EeseDharmaSanātana Library
31काण्ड 3 · सूक्त 31
Atharvaveda Śaunaka Kand 3, Sukta 31.
11 shlok७ देवाः, सूर्यः, ८-१० आयुः, ११ पर्जन्यः। अनुष्टुप्, ४ भुरिक् ५ विराट् प्रस्तारपङ्क्तिः।
वि दे॒वा ज॒रसा॑वृत॒न् वि त्वम॑ग्ने॒ अरा॑त्या ।
व्य॑१हं सर्वे॑ण पा॒प्मना॒ वि यक्ष्मे॑ण॒ समायु॑षा ॥१॥
७ devāḥ, sūryaḥ, ८-१० āyuḥ, ११ parjanyaḥ | anuṣṭup, ४ bhurik ५ virāṭ prastārapaṅktiḥ | vi de॒vā ja॒rasā॑vṛta॒n vi tvama॑gne॒ arā॑tyā | vya॑१haṃ sarve॑ṇa pā॒pmanā॒ vi yakṣme॑ṇa॒ samāyu॑ṣā || १ ||
व्यार्त्या॒ पव॑मानो॒ वि श॒क्रः पा॑पकृ॒त्यया॑ ।
व्य॑१हं सर्वे॑ण पा॒प्मना॒ वि यक्ष्मे॑ण॒ समायु॑षा ॥२॥
vyārtyā॒ pava॑māno॒ vi śa॒kraḥ pā॑pakṛ॒tyayā॑ | vya॑१haṃ sarve॑ṇa pā॒pmanā॒ vi yakṣme॑ṇa॒ samāyu॑ṣā || २ ||
वि ग्रा॒म्याः प॒शव॑ आर॒ण्यैर्व्याऽप॒स्तृष्ण॑यासरन्।
व्य॑१हं सर्वे॑ण पा॒प्मना॒ वि यक्ष्मे॑ण॒ समायु॑षा ॥३॥
vi grā॒myāḥ pa॒śava॑ āra॒ṇyairvyā’pa॒stṛṣṇa॑yāsaran | vya॑१haṃ sarve॑ṇa pā॒pmanā॒ vi yakṣme॑ṇa॒ samāyu॑ṣā || ३ ||
वी॒३मे द्यावा॑पृथि॒वी इ॒तो वि पन्था॑नो॒ दिशं॑दिशम्।
व्य॑१हं सर्वे॑ण पा॒प्मना॒ वि यक्ष्मे॑ण॒ समायु॑षा ॥४॥
vī॒३me dyāvā॑pṛthi॒vī i॒to vi panthā॑no॒ diśaṃ॑diśam | vya॑१haṃ sarve॑ṇa pā॒pmanā॒ vi yakṣme॑ṇa॒ samāyu॑ṣā || ४ ||
त्वष्टा॑ दुहि॒त्रे व॑ह॒तुं यु॑न॒क्तीती॒दं विश्वं॒ भुव॑नं॒ वि या॑ति ।
व्य॑१हं सर्वे॑ण पा॒प्मना॒ वि यक्ष्मे॑ण॒ समायु॑षा ॥५॥
tvaṣṭā॑ duhi॒tre va॑ha॒tuṃ yu॑na॒ktītī॒daṃ viśvaṃ॒ bhuva॑naṃ॒ vi yā॑ti | vya॑१haṃ sarve॑ṇa pā॒pmanā॒ vi yakṣme॑ṇa॒ samāyu॑ṣā || ५ ||
अ॒ग्निः प्रा॒णान्त्सं द॑धाति च॒न्द्रः प्रा॒णेन॒ संहि॑तः ।
व्य॑१हं सर्वे॑ण पा॒प्मना॒ वि यक्ष्मे॑ण॒ समायु॑षा ॥६॥
a॒gniḥ prā॒ṇāntsaṃ da॑dhāti ca॒ndraḥ prā॒ṇena॒ saṃhi॑taḥ | vya॑१haṃ sarve॑ṇa pā॒pmanā॒ vi yakṣme॑ṇa॒ samāyu॑ṣā || ६ ||
प्रा॒णेन॑ वि॒श्वतो॑वीर्यं दे॒वाः सूर्यं॒ समै॑रयन्।
व्य॑१हं सर्वे॑ण पा॒प्मना॒ वि यक्ष्मे॑ण॒ समायु॑षा ॥७॥
prā॒ṇena॑ vi॒śvato॑vīryaṃ de॒vāḥ sūryaṃ॒ samai॑rayan | vya॑१haṃ sarve॑ṇa pā॒pmanā॒ vi yakṣme॑ṇa॒ samāyu॑ṣā || ७ ||
आयु॑ष्मतामायु॒ष्कृतां॑ प्रा॒णेन॑ जीव॒ मा मृ॑थाः ।
व्य॑१हं सर्वे॑ण पा॒प्मना॒ वि यक्ष्मे॑ण॒ समायु॑षा ॥८॥
āyu॑ṣmatāmāyu॒ṣkṛtāṃ॑ prā॒ṇena॑ jīva॒ mā mṛ॑thāḥ | vya॑१haṃ sarve॑ṇa pā॒pmanā॒ vi yakṣme॑ṇa॒ samāyu॑ṣā || ८ ||
प्रा॒णेन॑ प्राण॒तां प्राणे॒हैव भ॑व॒ मा मृ॑थाः ।
व्य॑१हं सर्वे॑ण पा॒प्मना॒ वि यक्ष्मे॑ण॒ समायु॑षा ॥९॥
prā॒ṇena॑ prāṇa॒tāṃ prāṇe॒haiva bha॑va॒ mā mṛ॑thāḥ | vya॑१haṃ sarve॑ṇa pā॒pmanā॒ vi yakṣme॑ṇa॒ samāyu॑ṣā || ९ ||
उदायु॑षा॒ समायु॒षोदोष॑धीनां॒ रसे॑न ।
व्य॑१हं सर्वे॑ण पा॒प्मना॒ वि यक्ष्मे॑ण॒ समायु॑षा ॥१०॥
udāyu॑ṣā॒ samāyu॒ṣodoṣa॑dhīnāṃ॒ rase॑na | vya॑१haṃ sarve॑ṇa pā॒pmanā॒ vi yakṣme॑ṇa॒ samāyu॑ṣā || १० ||
आप॒र्जन्य॑स्य वृ॒ष्ट्योद॑स्थामा॒मृता॑ व॒यम्।
व्य॑१हं सर्वे॑ण पा॒प्मना॒ वि यक्ष्मे॑ण॒ समायु॑षा ॥११॥
āpa॒rjanya॑sya vṛ॒ṣṭyoda॑sthāmā॒mṛtā॑ va॒yam | vya॑१haṃ sarve॑ṇa pā॒pmanā॒ vi yakṣme॑ṇa॒ samāyu॑ṣā || ११ ||