EeseDharmaSanātana Library
21काण्ड 4 · सूक्त 21
Atharvaveda Śaunaka Kand 4, Sukta 21.
7 shlokआ गावो॑ अग्मन्नु॒त भ॒द्रम॑क्र॒न्त्सीद॑न्तु गो॒ष्ठे र॒णय॑न्त्व॒स्मे।
प्र॒जाव॑तीः पुरु॒रूपा॑ इ॒ह स्यु॒रिन्द्रा॑य पू॒र्वीरु॒षसो॒ दुहा॑नाः ॥१॥
ā gāvo॑ agmannu॒ta bha॒drama॑kra॒ntsīda॑ntu go॒ṣṭhe ra॒ṇaya॑ntva॒sme | pra॒jāva॑tīḥ puru॒rūpā॑ i॒ha syu॒rindrā॑ya pū॒rvīru॒ṣaso॒ duhā॑nāḥ || १ ||
इन्द्रो॒ यज्व॑ने गृण॒ते च॒ शिक्ष॑त॒ उपेद् द॑दाति॒ न स्वं मु॑षायति ।
भूयो॑भूयो र॒यिमिद॑स्य व॒र्धय॑न्नभि॒न्ने खि॒ल्ये नि द॑धाति देव॒युम् ॥२॥
indro॒ yajva॑ne gṛṇa॒te ca॒ śikṣa॑ta॒ uped da॑dāti॒ na svaṃ mu॑ṣāyati | bhūyo॑bhūyo ra॒yimida॑sya va॒rdhaya॑nnabhi॒nne khi॒lye ni da॑dhāti deva॒yum || २ ||
न ता न॑शन्ति॒ न द॑भाति॒ तस्क॑रो॒ नासा॑मामि॒त्रो व्य॒थिरा द॑धर्षति ।
दे॒वांश्च याभि॒र्यज॑ते॒ ददा॑ति च॒ ज्योगित् ताभिः॑ सचते॒ गोप॑तिः स॒ह ॥३॥
na tā na॑śanti॒ na da॑bhāti॒ taska॑ro॒ nāsā॑māmi॒tro vya॒thirā da॑dharṣati | de॒vāṃśca yābhi॒ryaja॑te॒ dadā॑ti ca॒ jyogit tābhiḥ॑ sacate॒ gopa॑tiḥ sa॒ha || ३ ||
न ता अर्वा॑ रे॒णुक॑काटोऽश्नुते॒ न सं॑स्कृत॒त्रमुप॑ यन्ति॒ ता अ॒भि।
उ॒रु॒गा॒यमभ॑यं॒ तस्य॒ ता अनु॒ गावो॒ मर्त॑स्य॒ वि च॑रन्ति॒ यज्व॑नः ॥४॥
na tā arvā॑ re॒ṇuka॑kāṭo’śnute॒ na saṃ॑skṛta॒tramupa॑ yanti॒ tā a॒bhi | u॒ru॒gā॒yamabha॑yaṃ॒ tasya॒ tā anu॒ gāvo॒ marta॑sya॒ vi ca॑ranti॒ yajva॑naḥ || ४ ||
गावो॒ भगो॒ गाव॒ इन्द्रो॑ म इच्छा॒द् गावः॒ सोम॑स्य प्रथ॒मस्य॑ भ॒क्षः ।
इ॒मा या गावः॒ स ज॑नास॒ इन्द्र॑ इ॒च्छामि॑ हृ॒दा मन॑सा चि॒दिन्द्र॑म् ॥५॥
gāvo॒ bhago॒ gāva॒ indro॑ ma icchā॒d gāvaḥ॒ soma॑sya pratha॒masya॑ bha॒kṣaḥ | i॒mā yā gāvaḥ॒ sa ja॑nāsa॒ indra॑ i॒cchāmi॑ hṛ॒dā mana॑sā ci॒dindra॑m || ५ ||
यू॒यं गा॑वो मेदयथ कृ॒शं चि॑दश्री॒रं चि॑त् कृणुथा सु॒प्रती॑कम्।
भ॒द्रं गृ॒हं कृ॑णुथ भद्रवाचो बृ॒हद् वो॒ वय॑ उच्यते स॒भासु॑ ॥६॥
yū॒yaṃ gā॑vo medayatha kṛ॒śaṃ ci॑daśrī॒raṃ ci॑t kṛṇuthā su॒pratī॑kam | bha॒draṃ gṛ॒haṃ kṛ॑ṇutha bhadravāco bṛ॒had vo॒ vaya॑ ucyate sa॒bhāsu॑ || ६ ||
प्र॒जाव॑तीः सू॒यव॑से रु॒शन्तीः॑ शु॒द्धा अ॒पः सु॑प्रपा॒णे पिब॑न्तीः ।
मा व॑ स्ते॒न ई॑शत॒ माघशं॑सः॒ परि॑ वो रु॒द्रस्य॑ हे॒तिर्वृ॑णक्तु ॥७॥
pra॒jāva॑tīḥ sū॒yava॑se ru॒śantīḥ॑ śu॒ddhā a॒paḥ su॑prapā॒ṇe piba॑ntīḥ | mā va॑ ste॒na ī॑śata॒ māghaśaṃ॑saḥ॒ pari॑ vo ru॒drasya॑ he॒tirvṛ॑ṇaktu || ७ ||