EeseDharmaSanātana Library
13काण्ड 4 · सूक्त 13
Atharvaveda Śaunaka Kand 4, Sukta 13.
7 shlokउ॒त दे॑वा॒ अव॑हितं॒ देवा॒ उन्न॑यथा॒ पुनः॑ ।
उ॒ताग॑श्च॒क्रुषं॑ देवा॒ देवा॑ जी॒वय॑था॒ पुनः॑ ॥१॥
u॒ta de॑vā॒ ava॑hitaṃ॒ devā॒ unna॑yathā॒ punaḥ॑ | u॒tāga॑śca॒kruṣaṃ॑ devā॒ devā॑ jī॒vaya॑thā॒ punaḥ॑ || १ ||
द्वावि॒मौ वातौ॒ वात॒ आ सिन्धो॒रा प॑रावतः॑ ।
दक्षं॑ ते अ॒न्य आ॒वातु॒ व्य॑१न्यो वा॑तु॒ यद् रपः॑ ॥२॥
dvāvi॒mau vātau॒ vāta॒ ā sindho॒rā pa॑rāvataḥ॑ | dakṣaṃ॑ te a॒nya ā॒vātu॒ vya॑१nyo vā॑tu॒ yad rapaḥ॑ || २ ||
आ वा॑त वाहि भेष॒जं वि वा॑त वाहि॒ यद्रपः॑ ।
त्वं हि वि॑श्वभेषज दे॒वानां॑ दू॒त ईय॑से ॥३॥
ā vā॑ta vāhi bheṣa॒jaṃ vi vā॑ta vāhi॒ yadrapaḥ॑ | tvaṃ hi vi॑śvabheṣaja de॒vānāṃ॑ dū॒ta īya॑se || ३ ||
त्राय॑न्तामि॒मं दे॒वास्त्राय॑न्तां म॒रुतां॑ ग॒णाः ।
त्राय॑न्तां॒ विश्वा॑ भू॒तानि॒ यथा॒यम॑र॒पा अस॑त् ॥४॥
trāya॑ntāmi॒maṃ de॒vāstrāya॑ntāṃ ma॒rutāṃ॑ ga॒ṇāḥ | trāya॑ntāṃ॒ viśvā॑ bhū॒tāni॒ yathā॒yama॑ra॒pā asa॑t || ४ ||
आ त्वा॑गमं॒ शंता॑तिभि॒रथो॑ अरि॒ष्टता॑तिभिः ।
दक्षं॑ त उ॒ग्रमाभा॑रिषं॒ परा॒ यक्ष्मं॑ सुवामि ते ॥५॥
ā tvā॑gamaṃ॒ śaṃtā॑tibhi॒ratho॑ ari॒ṣṭatā॑tibhiḥ | dakṣaṃ॑ ta u॒gramābhā॑riṣaṃ॒ parā॒ yakṣmaṃ॑ suvāmi te || ५ ||
अ॒यं मे॒ हस्तो॒ भग॑वान॒यं मे॒ भग॑वत्तरः ।
अ॒यं मे॑ वि॒श्वभे॑षजो॒ऽयं शि॒वाभि॑मर्शनः ॥६॥
a॒yaṃ me॒ hasto॒ bhaga॑vāna॒yaṃ me॒ bhaga॑vattaraḥ | a॒yaṃ me॑ vi॒śvabhe॑ṣajo॒’yaṃ śi॒vābhi॑marśanaḥ || ६ ||
हस्ता॑भ्यां॒ दश॑शाखाभ्यां जि॒ह्वा वा॒चः पु॑रोग॒वी।
अ॒ना॒म॒यि॒त्नुभ्यां॒ हस्ता॑भ्यां॒ ताभ्यां॑ त्वा॒भि मृ॑शामसि ॥७॥
hastā॑bhyāṃ॒ daśa॑śākhābhyāṃ ji॒hvā vā॒caḥ pu॑roga॒vī | a॒nā॒ma॒yi॒tnubhyāṃ॒ hastā॑bhyāṃ॒ tābhyāṃ॑ tvā॒bhi mṛ॑śāmasi || ७ ||