EeseDharmaSanātana Library
12काण्ड 4 · सूक्त 12
Atharvaveda Śaunaka Kand 4, Sukta 12.
7 shlokरोह॑ण्यसि॒ रोह॑ण्य॒स्थ्नश्छि॒न्नस्य॒ रोह॑णी ।
रो॒हये॒दम॑रुन्धति ॥१॥
roha॑ṇyasi॒ roha॑ṇya॒sthnaśchi॒nnasya॒ roha॑ṇī | ro॒haye॒dama॑rundhati || १ ||
यत् ते॑ रि॒ष्टं य॑त् ते द्यु॒त्तमस्ति॒ पेष्ट्रं॑ त आ॒त्मनि ।
धा॒ता तद् भ॒द्रया॒ पुनः॒ सं द॑ध॒त् परु॑षा॒ परुः॑ ॥२॥
yat te॑ ri॒ṣṭaṃ ya॑t te dyu॒ttamasti॒ peṣṭraṃ॑ ta ā॒tmani | dhā॒tā tad bha॒drayā॒ punaḥ॒ saṃ da॑dha॒t paru॑ṣā॒ paruḥ॑ || २ ||
सं ते॑ म॒ज्जा म॒ज्ज्ञा भ॑वतु॒ समु॑ ते॒ परु॑षा॒ परुः॑ ।
सं ते॑ मां॒सस्य॒ विस्र॑स्तं॒ समस्थ्यपि॑ रोहतु ॥३॥
saṃ te॑ ma॒jjā ma॒jjñā bha॑vatu॒ samu॑ te॒ paru॑ṣā॒ paruḥ॑ | saṃ te॑ māṃ॒sasya॒ visra॑staṃ॒ samasthyapi॑ rohatu || ३ ||
म॒ज्जा म॒ज्ज्ञा सं धी॑यतां॒ चर्म॑णा॒ चर्म॑ रोहतु ।
असृ॑क् ते॒ अस्थि॑ रोहतु मां॒सं मां॒सेन॑ रोहतु ॥४॥
ma॒jjā ma॒jjñā saṃ dhī॑yatāṃ॒ carma॑ṇā॒ carma॑ rohatu | asṛ॑k te॒ asthi॑ rohatu māṃ॒saṃ māṃ॒sena॑ rohatu || ४ ||
लोम॒ लोम्ना॒ सं क॑ल्पया त्व॒चा सं क॑ल्पया॒ त्वच॑म्।
असृ॑क् ते॒ अस्थि॑ रोहतु छि॒न्नं सं धे॑ह्योषधे ॥५॥
loma॒ lomnā॒ saṃ ka॑lpayā tva॒cā saṃ ka॑lpayā॒ tvaca॑m | asṛ॑k te॒ asthi॑ rohatu chi॒nnaṃ saṃ dhe॑hyoṣadhe || ५ ||
स उत् ति॑ष्ठ॒ प्रेहि॒ प्र द्र॑व॒ रथः॑ सुच॒क्रः सु॑प॒विः सु॒नाभिः॑।
प्रति॑ तिष्ठो॒र्ध्वः ॥६॥
sa ut ti॑ṣṭha॒ prehi॒ pra dra॑va॒ rathaḥ॑ suca॒kraḥ su॑pa॒viḥ su॒nābhiḥ॑ | prati॑ tiṣṭho॒rdhvaḥ || ६ ||
यदि॑ क॒र्तं प॑ति॒त्वा सं॑श॒श्रे यदि॒ वाश्मा॒ प्रहृ॑तो ज॒घान॑ ।
ऋ॒भू रथ॑स्ये॒वाङ्गा॑नि॒ सं द॑ध॒त् परु॑षा॒ परुः॑ ॥७॥
yadi॑ ka॒rtaṃ pa॑ti॒tvā saṃ॑śa॒śre yadi॒ vāśmā॒ prahṛ॑to ja॒ghāna॑ | ṛ॒bhū ratha॑sye॒vāṅgā॑ni॒ saṃ da॑dha॒t paru॑ṣā॒ paruḥ॑ || ७ ||