EeseDharmaSanātana Library
19काण्ड 4 · सूक्त 19
Atharvaveda Śaunaka Kand 4, Sukta 19.
8 shlokउ॒तो अ॒स्यब॑न्धुकृदु॒तो अ॑सि॒ नु जा॑मि॒कृत्।
उ॒तो कृ॑त्या॒कृतः॑ प्र॒जां न॒डमि॒वा छि॑न्धि॒ वार्षि॑कम् ॥१॥
u॒to a॒syaba॑ndhukṛdu॒to a॑si॒ nu jā॑mi॒kṛt | u॒to kṛ॑tyā॒kṛtaḥ॑ pra॒jāṃ na॒ḍami॒vā chi॑ndhi॒ vārṣi॑kam || १ ||
ब्रा॒ह्म॒णेन॒ पर्यु॑क्तासि॒ कण्वे॑न नार्ष॒देन॑ ।
सेने॑वैषि॒ त्विषी॑मती॒ न तत्र॑ भ॒यमस्ति॒ यत्र॑ प्रा॒प्नोष्यो॑षधे ॥२॥
brā॒hma॒ṇena॒ paryu॑ktāsi॒ kaṇve॑na nārṣa॒dena॑ | sene॑vaiṣi॒ tviṣī॑matī॒ na tatra॑ bha॒yamasti॒ yatra॑ prā॒pnoṣyo॑ṣadhe || २ ||
अग्र॑मे॒ष्योष॑धीनां॒ ज्योति॑षेवाभिदी॒पय॑न्।
उ॒त त्रा॒तासि॒ पाक॒स्याथो॑ ह॒न्तासि॑ र॒क्षसः॑ ॥३॥
agra॑me॒ṣyoṣa॑dhīnāṃ॒ jyoti॑ṣevābhidī॒paya॑n | u॒ta trā॒tāsi॒ pāka॒syātho॑ ha॒ntāsi॑ ra॒kṣasaḥ॑ || ३ ||
यद॒दो दे॒वा असु॑रां॒स्त्वयाग्रे॑ नि॒रकु॑र्वत ।
तत॒स्त्वमध्यो॑षधेऽपामा॒र्गो अ॑जायथाः ॥४॥
yada॒do de॒vā asu॑rāṃ॒stvayāgre॑ ni॒raku॑rvata | tata॒stvamadhyo॑ṣadhe’pāmā॒rgo a॑jāyathāḥ || ४ ||
वि॒भि॒न्द॒ती श॒तशा॑खा विभि॒न्दन् नाम॑ ते पि॒ता।
प्र॒त्यग् वि भि॑न्धि॒ त्वं तं यो अ॒स्माँ अ॑भि॒दास॑ति ॥५॥
vi॒bhi॒nda॒tī śa॒taśā॑khā vibhi॒ndan nāma॑ te pi॒tā | pra॒tyag vi bhi॑ndhi॒ tvaṃ taṃ yo a॒smām̐ a॑bhi॒dāsa॑ti || ५ ||
अस॒द् भूम्याः॒ सम॑भव॒त् तद् यामे॑ति म॒हद् व्यचः॑ ।
तद् वै ततो॑ विधू॒पाय॑त् प्र॒त्यक् क॒र्तार॑मृच्छतु ॥६॥
asa॒d bhūmyāḥ॒ sama॑bhava॒t tad yāme॑ti ma॒had vyacaḥ॑ | tad vai tato॑ vidhū॒pāya॑t pra॒tyak ka॒rtāra॑mṛcchatu || ६ ||
प्र॒त्यङ् हि सं॑ब॒भूवि॑थ प्रती॒चीन॑फल॒स्त्वम्।
सर्वा॒न् मच्छ॒पथाँ॒ अधि॒ वरी॑यो यावया व॒धम् ॥७॥
pra॒tyaṅ hi saṃ॑ba॒bhūvi॑tha pratī॒cīna॑phala॒stvam | sarvā॒n maccha॒pathām॒̐ adhi॒ varī॑yo yāvayā va॒dham || ७ ||
श॒तेन॑ मा॒ परि॑ पाहि स॒हस्रे॑णा॒भि र॑क्ष मा ।
इन्द्र॑स्ते वीरुधां पत उ॒ग्र ओ॒ज्मान॒मा द॑धत् ॥८॥
śa॒tena॑ mā॒ pari॑ pāhi sa॒hasre॑ṇā॒bhi ra॑kṣa mā | indra॑ste vīrudhāṃ pata u॒gra o॒jmāna॒mā da॑dhat || ८ ||