EeseDharmaSanātana Library
22काण्ड 4 · सूक्त 22
Atharvaveda Śaunaka Kand 4, Sukta 22.
7 shlokइ॒ममि॑न्द्र वर्धय क्ष॒त्रियं॑ म इ॒मं वि॒शामे॑क वृ॒षं कृ॑णु॒ त्वम्।
निर॒मित्रा॑नक्ष्णुह्यस्य॒ सर्वां॒स्तान् र॑न्धयास्मा अहमुत्त॒रेषु॑ ॥१॥
i॒mami॑ndra vardhaya kṣa॒triyaṃ॑ ma i॒maṃ vi॒śāme॑ka vṛ॒ṣaṃ kṛ॑ṇu॒ tvam | nira॒mitrā॑nakṣṇuhyasya॒ sarvāṃ॒stān ra॑ndhayāsmā ahamutta॒reṣu॑ || १ ||
एमं भ॑ज॒ ग्रामे॒ अश्वे॑षु॒ गोषु॒ निष्टं भ॑ज॒ यो अ॒मित्रो॑ अ॒स्य।
वर्ष्म॑ क्ष॒त्राणा॑म॒यम॑स्तु॒ राजेन्द्र॒ शत्रुं॑ रन्धय॒ सर्व॑म॒स्मै ॥२॥
emaṃ bha॑ja॒ grāme॒ aśve॑ṣu॒ goṣu॒ niṣṭaṃ bha॑ja॒ yo a॒mitro॑ a॒sya | varṣma॑ kṣa॒trāṇā॑ma॒yama॑stu॒ rājendra॒ śatruṃ॑ randhaya॒ sarva॑ma॒smai || २ ||
अ॒यम॑स्तु धन॑पति॒र्धना॑नाम॒यं वि॒शां वि॒श्पति॑रस्तु॒ राजा॑ ।
अ॒स्मिन्नि॑न्द्र॒ महि॒ वर्चां॑सि धेह्यव॒र्चसं॑ कृणुहि॒ शत्रु॑मस्य ॥३॥
a॒yama॑stu dhana॑pati॒rdhanā॑nāma॒yaṃ vi॒śāṃ vi॒śpati॑rastu॒ rājā॑ | a॒sminni॑ndra॒ mahi॒ varcāṃ॑si dhehyava॒rcasaṃ॑ kṛṇuhi॒ śatru॑masya || ३ ||
अ॒स्मै द्यावा॑पृथिवी॒ भूरि॑ वा॒मं दु॑हाथां घर्म॒दुघे॑ इव धे॒नू।
अ॒यं राजा॒ प्रि॒य इन्द्र॑स्य भूयात् प्रि॒यो गवा॒मोष॑धीनां पशू॒नाम् ॥४॥
a॒smai dyāvā॑pṛthivī॒ bhūri॑ vā॒maṃ du॑hāthāṃ gharma॒dughe॑ iva dhe॒nū | a॒yaṃ rājā॒ pri॒ya indra॑sya bhūyāt pri॒yo gavā॒moṣa॑dhīnāṃ paśū॒nām || ४ ||
यु॒नज्मि॑ त उत्त॒राव॑न्त॒मिन्द्रं॒ येन॒ जय॑न्ति॒ न प॑रा॒जय॑न्ते ।
यस्त्वा॒ कर॑देकवृ॒षं जना॑नामु॒त राज्ञा॑मुत्तमं मा॑न॒वाना॑म् ॥५॥
yu॒najmi॑ ta utta॒rāva॑nta॒mindraṃ॒ yena॒ jaya॑nti॒ na pa॑rā॒jaya॑nte | yastvā॒ kara॑dekavṛ॒ṣaṃ janā॑nāmu॒ta rājñā॑muttamaṃ mā॑na॒vānā॑m || ५ ||
उत्त॑र॒स्त्वमध॑रे ते स॒पत्ना॒ ये के च॑ राज॒न् प्रति॑शत्रवस्ते ।
ए॒क॒वृ॒ष इन्द्र॑सखा जिगी॒वां छ॑त्रूय॒तामा भ॑रा॒ भोज॑नानि ॥६॥
utta॑ra॒stvamadha॑re te sa॒patnā॒ ye ke ca॑ rāja॒n prati॑śatravaste | e॒ka॒vṛ॒ṣa indra॑sakhā jigī॒vāṃ cha॑trūya॒tāmā bha॑rā॒ bhoja॑nāni || ६ ||
सिं॒हप्र॑तीको॒ विशो॑ अद्धि॒ सर्वा॑ व्या॒घ्रप्र॑ती॒कोऽव॑ बाधस्व॒ शत्रू॑न्।
ए॒क॒वृ॒ष इन्द्र॑सखा जिगी॒वां छ॑त्रूय॒तामा खि॑दा॒ भोज॑नानि ॥७॥
siṃ॒hapra॑tīko॒ viśo॑ addhi॒ sarvā॑ vyā॒ghrapra॑tī॒ko’va॑ bādhasva॒ śatrū॑n | e॒ka॒vṛ॒ṣa indra॑sakhā jigī॒vāṃ cha॑trūya॒tāmā khi॑dā॒ bhoja॑nāni || ७ ||