EeseDharmaSanātana Library
17काण्ड 4 · सूक्त 17
Atharvaveda Śaunaka Kand 4, Sukta 17.
8 shlokईशा॑णां त्वा भेष॒जाना॒मुज्जे॑ष॒ आ र॑भामहे ।
च॒क्रे स॒हस्र॑वीर्यं॒ सर्व॑स्मा ओषधे त्वा ॥१॥
īśā॑ṇāṃ tvā bheṣa॒jānā॒mujje॑ṣa॒ ā ra॑bhāmahe | ca॒kre sa॒hasra॑vīryaṃ॒ sarva॑smā oṣadhe tvā || १ ||
स॒त्य॒जितं॑ शपथ॒याव॑नीं॒ सह॑मानां पुनःस॒राम्।
सर्वाः॒ सम॒ह्व्योष॑धीरि॒तो नः॑ पारया॒दिति॑ ॥२॥
sa॒tya॒jitaṃ॑ śapatha॒yāva॑nīṃ॒ saha॑mānāṃ punaḥsa॒rām | sarvāḥ॒ sama॒hvyoṣa॑dhīri॒to naḥ॑ pārayā॒diti॑ || २ ||
या श॒शाप॒ शप॑नेन॒ याघं मूर॑माद॒धे।
या रस॑स्य॒ हर॑णाय जा॒तमा॑रे॒भे तो॒कम॑त्तु॒ सा ॥३॥
yā śa॒śāpa॒ śapa॑nena॒ yāghaṃ mūra॑māda॒dhe | yā rasa॑sya॒ hara॑ṇāya jā॒tamā॑re॒bhe to॒kama॑ttu॒ sā || ३ ||
यां ते॑ च॒क्रुरा॒मे पात्रे॒ यां च॒क्रुर्नी॑ललोहि॒ते।
आ॒मे मां॒से कृ॒त्यां यां च॒क्रुस्तया॑ कृत्या॒कृतो॑ जहि ॥४॥
yāṃ te॑ ca॒krurā॒me pātre॒ yāṃ ca॒krurnī॑lalohi॒te | ā॒me māṃ॒se kṛ॒tyāṃ yāṃ ca॒krustayā॑ kṛtyā॒kṛto॑ jahi || ४ ||
दौष्व॑प्न्यं॒ दौर्जी॑वित्यं॒ रक्षो॑ अ॒भ्वऽमरा॒य्यः ।
दु॒र्णाम्नीः॒ सर्वा॑ दु॒र्वाच॒स्ता अ॒स्मन्ना॑शयामसि ॥५॥
dauṣva॑pnyaṃ॒ daurjī॑vityaṃ॒ rakṣo॑ a॒bhva’marā॒yyaḥ | du॒rṇāmnīḥ॒ sarvā॑ du॒rvāca॒stā a॒smannā॑śayāmasi || ५ ||
क्षु॒धा॒मा॒रं तृ॑ष्णामा॒रम॒गोता॑मनप॒त्यता॑म्।
अपा॑मार्ग॒ त्वया॑ व॒यं सर्वं॒ तदप॑ मृज्महे ॥६॥
kṣu॒dhā॒mā॒raṃ tṛ॑ṣṇāmā॒rama॒gotā॑manapa॒tyatā॑m | apā॑mārga॒ tvayā॑ va॒yaṃ sarvaṃ॒ tadapa॑ mṛjmahe || ६ ||
तृ॒ष्णा॒मा॒रं क्षु॑धामा॒रमथो॑ अक्षपराज॒यम्।
अपा॑मार्ग॒ त्वया॑ व॒यं सर्वं॒ तदप॒ मृज्महे ॥७॥
tṛ॒ṣṇā॒mā॒raṃ kṣu॑dhāmā॒ramatho॑ akṣaparāja॒yam | apā॑mārga॒ tvayā॑ va॒yaṃ sarvaṃ॒ tadapa॒ mṛjmahe || ७ ||
अ॒पा॒मा॒र्ग ओष॑धीनां॒ सर्वा॑सा॒मेक॒ इद् व॒शी।
तेन॑ ते मृज्म॒ आस्थि॑त॒मथ॒ त्वम॑ग॒दश्च॑र ॥८॥
a॒pā॒mā॒rga oṣa॑dhīnāṃ॒ sarvā॑sā॒meka॒ id va॒śī | tena॑ te mṛjma॒ āsthi॑ta॒matha॒ tvama॑ga॒daśca॑ra || ८ ||