EeseDharmaSanātana Library
2काण्ड 4 · सूक्त 2
Atharvaveda Śaunaka Kand 4, Sukta 2.
8 shlokय आ॑त्म॒दा ब॑ल॒दा यस्य॒ विश्व॑ उ॒पास॑ते प्र॒शिषं॒ यस्य॑ दे॒वाः ।
यो॒३स्येशे॑ द्वि॒पदो॒ यश्चतु॑ष्पदः॒ कस्मै॑ दे॒वाय॑ ह॒विषा॑ विधेम ॥१॥
ya ā॑tma॒dā ba॑la॒dā yasya॒ viśva॑ u॒pāsa॑te pra॒śiṣaṃ॒ yasya॑ de॒vāḥ | yo॒३syeśe॑ dvi॒pado॒ yaścatu॑ṣpadaḥ॒ kasmai॑ de॒vāya॑ ha॒viṣā॑ vidhema || १ ||
यः प्रा॑ण॒तो नि॑मिष॒तो म॑हित्वैको॒ राजा॒ जग॑तो ब॒भूव॑ ।
यस्य॑ छा॒यामृतं॒ यस्य॑ मृ॒त्युः कस्मै॑ दे॒वाय॑ ह॒विषा॑ विधेम ॥२॥
yaḥ prā॑ṇa॒to ni॑miṣa॒to ma॑hitvaiko॒ rājā॒ jaga॑to ba॒bhūva॑ | yasya॑ chā॒yāmṛtaṃ॒ yasya॑ mṛ॒tyuḥ kasmai॑ de॒vāya॑ ha॒viṣā॑ vidhema || २ ||
यं क्रन्द॑सी॒ अव॑तश्चस्कभा॒ने भि॒यसा॑ने॒ रोद॑सी॒ अह्व॑येथाम्।
यस्या॒सौ पन्था॒ रज॑सो वि॒मानः॒ कस्मै॑ दे॒वाय॑ ह॒विषा॑ विधेम ॥३॥
yaṃ kranda॑sī॒ ava॑taścaskabhā॒ne bhi॒yasā॑ne॒ roda॑sī॒ ahva॑yethām | yasyā॒sau panthā॒ raja॑so vi॒mānaḥ॒ kasmai॑ de॒vāya॑ ha॒viṣā॑ vidhema || ३ ||
यस्य॒ द्यौरु॒र्वी पृ॑थि॒वी च॑ म॒ही यस्या॒द उ॒र्व॑१न्तरि॑क्षम्।
यस्या॒सौ सूरो॒ वित॑तो महि॒त्वा कस्मै॑ दे॒वाय॑ ह॒विषा॑ विधेम ॥४॥
yasya॒ dyauru॒rvī pṛ॑thi॒vī ca॑ ma॒hī yasyā॒da u॒rva॑१ntari॑kṣam | yasyā॒sau sūro॒ vita॑to mahi॒tvā kasmai॑ de॒vāya॑ ha॒viṣā॑ vidhema || ४ ||
यस्य॒ विश्वे॑ हि॒मव॑न्तो महि॒त्वा स॑मु॒द्रे यस्य॑ र॒सामिदा॒हुः ।
इ॒माश्च॑ प्र॒दिशो॒ यस्य॒ बा॒हू कस्मै॑ दे॒वाय॑ ह॒विषा॑ विधेम ॥५॥
yasya॒ viśve॑ hi॒mava॑nto mahi॒tvā sa॑mu॒dre yasya॑ ra॒sāmidā॒huḥ | i॒māśca॑ pra॒diśo॒ yasya॒ bā॒hū kasmai॑ de॒vāya॑ ha॒viṣā॑ vidhema || ५ ||
आपो॒ अग्रे॒ विश्व॑माव॒न् गर्भं॒ दधा॑ना अ॒मृता॑ ऋत॒ज्ञाः ।
यासु॑ दे॒वीष्वधि॑ दे॒व आ॑सी॒त् कस्मै॑ दे॒वाय॑ ह॒विषा॑ विधेम ॥६॥
āpo॒ agre॒ viśva॑māva॒n garbhaṃ॒ dadhā॑nā a॒mṛtā॑ ṛta॒jñāḥ | yāsu॑ de॒vīṣvadhi॑ de॒va ā॑sī॒t kasmai॑ de॒vāya॑ ha॒viṣā॑ vidhema || ६ ||
हि॒र॒ण्य॒ग॒र्भः सम॑वर्त॒ताग्रे॑ भू॒तस्य॑ जा॒तः पति॒रेक॑ आसीत्।
स दा॑धार पृथि॒वीमु॒त द्यां कस्मै दे॒वाय॑ ह॒विषा॑ विधेम ॥७॥
hi॒ra॒ṇya॒ga॒rbhaḥ sama॑varta॒tāgre॑ bhū॒tasya॑ jā॒taḥ pati॒reka॑ āsīt | sa dā॑dhāra pṛthi॒vīmu॒ta dyāṃ kasmai de॒vāya॑ ha॒viṣā॑ vidhema || ७ ||
आपो॑ व॒त्सं ज॒नय॑न्ती॒र्गर्भ॒मग्रे॒ समै॑रयन्।
तस्यो॒त जाय॑मान॒स्योल्ब॑ आसीद्धिर॒ण्ययः॒ कस्मै॑ दे॒वाय॑ ह॒विषा॑ विधेम ॥८॥
āpo॑ va॒tsaṃ ja॒naya॑ntī॒rgarbha॒magre॒ samai॑rayan | tasyo॒ta jāya॑māna॒syolba॑ āsīddhira॒ṇyayaḥ॒ kasmai॑ de॒vāya॑ ha॒viṣā॑ vidhema || ८ ||