EeseDharmaSanātana Library
20काण्ड 4 · सूक्त 20
Atharvaveda Śaunaka Kand 4, Sukta 20.
9 shlokआ प॑श्यति॒ प्रति॑ पश्यति॒ परा॑ पश्यति॒ पश्य॑ति ।
दिव॑म॒न्तरि॑क्ष॒माद् भूमिं॒ सर्वं॒ तद् दे॑वि पश्यति ॥१॥
ā pa॑śyati॒ prati॑ paśyati॒ parā॑ paśyati॒ paśya॑ti | diva॑ma॒ntari॑kṣa॒mād bhūmiṃ॒ sarvaṃ॒ tad de॑vi paśyati || १ ||
ति॒स्रो दिव॑स्ति॒स्रः पृ॑थि॒वीः षट् चे॒माः प्र॒दिशः॒ पृथ॑क्।
त्वया॒हं सर्वा॑ भू॒तानि॒ पश्या॑नि देव्योषधे ॥२॥
ti॒sro diva॑sti॒sraḥ pṛ॑thi॒vīḥ ṣaṭ ce॒māḥ pra॒diśaḥ॒ pṛtha॑k | tvayā॒haṃ sarvā॑ bhū॒tāni॒ paśyā॑ni devyoṣadhe || २ ||
दि॒व्यस्य॑ सुप॒र्णस्य॒ तस्य॑ हासि क॒नीनि॑का ।
सा भूमि॒मा रु॑रोहिथ व॒ह्यं श्रा॒न्ता व॒धूरि॑व ॥३॥
di॒vyasya॑ supa॒rṇasya॒ tasya॑ hāsi ka॒nīni॑kā | sā bhūmi॒mā ru॑rohitha va॒hyaṃ śrā॒ntā va॒dhūri॑va || ३ ||
तां मे॑ सहस्रा॒क्षो दे॒वो दक्षि॑णे॒ हस्त॒ आ द॑धत्।
तया॒हं सर्वं॑ पश्यामि॒ यश्च॑ शू॒द्र उ॒तार्यः॑ ॥४॥
tāṃ me॑ sahasrā॒kṣo de॒vo dakṣi॑ṇe॒ hasta॒ ā da॑dhat | tayā॒haṃ sarvaṃ॑ paśyāmi॒ yaśca॑ śū॒dra u॒tāryaḥ॑ || ४ ||
आ॒विष्कृ॑णुष्व रू॒पाणि॒ मात्मान॒मप॑ गूहथाः ।
अथो॑ सहस्रचक्षो॒ त्वं प्रति॑ पश्याः किमी॒दिनः॑ ॥५॥
ā॒viṣkṛ॑ṇuṣva rū॒pāṇi॒ mātmāna॒mapa॑ gūhathāḥ | atho॑ sahasracakṣo॒ tvaṃ prati॑ paśyāḥ kimī॒dinaḥ॑ || ५ ||
द॒र्शय॑ मा यातु॒धाना॑न् द॒र्शय॑ यातुधा॒न्यः ।
पि॒शा॒चान्त्सर्वा॑न् दर्श॒येति॒ त्वा र॑भ ओषधे ॥६॥
da॒rśaya॑ mā yātu॒dhānā॑n da॒rśaya॑ yātudhā॒nyaḥ | pi॒śā॒cāntsarvā॑n darśa॒yeti॒ tvā ra॑bha oṣadhe || ६ ||
क॒श्यप॑स्य॒ चक्षु॑रसि शु॒न्याश्च॑ चतुर॒क्ष्याः ।
वी॒ध्रे सूर्य॑मिव॒ सर्प॑न्तं॒ मा पि॑शा॒चं ति॒र॒स्क॑रः ॥७॥
ka॒śyapa॑sya॒ cakṣu॑rasi śu॒nyāśca॑ catura॒kṣyāḥ | vī॒dhre sūrya॑miva॒ sarpa॑ntaṃ॒ mā pi॑śā॒caṃ ti॒ra॒ska॑raḥ || ७ ||
उद॑ग्रभं परि॒पाणा॑द् यातु॒धानं॑ किमी॒दिन॑म्।
तेना॒हं सर्वं॑ पश्याम्यु॒त शू॒द्रमु॒तार्य॑म् ॥८॥
uda॑grabhaṃ pari॒pāṇā॑d yātu॒dhānaṃ॑ kimī॒dina॑m | tenā॒haṃ sarvaṃ॑ paśyāmyu॒ta śū॒dramu॒tārya॑m || ८ ||
यो अ॒न्तरि॑क्षेण॒ पत॑ति॒ दिवं॒ यश्चा॑ति॒सर्प॑ति ।
भूमिं॒ यो मन्य॑ते ना॒थं तं पि॑शा॒चं॑ प्र द॑र्शय ॥९॥
yo a॒ntari॑kṣeṇa॒ pata॑ti॒ divaṃ॒ yaścā॑ti॒sarpa॑ti | bhūmiṃ॒ yo manya॑te nā॒thaṃ taṃ pi॑śā॒caṃ॑ pra da॑rśaya || ९ ||