EeseDharmaSanātana Library
6काण्ड 3 · सूक्त 6
Atharvaveda Śaunaka Kand 3, Sukta 6.
8 shlokपुमा॑न् पुंसः परि॑जातोऽश्व॒त्थः ख॑दि॒रादधि॑ ।
स ह॑न्तु॒ शत्रू॑न् माम॒कान् यान॒हं द्वेष्मि॒ ये च॒ माम् ॥१॥
pumā॑n puṃsaḥ pari॑jāto’śva॒tthaḥ kha॑di॒rādadhi॑ | sa ha॑ntu॒ śatrū॑n māma॒kān yāna॒haṃ dveṣmi॒ ye ca॒ mām || १ ||
तान॑श्वत्थ॒ निः शृ॑णीहि॒ शत्रू॑न् वैबाध॒दोध॑तः ।
इन्द्रे॑ण वृत्र॒घ्ना मे॒दी मि॒त्रेण॒ वरु॑णेन च ॥२॥
tāna॑śvattha॒ niḥ śṛ॑ṇīhi॒ śatrū॑n vaibādha॒dodha॑taḥ | indre॑ṇa vṛtra॒ghnā me॒dī mi॒treṇa॒ varu॑ṇena ca || २ ||
यथा॑श्वत्थ नि॒रभ॑नो॒ऽन्तर्म॑ह॒त्यऽर्ण॒वे।
ए॒वा तान्त्सर्वा॒न् निर्भ॑ङ्ग्धि॒ यान॒हं द्वेष्मि॒ ये च॒ माम् ॥३॥
yathā॑śvattha ni॒rabha॑no॒’ntarma॑ha॒tya’rṇa॒ve | e॒vā tāntsarvā॒n nirbha॑ṅgdhi॒ yāna॒haṃ dveṣmi॒ ye ca॒ mām || ३ ||
यः सह॑मान॒श्चर॑सि सासहा॒न इव ऋष॒भः ।
तेना॑श्वत्थ॒ त्वया॑ व॒यं स॒पत्ना॑न्त्सहिषीमहि ॥४॥
yaḥ saha॑māna॒ścara॑si sāsahā॒na iva ṛṣa॒bhaḥ | tenā॑śvattha॒ tvayā॑ va॒yaṃ sa॒patnā॑ntsahiṣīmahi || ४ ||
सि॒नात्वे॑ना॒न् निरृ॑तिर्मृ॒त्योः पाशै॑रमो॒क्यैः ।
अश्व॑त्थ॒ शत्रू॑न् माम॒कान् यान॒हं द्वेष्मि॒ ये च॒ माम् ॥५॥
si॒nātve॑nā॒n nirṛ॑tirmṛ॒tyoḥ pāśai॑ramo॒kyaiḥ | aśva॑ttha॒ śatrū॑n māma॒kān yāna॒haṃ dveṣmi॒ ye ca॒ mām || ५ ||
यथा॑श्वत्थ वानस्प॒त्याना॒रोह॑न् कृणु॒षेऽध॑रान्।
ए॒वा मे॒ शत्रो॑र्मू॒र्धानं॒ विष्व॑ग् भिन्द्धि॒ सह॑स्व च ॥६॥
yathā॑śvattha vānaspa॒tyānā॒roha॑n kṛṇu॒ṣe’dha॑rān | e॒vā me॒ śatro॑rmū॒rdhānaṃ॒ viṣva॑g bhinddhi॒ saha॑sva ca || ६ ||
तेऽध॒राञ्चः॒ प्र प्ल॑वन्तां छि॒न्ना नौरि॑व॒ बन्ध॑नात्।
न वै॑बा॒धप्र॑णुत्तानां॒ पुन॑रस्ति नि॒वर्त॑नम् ॥७॥
te’dha॒rāñcaḥ॒ pra pla॑vantāṃ chi॒nnā nauri॑va॒ bandha॑nāt | na vai॑bā॒dhapra॑ṇuttānāṃ॒ puna॑rasti ni॒varta॑nam || ७ ||
प्रैणा॑न् नुदे॒ मन॑सा॒ प्र चि॒त्ते॑नो॒त ब्रह्म॑णा ।
प्रैणा॑न् वृ॒क्षस्य॒ शाख॑याश्व॒त्थस्य॑ नुदामहे ॥८॥
praiṇā॑n nude॒ mana॑sā॒ pra ci॒tte॑no॒ta brahma॑ṇā | praiṇā॑n vṛ॒kṣasya॒ śākha॑yāśva॒tthasya॑ nudāmahe || ८ ||