EeseDharmaSanātana Library
25काण्ड 4 · सूक्त 25
Atharvaveda Śaunaka Kand 4, Sukta 25.
7 shlokवा॒योः स॑वि॒तुर्वि॒दथा॑नि मन्महे॒ यावा॑त्म॒न्वद् वि॒शथो॒ यौ च॒ रक्ष॑थः ।
यौ विश्व॑स्य परि॒भू ब॑भू॒वथु॒स्तौ नो॑ मुञ्चत॒मंह॑सः ॥१॥
vā॒yoḥ sa॑vi॒turvi॒dathā॑ni manmahe॒ yāvā॑tma॒nvad vi॒śatho॒ yau ca॒ rakṣa॑thaḥ | yau viśva॑sya pari॒bhū ba॑bhū॒vathu॒stau no॑ muñcata॒maṃha॑saḥ || १ ||
ययोः॒ संख्या॑ता॒ वरि॑मा॒ पार्थि॑वानि॒ याभ्यां॒ रजो॑ युपि॒तम॒न्तरि॑क्षे ।
ययोः॑ प्रा॒यं नान्वा॑न॒शे कश्च॒न तौ नो॑ मुञ्चत॒मंह॑सः ॥२॥
yayoḥ॒ saṃkhyā॑tā॒ vari॑mā॒ pārthi॑vāni॒ yābhyāṃ॒ rajo॑ yupi॒tama॒ntari॑kṣe | yayoḥ॑ prā॒yaṃ nānvā॑na॒śe kaśca॒na tau no॑ muñcata॒maṃha॑saḥ || २ ||
तव॑ व्र॒ते नि वि॑शन्ते॒ जना॑स॒स्त्वय्युदि॑ते॒ प्रेर॑ते चित्रभानो ।
यु॒वं वा॑यो सवि॒ता च॒ भुव॑नानि रक्षथ॒स्तौ नो॑ मुञ्चत॒मंह॑सः ॥३॥
tava॑ vra॒te ni vi॑śante॒ janā॑sa॒stvayyudi॑te॒ prera॑te citrabhāno | yu॒vaṃ vā॑yo savi॒tā ca॒ bhuva॑nāni rakṣatha॒stau no॑ muñcata॒maṃha॑saḥ || ३ ||
अपे॒तो वा॑यो सवि॒ता च॑ दुष्कृ॒तमप॒ रक्षां॑सि॒ शिमि॑दां च सेधतम्।
सं ह्यू॒३र्जया॑ सृ॒जथः॒ सं बले॑न॒ तौ नो॑ मुञ्चत॒मंह॑सः ॥४॥
ape॒to vā॑yo savi॒tā ca॑ duṣkṛ॒tamapa॒ rakṣāṃ॑si॒ śimi॑dāṃ ca sedhatam | saṃ hyū॒३rjayā॑ sṛ॒jathaḥ॒ saṃ bale॑na॒ tau no॑ muñcata॒maṃha॑saḥ || ४ ||
र॒यिं मे॒ पोषं॑ सवि॒तोत वा॒युस्त॒नू दक्ष॒मा सु॑वतां सु॒शेव॑म्।
अ॒य॒क्ष्मता॑तिं॒ मह॑ इ॒ह ध॑त्तं॒ तौ नो॑ मुञ्चत॒मंह॑सः ॥५॥
ra॒yiṃ me॒ poṣaṃ॑ savi॒tota vā॒yusta॒nū dakṣa॒mā su॑vatāṃ su॒śeva॑m | a॒ya॒kṣmatā॑tiṃ॒ maha॑ i॒ha dha॑ttaṃ॒ tau no॑ muñcata॒maṃha॑saḥ || ५ ||
प्र सु॑म॒तिं स॑वितर्वाय ऊ॒तये॒ मह॑स्वन्तं मत्स॒रं मा॑दयाथः ।
अ॒र्वाग् वा॒मस्य॑ प्र॒वतो॒ नि य॑च्छतं॒ तौ नो॑ मुञ्चत॒मंह॑सः ॥६॥
pra su॑ma॒tiṃ sa॑vitarvāya ū॒taye॒ maha॑svantaṃ matsa॒raṃ mā॑dayāthaḥ | a॒rvāg vā॒masya॑ pra॒vato॒ ni ya॑cchataṃ॒ tau no॑ muñcata॒maṃha॑saḥ || ६ ||
उप॒ श्रेष्ठा॑ न आ॒शिषो॑ दे॒वयो॒र्धाम॑न्नस्थिरन्।
स्तौमि॑ दे॒वं स॑वि॒तारं॑ च वा॒युं तौ नो॑ मुञ्चत॒मंह॑सः ॥७॥
upa॒ śreṣṭhā॑ na ā॒śiṣo॑ de॒vayo॒rdhāma॑nnasthiran | staumi॑ de॒vaṃ sa॑vi॒tāraṃ॑ ca vā॒yuṃ tau no॑ muñcata॒maṃha॑saḥ || ७ ||