EeseDharmaSanātana Library
30काण्ड 3 · सूक्त 30
Atharvaveda Śaunaka Kand 3, Sukta 30.
7 shlokसहृ॑दयं सांमन॒स्यमवि॑द्वेषं कृणोमि वः ।
अ॒न्यो अ॒न्यम॒भि ह॑र्यत व॒त्सं जा॒तमि॑वा॒घ्न्या ॥१॥
sahṛ॑dayaṃ sāṃmana॒syamavi॑dveṣaṃ kṛṇomi vaḥ | a॒nyo a॒nyama॒bhi ha॑ryata va॒tsaṃ jā॒tami॑vā॒ghnyā || १ ||
अनु॑व्रतः पि॒तुः पु॒त्रो मा॒त्रा भ॑वतु॒ संम॑नाः ।
जा॒या पत्ये॒ मधु॑मतीं॒ वाचं॑ वदतु शन्ति॒वाम् ॥२॥
anu॑vrataḥ pi॒tuḥ pu॒tro mā॒trā bha॑vatu॒ saṃma॑nāḥ | jā॒yā patye॒ madhu॑matīṃ॒ vācaṃ॑ vadatu śanti॒vām || २ ||
मा भ्राता॒ भ्रात॑रं द्विक्ष॒न्मा स्वसा॑रमु॒त स्वसा॑ ।
स॒म्यञ्चः॒ सव्र॑ता भू॒त्वा वाचं॑ वदत भ॒द्रया॑ ॥३॥
mā bhrātā॒ bhrāta॑raṃ dvikṣa॒nmā svasā॑ramu॒ta svasā॑ | sa॒myañcaḥ॒ savra॑tā bhū॒tvā vācaṃ॑ vadata bha॒drayā॑ || ३ ||
येन॑ दे॒वा न वि॒यन्ति॒ नो च॑ विद्वि॒षते॑ मि॒थः ।
तत् कृ॑ण्मो॒ ब्रह्म॑ वो गृ॒हे सं॒ज्ञानं॒ पुरु॑षेभ्यः ॥४॥
yena॑ de॒vā na vi॒yanti॒ no ca॑ vidvi॒ṣate॑ mi॒thaḥ | tat kṛ॑ṇmo॒ brahma॑ vo gṛ॒he saṃ॒jñānaṃ॒ puru॑ṣebhyaḥ || ४ ||
ज्याय॑स्वन्तश्चि॒त्तिनो॒ मा वि यौ॑ष्ट संरा॒धय॑न्तः॒ सधु॑रा॒श्चर॑न्तः ।
अ॒न्यो अ॒न्यस्मै॑ व॒ल्गु वद॑न्त॒ एत॑ सध्री॒चीना॑न् वः॒ संम॑नसस्कृणोमि ॥५॥
jyāya॑svantaści॒ttino॒ mā vi yau॑ṣṭa saṃrā॒dhaya॑ntaḥ॒ sadhu॑rā॒ścara॑ntaḥ | a॒nyo a॒nyasmai॑ va॒lgu vada॑nta॒ eta॑ sadhrī॒cīnā॑n vaḥ॒ saṃma॑nasaskṛṇomi || ५ ||
स॒मा॒नी प्र॒पा स॒ह वो॑ऽन्नभा॒गः स॑मा॒ने योक्त्रे॑ स॒ह वो॑ युनज्मि ।
स॒म्यञ्चो॒ऽग्निं स॑पर्यता॒रा नाभि॑मिवा॒भितः॑ ॥६॥
sa॒mā॒nī pra॒pā sa॒ha vo॑’nnabhā॒gaḥ sa॑mā॒ne yoktre॑ sa॒ha vo॑ yunajmi | sa॒myañco॒’gniṃ sa॑paryatā॒rā nābhi॑mivā॒bhitaḥ॑ || ६ ||
स॒ध्री॒चीना॑न् वः संम॑नसस्कृणो॒म्ये॑क॑श्नुष्टीन्त्सं॒वन॑नेन॒ सर्वा॑न्।
दे॒वा इ॑वा॒मृतं॒ रक्ष॑माणाः सा॒यंप्रा॑तः सौमन॒सो वो॑ अस्तु ॥७॥
sa॒dhrī॒cīnā॑n vaḥ saṃma॑nasaskṛṇo॒mye॑ka॑śnuṣṭīntsaṃ॒vana॑nena॒ sarvā॑n | de॒vā i॑vā॒mṛtaṃ॒ rakṣa॑māṇāḥ sā॒yaṃprā॑taḥ saumana॒so vo॑ astu || ७ ||