EeseDharmaSanātana Library
24काण्ड 4 · सूक्त 24
Atharvaveda Śaunaka Kand 4, Sukta 24.
7 shlokइन्द्र॑स्य मन्महे॒ शश्व॒दिद॑स्य मन्महे वृत्र॒घ्न स्तोमा॒ उप॑ मे॒म आगुः॑ ।
यो दा॒शुषः॑ सु॒कृतो॒ हव॒मेति॒ स नो॑ मुञ्च॒त्वंह॑सः ॥१॥
indra॑sya manmahe॒ śaśva॒dida॑sya manmahe vṛtra॒ghna stomā॒ upa॑ me॒ma āguḥ॑ | yo dā॒śuṣaḥ॑ su॒kṛto॒ hava॒meti॒ sa no॑ muñca॒tvaṃha॑saḥ || १ ||
य उ॒ग्रीणा॑मु॒ग्रबा॑हुर्य॒युर्यो दा॑न॒वानां॒ बल॑मारु॒रोज॑ ।
येन॑ जि॒ताः सिन्ध॑वो॒ येन॒ गावः॒ स नो॑ मुञ्च॒त्वंह॑सः ॥२॥
ya u॒grīṇā॑mu॒grabā॑hurya॒yuryo dā॑na॒vānāṃ॒ bala॑māru॒roja॑ | yena॑ ji॒tāḥ sindha॑vo॒ yena॒ gāvaḥ॒ sa no॑ muñca॒tvaṃha॑saḥ || २ ||
यश्च॑र्षणि॒प्रो वृ॑ष॒भः स्व॒र्विद् यस्मै॒ ग्रावा॑णः प्र॒वद॑न्ति नृ॒म्णम्।
यस्या॑ध्व॒रः स॒प्तहो॑ता॒ मदि॑ष्ठः॒ स नो॑ मुञ्च॒त्वंह॑सः ॥३॥
yaśca॑rṣaṇi॒pro vṛ॑ṣa॒bhaḥ sva॒rvid yasmai॒ grāvā॑ṇaḥ pra॒vada॑nti nṛ॒mṇam | yasyā॑dhva॒raḥ sa॒ptaho॑tā॒ madi॑ṣṭhaḥ॒ sa no॑ muñca॒tvaṃha॑saḥ || ३ ||
यस्य॑ व॒शास॑ ऋष॒भास॑ उ॒क्षणो॒ यस्मै॑ मी॒यन्ते॒ स्व॒र॑वः स्व॒र्विदे॑ ।
यस्मै॑ शु॒क्रः पव॑ते॒ ब्रह्म॑शुम्भितः॒ स नो॑ मुञ्च॒त्वंह॑सः ॥४॥
yasya॑ va॒śāsa॑ ṛṣa॒bhāsa॑ u॒kṣaṇo॒ yasmai॑ mī॒yante॒ sva॒ra॑vaḥ sva॒rvide॑ | yasmai॑ śu॒kraḥ pava॑te॒ brahma॑śumbhitaḥ॒ sa no॑ muñca॒tvaṃha॑saḥ || ४ ||
यस्य॒ जुष्टिं॑ सो॒मिनः॑ का॒मय॑न्ते॒ यं हव॑न्त॒ इषु॑मन्तं॒ गवि॑ष्टौ ।
यस्मि॑न्न॒र्कः शि॑श्रि॒ये यस्मि॒न्नोजः॒ स नो॑ मुञ्च॒त्वंह॑सः ॥५॥
yasya॒ juṣṭiṃ॑ so॒minaḥ॑ kā॒maya॑nte॒ yaṃ hava॑nta॒ iṣu॑mantaṃ॒ gavi॑ṣṭau | yasmi॑nna॒rkaḥ śi॑śri॒ye yasmi॒nnojaḥ॒ sa no॑ muñca॒tvaṃha॑saḥ || ५ ||
यः प्र॑थ॒मः क॑र्म॒कृत्या॑य ज॒ज्ञे यस्य॑ वी॒र्यंऽ प्रथ॒मस्यानु॑बुद्धम्।
येनोद्य॑तो॒ वज्रो॒ऽभ्याय॒ताहिं॒ स नो॑ मुञ्च॒त्वंह॑सः ॥६॥
yaḥ pra॑tha॒maḥ ka॑rma॒kṛtyā॑ya ja॒jñe yasya॑ vī॒ryaṃ’ pratha॒masyānu॑buddham | yenodya॑to॒ vajro॒’bhyāya॒tāhiṃ॒ sa no॑ muñca॒tvaṃha॑saḥ || ६ ||
यः सं॑ग्रा॒मान्नय॑ति॒ सं यु॒धे व॒शी यः पु॒ष्टानि॑ संसृ॒जति॑ द्व॒यानि॑ ।
स्तौमीन्द्रं॑ नाथि॒तो जो॑हवीमि॒ स नो॑ मुञ्च॒त्वंह॑सः ॥७॥
yaḥ saṃ॑grā॒mānnaya॑ti॒ saṃ yu॒dhe va॒śī yaḥ pu॒ṣṭāni॑ saṃsṛ॒jati॑ dva॒yāni॑ | staumīndraṃ॑ nāthi॒to jo॑havīmi॒ sa no॑ muñca॒tvaṃha॑saḥ || ७ ||