EeseDharmaSanātana Library
23काण्ड 4 · सूक्त 23
Atharvaveda Śaunaka Kand 4, Sukta 23.
7 shlokअ॒ग्नेर्म॑न्वे प्रथ॒मस्य॒ प्रचे॑तसः॒ पाञ्च॑जन्यस्य बहु॒धा यमि॒न्धते॑ ।
विशो॑ विशः प्रविशि॒वांस॑मीमहे॒ स नो मुञ्च॒त्वंह॑सः ॥१॥
a॒gnerma॑nve pratha॒masya॒ prace॑tasaḥ॒ pāñca॑janyasya bahu॒dhā yami॒ndhate॑ | viśo॑ viśaḥ praviśi॒vāṃsa॑mīmahe॒ sa no muñca॒tvaṃha॑saḥ || १ ||
यथा॑ ह॒व्यं वह॑सि जातवेदो॒ यथा॑ य॒ज्ञं क॒ल्पय॑सि प्रजा॒नन्।
ए॒वा दे॒वेभ्यः॑ सुम॒तिं न॒ आ व॑ह॒ स नो॑ मुञ्च॒त्वंह॑सः ॥२॥
yathā॑ ha॒vyaṃ vaha॑si jātavedo॒ yathā॑ ya॒jñaṃ ka॒lpaya॑si prajā॒nan | e॒vā de॒vebhyaḥ॑ suma॒tiṃ na॒ ā va॑ha॒ sa no॑ muñca॒tvaṃha॑saḥ || २ ||
याम॑न्याम॒न्नुप॑युक्तं॒ वहि॑ष्ठं॒ कर्म॑न्कर्म॒न्नाभ॑गम् ।
अ॒ग्निमी॑डे र॒क्षो॒हणं॑ यज्ञ॒वॄधं॑ घृ॒ताहु॑तं॒ स नो॑ मुञ्च॒त्वंह॑सः ॥३॥
yāma॑nyāma॒nnupa॑yuktaṃ॒ vahi॑ṣṭhaṃ॒ karma॑nkarma॒nnābha॑gam | a॒gnimī॑ḍe ra॒kṣo॒haṇaṃ॑ yajña॒vṝdhaṃ॑ ghṛ॒tāhu॑taṃ॒ sa no॑ muñca॒tvaṃha॑saḥ || ३ ||
सुजा॑तं जा॒तवे॑दसम॒ग्निं वै॑श्वान॒रं वि॒भुम्।
ह॒व्य॒वाहं॑ हवामहे॒ स नो॑ मुञ्च॒त्वंह॑सः ॥४॥
sujā॑taṃ jā॒tave॑dasama॒gniṃ vai॑śvāna॒raṃ vi॒bhum | ha॒vya॒vāhaṃ॑ havāmahe॒ sa no॑ muñca॒tvaṃha॑saḥ || ४ ||
येन॒ ऋष॑यो ब॒लमद्यो॑तयन् यु॒जा येनासु॑राणा॒मयु॑वन्त मा॒याः ।
येना॒ग्निना॑ प॒णीनिन्द्रो॑ जि॒गाय॒ स नो॑ मुञ्च॒त्वंह॑सः ॥५॥
yena॒ ṛṣa॑yo ba॒lamadyo॑tayan yu॒jā yenāsu॑rāṇā॒mayu॑vanta mā॒yāḥ | yenā॒gninā॑ pa॒ṇīnindro॑ ji॒gāya॒ sa no॑ muñca॒tvaṃha॑saḥ || ५ ||
येन॑ दे॒वा अ॒मृत॑म॒न्ववि॑न्द॒न् येनौष॑धी॒र्मधु॑मती॒रकृण्वन्।
येन॑ दे॒वाः स्व॑१राभ॑र॒न्त्स नो॑ मुञ्च॒त्वंह॑सः ॥६॥
yena॑ de॒vā a॒mṛta॑ma॒nvavi॑nda॒n yenauṣa॑dhī॒rmadhu॑matī॒rakṛṇvan | yena॑ de॒vāḥ sva॑१rābha॑ra॒ntsa no॑ muñca॒tvaṃha॑saḥ || ६ ||
यस्ये॒दं प्र॒दिशि॒ यद् वि॒रोच॑ते॒ यज्जा॒तं ज॑नित॒व्यंऽ च॒ केव॑लम्।
स्तौम्य॒ग्निं ना॑थि॒तो जो॑हवीमि॒ स नो॑ मुञ्च॒त्वंह॑सः ॥७॥
yasye॒daṃ pra॒diśi॒ yad vi॒roca॑te॒ yajjā॒taṃ ja॑nita॒vyaṃ’ ca॒ keva॑lam | staumya॒gniṃ nā॑thi॒to jo॑havīmi॒ sa no॑ muñca॒tvaṃha॑saḥ || ७ ||