॒re ka॒vibhi॑rnama॒sye’ | dyāvā॑pṛthivī॒ bhava॑taṃ me syo॒ne te no॑ muñcata॒maṃha॑saḥ || ३ ||
ये अ॒मृतं॑ बिभृ॒थो ये ह॒वींषि॒ ये स्रो॒त्या बि॑भृ॒थो ये म॑नु॒ष्याऽन्।
द्यावा॑पृथिवी॒ भव॑तं मे स्यो॒ने ते नो॑ मुञ्चत॒मंह॑सः ॥४॥
ye a॒mṛtaṃ॑ bibhṛ॒tho ye ha॒vīṃṣi॒ ye sro॒tyā bi॑bhṛ॒tho ye ma॑nu॒ṣyā’n | dyāvā॑pṛthivī॒ bhava॑taṃ me syo॒ne te no॑ muñcata॒maṃha॑saḥ || ४ ||
ये उ॒स्रिया॒ बिभृ॒थो ये वन॒स्पती॒न् ययो॑र्वां॒ विश्वा॒ भुव॑नान्य॒न्तः ।
द्यावा॑पृथिवी॒ भव॑तं मे स्यो॒ने ते नो॑ मुञ्चत॒मंह॑सः ॥५॥
ye u॒sriyā॒ bibhṛ॒tho ye vana॒spatī॒n yayo॑rvāṃ॒ viśvā॒ bhuva॑nānya॒ntaḥ | dyāvā॑pṛthivī॒ bhava॑taṃ me syo॒ne te no॑ muñcata॒maṃha॑saḥ || ५ ||
ये की॒लाले॑न त॒र्पय॑थो॒ ये घृ॒तेन॒ याभ्या॑मृ॒ते न किं च॒न श॑क्नु॒वन्ति ।
द्यावा॑पृथिवी॒ भव॑तं मे स्यो॒ने ते नो॑ मुञ्चत॒मंह॑सः ॥६॥
ye kī॒lāle॑na ta॒rpaya॑tho॒ ye ghṛ॒tena॒ yābhyā॑mṛ॒te na kiṃ ca॒na śa॑knu॒vanti | dyāvā॑pṛthivī॒ bhava॑taṃ me syo॒ne te no॑ muñcata॒maṃha॑saḥ || ६ ||
यन्मे॒दम॑भि॒शोच॑ति॒ येन॑येन वा कृ॒तं पौरु॑षेया॒न्न दैवा॑त्।
स्तौमि॒ द्यावा॑पृथि॒वी ना॑थि॒तो जो॑हवीमि॒ ते नो॑ मुञ्चत॒मंह॑सः ॥७॥
yanme॒dama॑bhi॒śoca॑ti॒ yena॑yena vā kṛ॒taṃ pauru॑ṣeyā॒nna daivā॑t | staumi॒ dyāvā॑pṛthi॒vī nā॑thi॒to jo॑havīmi॒ te no॑ muñcata॒maṃha॑saḥ || ७ ||