EeseDharmaSanātana Library
14काण्ड 3 · सूक्त 14
Atharvaveda Śaunaka Kand 3, Sukta 14.
6 shlokसं वो॑ गो॒ष्ठेन॑ सु॒षदा॒ सं र॒य्या सं सुभू॑त्या ।
अह॑र्जातस्य॒ यन्नाम॒ तेना॒ वः॒ सं सृ॑जामसि ॥१॥
saṃ vo॑ go॒ṣṭhena॑ su॒ṣadā॒ saṃ ra॒yyā saṃ subhū॑tyā | aha॑rjātasya॒ yannāma॒ tenā॒ vaḥ॒ saṃ sṛ॑jāmasi || १ ||
सं वः॑ सृजत्वर्य॒मा सं पू॒षा सं बृह॒स्पतिः॑ ।
समिन्द्रो॒ यो ध॑नंज॒यो मयि॑ पुष्यत॒ यद् वसु॑ ॥२॥
saṃ vaḥ॑ sṛjatvarya॒mā saṃ pū॒ṣā saṃ bṛha॒spatiḥ॑ | samindro॒ yo dha॑naṃja॒yo mayi॑ puṣyata॒ yad vasu॑ || २ ||
सं॒ज॒ग्मा॒ना अबि॑भ्युषीर॒स्मिन् गो॒ष्ठे क॑री॒षिणीः॑ ।
बिभ्र॑तीः सो॒म्यं मध्व॑नमी॒वा उ॒पेत॑न ॥३॥
saṃ॒ja॒gmā॒nā abi॑bhyuṣīra॒smin go॒ṣṭhe ka॑rī॒ṣiṇīḥ॑ | bibhra॑tīḥ so॒myaṃ madhva॑namī॒vā u॒peta॑na || ३ ||
इ॒हैव गा॑व॒ एत॑ने॒हो शके॑व पुष्यत ।
इ॒हैवोत प्र जा॑यध्वं॒ मयि॑ सं॒ज्ञान॑मस्तु वः ॥४॥
i॒haiva gā॑va॒ eta॑ne॒ho śake॑va puṣyata | i॒haivota pra jā॑yadhvaṃ॒ mayi॑ saṃ॒jñāna॑mastu vaḥ || ४ ||
शि॒वो वो॑ गो॒ष्ठो भ॑वतु शारि॒शाके॑व पुष्यत ।
इ॒हैवोत प्र जा॑यध्वं॒ मया॑ वः॒ सं सृ॑जामसि ॥५॥
śi॒vo vo॑ go॒ṣṭho bha॑vatu śāri॒śāke॑va puṣyata | i॒haivota pra jā॑yadhvaṃ॒ mayā॑ vaḥ॒ saṃ sṛ॑jāmasi || ५ ||
मया॑ गावो॒ गोप॑तिना सचध्वम॒यं वो॑ गो॒ष्ठ इ॒ह पो॑षयि॒ष्णुः ।
रा॒यस्पोषे॑ण बहु॒ला भव॑न्तीर्जी॒वा जीव॑न्ती॒रुप॑ वः सदेम ॥६॥
mayā॑ gāvo॒ gopa॑tinā sacadhvama॒yaṃ vo॑ go॒ṣṭha i॒ha po॑ṣayi॒ṣṇuḥ | rā॒yaspoṣe॑ṇa bahu॒lā bhava॑ntīrjī॒vā jīva॑ntī॒rupa॑ vaḥ sadema || ६ ||