EeseDharmaSanātana Library
18काण्ड 4 · सूक्त 18
Atharvaveda Śaunaka Kand 4, Sukta 18.
8 shlokस॒मं ज्योतिः॒ सूर्ये॒णाह्ना॒ रात्री॑ स॒मावती॑ ।
कृ॒णोमि॑ स॒त्यमू॒तये॑ऽर॒साः स॑न्तु॒ कृत्व॑रीः ॥१॥
sa॒maṃ jyotiḥ॒ sūrye॒ṇāhnā॒ rātrī॑ sa॒māvatī॑ | kṛ॒ṇomi॑ sa॒tyamū॒taye॑’ra॒sāḥ sa॑ntu॒ kṛtva॑rīḥ || १ ||
यो दे॑वाः कृ॒त्यां कृ॒त्वा हरा॒दवि॑दुषो गृ॒हम्।
व॒त्सो धा॒रुरि॑व मा॒तरं॒ तं प्र॒त्यगुप॑ पद्यताम् ॥२॥
yo de॑vāḥ kṛ॒tyāṃ kṛ॒tvā harā॒davi॑duṣo gṛ॒ham | va॒tso dhā॒ruri॑va mā॒taraṃ॒ taṃ pra॒tyagupa॑ padyatām || २ ||
अ॒मा कृ॒त्वा पा॒प्मानं॒ यस्तेना॒न्यं जिघां॑सति ।
अश्मा॑न॒स्तस्यां॑ द॒ग्धायां॑ बहु॒लाः फट् क॑रिक्रति ॥३॥
a॒mā kṛ॒tvā pā॒pmānaṃ॒ yastenā॒nyaṃ jighāṃ॑sati | aśmā॑na॒stasyāṃ॑ da॒gdhāyāṃ॑ bahu॒lāḥ phaṭ ka॑rikrati || ३ ||
सह॑स्रधाम॒न् विशि॑खा॒न् विग्री॑वां छायया॒ त्वम्।
प्रति॑ स्म च॒क्रुषे॑ कृ॒त्यां प्रि॒यां प्रि॒याव॑ते हर ॥४॥
saha॑sradhāma॒n viśi॑khā॒n vigrī॑vāṃ chāyayā॒ tvam | prati॑ sma ca॒kruṣe॑ kṛ॒tyāṃ pri॒yāṃ pri॒yāva॑te hara || ४ ||
अ॒नया॒हमोष॑ध्या सर्वाः॑ कृ॒त्या अ॑दूदुषम्।
यां क्षेत्रे॑ च॒क्रुर्यां गोषु॒ यां वा॑ ते॒ पुरु॑षेषु ॥५॥
a॒nayā॒hamoṣa॑dhyā sarvāḥ॑ kṛ॒tyā a॑dūduṣam | yāṃ kṣetre॑ ca॒kruryāṃ goṣu॒ yāṃ vā॑ te॒ puru॑ṣeṣu || ५ ||
यश्च॒कार॒ न श॒शाक॒ कर्तुं॑ श॒श्रे पाद॑म॒ङ्गुरि॑म्।
च॒कार॑ भ॒द्रम॒स्मभ्य॑मा॒त्मने॒ तप॑नं॒ तु सः ॥६॥
yaśca॒kāra॒ na śa॒śāka॒ kartuṃ॑ śa॒śre pāda॑ma॒ṅguri॑m | ca॒kāra॑ bha॒drama॒smabhya॑mā॒tmane॒ tapa॑naṃ॒ tu saḥ || ६ ||
अ॒पा॒मा॒र्गोऽप॑ मार्ष्टु क्षेत्रि॒यं श॒पथ॑श्च॒ यः ।
अपाह॑ यातुधा॒नीरप॒ सर्वा॒ अरा॒य्यः ॥७॥
a॒pā॒mā॒rgo’pa॑ mārṣṭu kṣetri॒yaṃ śa॒patha॑śca॒ yaḥ | apāha॑ yātudhā॒nīrapa॒ sarvā॒ arā॒yyaḥ || ७ ||
अ॒प॒मृज्य॑ यातु॒धाना॒नप॒ सर्वा॑ अरा॒य्यः ।
अपा॑मार्ग॒ त्वया॑ व॒यं सर्वं॒ तदप॒ मृज्महे ॥८॥
a॒pa॒mṛjya॑ yātu॒dhānā॒napa॒ sarvā॑ arā॒yyaḥ | apā॑mārga॒ tvayā॑ va॒yaṃ sarvaṃ॒ tadapa॒ mṛjmahe || ८ ||