EeseDharmaSanātana Library
14काण्ड 4 · सूक्त 14
Atharvaveda Śaunaka Kand 4, Sukta 14.
9 shlokअ॒जो ह्य॑१ग्नेरज॑निष्ट॒ शोका॒त् सो अ॑पश्यज्जनि॒तार॒मग्रे॑ ।
तेन॑ दे॒वा दे॒वता॒मग्रा॑ आय॒न् तेन॒ रोहा॑न् रुरुहु॒र्मेध्या॑सः ॥१॥
a॒jo hya॑१gneraja॑niṣṭa॒ śokā॒t so a॑paśyajjani॒tāra॒magre॑ | tena॑ de॒vā de॒vatā॒magrā॑ āya॒n tena॒ rohā॑n ruruhu॒rmedhyā॑saḥ || १ ||
क्रम॑ध्वम॒ग्निना॒ नाक॒मुख्या॒न् हस्ते॑षु॒ बिभ्र॑तः ।
दि॒वस्पृ॒ष्ठं स्वऽर्ग॒त्वा मि॒श्रा दे॒वेभि॑राध्वम् ॥२॥
krama॑dhvama॒gninā॒ nāka॒mukhyā॒n haste॑ṣu॒ bibhra॑taḥ | di॒vaspṛ॒ṣṭhaṃ sva’rga॒tvā mi॒śrā de॒vebhi॑rādhvam || २ ||
पृ॒ष्ठात् पृ॑थि॒व्या अ॒हम॒न्तरि॑क्ष॒मारु॑हम॒न्तरि॑क्षा॒द् दिव॒मारु॑हम्।
दि॒वो नाक॑स्य पृ॒ष्ठात् स्व॑१र्ज्योति॑रगाम॒हम् ॥३॥
pṛ॒ṣṭhāt pṛ॑thi॒vyā a॒hama॒ntari॑kṣa॒māru॑hama॒ntari॑kṣā॒d diva॒māru॑ham | di॒vo nāka॑sya pṛ॒ṣṭhāt sva॑१rjyoti॑ragāma॒ham || ३ ||
स्व॑१र्यन्तो॒ नापे॑क्षन्त॒ आ द्यां रो॑हन्ति॒ रोद॑सी ।
य॒ज्ञं ये वि॒श्वतो॑धारं॒ सुवि॑द्वांसो वितेनि॒रे ॥४॥
sva॑१ryanto॒ nāpe॑kṣanta॒ ā dyāṃ ro॑hanti॒ roda॑sī | ya॒jñaṃ ye vi॒śvato॑dhāraṃ॒ suvi॑dvāṃso viteni॒re || ४ ||
अग्ने॒ प्रेहि॑ प्रथ॒मो दे॒वता॑नां॒ चक्षु॑र्दे॒वाना॑मु॒त मानु॑षानाम्।
इय॑क्षमाणा॒ भृगु॑भिः स॒जोषाः॒ स्वऽर्यन्तु॒ यज॑मानाः स्व॒स्ति ॥५॥
agne॒ prehi॑ pratha॒mo de॒vatā॑nāṃ॒ cakṣu॑rde॒vānā॑mu॒ta mānu॑ṣānām | iya॑kṣamāṇā॒ bhṛgu॑bhiḥ sa॒joṣāḥ॒ sva’ryantu॒ yaja॑mānāḥ sva॒sti || ५ ||
अ॒जम॑नज्मि॒ पय॑सा घृ॒तेन॑ दि॒व्यं सु॑प॒र्नं प॑य॒सं बृ॒हन्त॑म्।
तेन॑ गेष्म सुकृ॒तस्य॑ लो॒कं स्वऽरा॒रोह॑न्तो अ॒भि नाक॑मुत्त॒मम् ॥६॥
a॒jama॑najmi॒ paya॑sā ghṛ॒tena॑ di॒vyaṃ su॑pa॒rnaṃ pa॑ya॒saṃ bṛ॒hanta॑m | tena॑ geṣma sukṛ॒tasya॑ lo॒kaṃ sva’rā॒roha॑nto a॒bhi nāka॑mutta॒mam || ६ ||
पञ्चौ॑दनं प॒ञ्चभि॑र॒ङ्गुलि॑भि॒र्द॑र्व्योद्ध॑र पञ्च॒धैतमो॑द॒नम्।
प्राच्यां॑ दि॒शि शिरो॑ अ॒जस्य॑ धेहि॒ दक्षि॑णायां दि॒शि दक्षि॑णं धेहि पा॒र्श्वम् ॥७॥
pañcau॑danaṃ pa॒ñcabhi॑ra॒ṅguli॑bhi॒rda॑rvyoddha॑ra pañca॒dhaitamo॑da॒nam | prācyāṃ॑ di॒śi śiro॑ a॒jasya॑ dhehi॒ dakṣi॑ṇāyāṃ di॒śi dakṣi॑ṇaṃ dhehi pā॒rśvam || ७ ||
प्र॒तीच्यां॑ दि॒शि भ॒सद॒मस्य धेह्युत्त॑रस्यां दि॒श्युत्त॑रं धेहि पा॒र्श्वम्।
ऊ॒र्ध्वायां॑ दि॒श्य॑१जस्यानू॑कं धेहि दि॒शि ध्रु॒वायां॑ धेहि पाज॒स्यऽम॒न्तरि॑क्षे मध्य॒तो मध्य॑मस्य ॥८॥
pra॒tīcyāṃ॑ di॒śi bha॒sada॒masya dhehyutta॑rasyāṃ di॒śyutta॑raṃ dhehi pā॒rśvam | ū॒rdhvāyāṃ॑ di॒śya॑१jasyānū॑kaṃ dhehi di॒śi dhru॒vāyāṃ॑ dhehi pāja॒sya’ma॒ntari॑kṣe madhya॒to madhya॑masya || ८ ||
शृ॒तम॒जं शृ॒तया॒ प्रोर्णु॑हि त्व॒चा सर्वै॒रङ्गैः॒ संभृ॑तं वि॒श्वरू॑पम्।
स उत् ति॑ष्ठे॒तो अ॒भि नाक॑मुत्त॒मं प॒द्भिश्च॒तुर्भिः॒ प्रति॑ तिष्ठ दि॒क्षु ॥९॥
śṛ॒tama॒jaṃ śṛ॒tayā॒ prorṇu॑hi tva॒cā sarvai॒raṅgaiḥ॒ saṃbhṛ॑taṃ vi॒śvarū॑pam | sa ut ti॑ṣṭhe॒to a॒bhi nāka॑mutta॒maṃ pa॒dbhiśca॒turbhiḥ॒ prati॑ tiṣṭha di॒kṣu || ९ ||