EeseDharmaSanātana Library
24काण्ड 3 · सूक्त 24
Atharvaveda Śaunaka Kand 3, Sukta 24.
7 shlokपय॑स्वती॒रोष॑धयः॒ पय॑स्वन्माम॒कं वचः॑ ।
अथो॒ पय॑स्वतीना॒मा भ॑रे॒ऽहं स॑हस्र॒शः ॥१॥
paya॑svatī॒roṣa॑dhayaḥ॒ paya॑svanmāma॒kaṃ vacaḥ॑ | atho॒ paya॑svatīnā॒mā bha॑re॒’haṃ sa॑hasra॒śaḥ || १ ||
वेदा॒हं पय॑स्वन्तं च॒का॑र धा॒न्यं ऽ ब॒हु।
सं॒भृत्वा॒ नाम॒ यो दे॒वस्तं व॒यं ह॑वामहे॒ योयो॒ अय॑ज्वनो गृ॒हे ॥२॥
vedā॒haṃ paya॑svantaṃ ca॒kā॑ra dhā॒nyaṃ ’ ba॒hu | saṃ॒bhṛtvā॒ nāma॒ yo de॒vastaṃ va॒yaṃ ha॑vāmahe॒ yoyo॒ aya॑jvano gṛ॒he || २ ||
इ॒मा याः पञ्च॑ प्र॒दिशो॑ मान॒वीः पञ्च॑ कृ॒ष्टयः॑ ।
वृ॒ष्टे शापं॑ न॒दीरि॑वे॒ह स्फा॒तिं समा॑वहान् ॥३॥
i॒mā yāḥ pañca॑ pra॒diśo॑ māna॒vīḥ pañca॑ kṛ॒ṣṭayaḥ॑ | vṛ॒ṣṭe śāpaṃ॑ na॒dīri॑ve॒ha sphā॒tiṃ samā॑vahān || ३ ||
उदुत्सं॑ श॒तधा॑रं स॒हस्र॑धार॒मक्षि॑तम्।
ए॒वास्माके॒दं धा॒न्यं ऽ स॒हस्र॑धार॒मक्षि॑तम् ॥४॥
udutsaṃ॑ śa॒tadhā॑raṃ sa॒hasra॑dhāra॒makṣi॑tam | e॒vāsmāke॒daṃ dhā॒nyaṃ ’ sa॒hasra॑dhāra॒makṣi॑tam || ४ ||
शत॑हस्त स॒माह॑र॒ सह॑स्रहस्त॒ सं कि॑र ।
कृ॒तस्य॑ का॒र्यऽस्य चे॒ह स्फा॒तिं स॒माव॑ह ॥५॥
śata॑hasta sa॒māha॑ra॒ saha॑srahasta॒ saṃ ki॑ra | kṛ॒tasya॑ kā॒rya’sya ce॒ha sphā॒tiṃ sa॒māva॑ha || ५ ||
ति॒स्रो मात्रा॑ गन्ध॒र्वाणां॒ चत॑स्रो गृ॒हप॑त्न्याः ।
तासां॒ या स्फा॑ति॒मत्त॑मा॒ तया॑ त्वा॒भि मृ॑शामसि ॥६॥
ti॒sro mātrā॑ gandha॒rvāṇāṃ॒ cata॑sro gṛ॒hapa॑tnyāḥ | tāsāṃ॒ yā sphā॑ti॒matta॑mā॒ tayā॑ tvā॒bhi mṛ॑śāmasi || ६ ||
उ॒पो॒हश्च॑ समू॒हश्च॑ क्ष॒त्तारौ॑ ते प्रजापते ।
तावि॒हा व॑हतां स्फा॒तिं ब॒हुं भू॒मान॒मक्षि॑तम् ॥७॥
u॒po॒haśca॑ samū॒haśca॑ kṣa॒ttārau॑ te prajāpate | tāvi॒hā va॑hatāṃ sphā॒tiṃ ba॒huṃ bhū॒māna॒makṣi॑tam || ७ ||