EeseDharmaSanātana Library
10काण्ड 4 · सूक्त 10
Atharvaveda Śaunaka Kand 4, Sukta 10.
7 shlokवाता॑ज्जा॒तो अ॒न्तरि॑क्षाद् वि॒द्युतो॒ ज्योति॑ष॒स्परि ।
स नो॑ हिरण्य॒जाः श॒ङ्खः कृश॑नः पा॒त्वंह॑सः ॥१॥
vātā॑jjā॒to a॒ntari॑kṣād vi॒dyuto॒ jyoti॑ṣa॒spari | sa no॑ hiraṇya॒jāḥ śa॒ṅkhaḥ kṛśa॑naḥ pā॒tvaṃha॑saḥ || १ ||
यो अ॑ग्र॒तो रो॑च॒नानां॑ समु॒द्रादधि॑ जज्ञि॒षे।
श॒ङ्खेन॑ ह॒त्वा रक्षां॑स्य॒त्त्रिणो॒ वि ष॑हामहे ॥२॥
yo a॑gra॒to ro॑ca॒nānāṃ॑ samu॒drādadhi॑ jajñi॒ṣe | śa॒ṅkhena॑ ha॒tvā rakṣāṃ॑sya॒ttriṇo॒ vi ṣa॑hāmahe || २ ||
श॒ङ्खेनामी॑वा॒मम॑तिं श॒ङ्खेनो॒त सदान्वाः॑ ।
श॒ङ्खो नो॑ वि॒श्वभे॑षजः॒ कृश॑नः पा॒त्वंह॑सः ॥३॥
śa॒ṅkhenāmī॑vā॒mama॑tiṃ śa॒ṅkheno॒ta sadānvāḥ॑ | śa॒ṅkho no॑ vi॒śvabhe॑ṣajaḥ॒ kṛśa॑naḥ pā॒tvaṃha॑saḥ || ३ ||
दि॒वि जा॒तः स॑मुद्र॒जः सि॑न्धु॒तस्पर्याभृ॑तः ।
स नो॑ हिरण्य॒जाः श॒ङ्ख आ॑युष्प्र॒तर॑णो म॒णिः ॥४॥
di॒vi jā॒taḥ sa॑mudra॒jaḥ si॑ndhu॒tasparyābhṛ॑taḥ | sa no॑ hiraṇya॒jāḥ śa॒ṅkha ā॑yuṣpra॒tara॑ṇo ma॒ṇiḥ || ४ ||
स॒मु॒द्राज्जा॒तो म॒णिर्वृ॒त्राज्जा॒तो दि॑वाक॒रः ।
सो अ॒स्मान्त्स॒र्वतः॑ पातु हे॒त्या दे॑वासु॒रेभ्यः॑ ॥५॥
sa॒mu॒drājjā॒to ma॒ṇirvṛ॒trājjā॒to di॑vāka॒raḥ | so a॒smāntsa॒rvataḥ॑ pātu he॒tyā de॑vāsu॒rebhyaḥ॑ || ५ ||
हिर॑ण्याना॒मेको॑ऽसि॒ सोमा॒त् त्वमधि॑ जज्ञिषे ।
रथे॒ त्वम॑सि दर्श॒त॑ इ॑षु॒धौ रो॑च॒नस्त्वं प्र ण॒ आयूं॑षि तारिषत् ॥६॥
hira॑ṇyānā॒meko॑’si॒ somā॒t tvamadhi॑ jajñiṣe | rathe॒ tvama॑si darśa॒ta॑ i॑ṣu॒dhau ro॑ca॒nastvaṃ pra ṇa॒ āyūṃ॑ṣi tāriṣat || ६ ||
दे॒वाना॒मस्थि॒ कृश॑नं बभूव॒ तदा॑त्म॒न्वच्च॑रत्य॒प्स्व॑१न्तः ।
तत् ते॑ बध्ना॒म्यायु॑षे॒ वर्च॑से॒ बला॑य दीर्घायु॒त्वाय॑ श॒तशा॑रदाय कार्श॒नस्त्वा॒भि र॑क्षतु ॥७॥
de॒vānā॒masthi॒ kṛśa॑naṃ babhūva॒ tadā॑tma॒nvacca॑ratya॒psva॑१ntaḥ | tat te॑ badhnā॒myāyu॑ṣe॒ varca॑se॒ balā॑ya dīrghāyu॒tvāya॑ śa॒taśā॑radāya kārśa॒nastvā॒bhi ra॑kṣatu || ७ ||