EeseDharmaSanātana Library
13काण्ड 3 · सूक्त 13
Atharvaveda Śaunaka Kand 3, Sukta 13.
7 shlokयद॒दः सं॑प्रय॒तीरहा॒वन॑दता हते॑।
तस्मा॒दा न॒द्यो॒३ नाम॑ स्थ॒ ता वो॒ नामा॑नि सिन्धवः ॥१॥
yada॒daḥ saṃ॑praya॒tīrahā॒vana॑datā hate॑ | tasmā॒dā na॒dyo॒३ nāma॑ stha॒ tā vo॒ nāmā॑ni sindhavaḥ || १ ||
यत् प्रेषि॑ता॒ वरु॑णे॒नाच्छीभं॑ स॒मव॑ल्गत ।
तदा॑प्नो॒दिन्द्रो॑ वो य॒तीस्तस्मा॑दापो॒ अनु॑ ष्ठन ॥२॥
yat preṣi॑tā॒ varu॑ṇe॒nācchībhaṃ॑ sa॒mava॑lgata | tadā॑pno॒dindro॑ vo ya॒tīstasmā॑dāpo॒ anu॑ ṣṭhana || २ ||
अ॒प॒का॒मं स्यन्द॑माना॒ अवी॑वरत वो॒ हि क॑म्।
इन्द्रो॑ वः॒ शक्ति॑भिर्देवी॒स्तस्मा॒द् वार्नाम॑ वो हि॒तम् ॥३॥
a॒pa॒kā॒maṃ syanda॑mānā॒ avī॑varata vo॒ hi ka॑m | indro॑ vaḥ॒ śakti॑bhirdevī॒stasmā॒d vārnāma॑ vo hi॒tam || ३ ||
एको॑ वो दे॒वोऽप्य॑तिष्ठ॒त् स्यन्द॑माना यथाव॒शम्।
उदा॑निषुर्म॒हीरिति॒ तस्मा॑दुद॒कमु॑च्यते ॥४॥
eko॑ vo de॒vo’pya॑tiṣṭha॒t syanda॑mānā yathāva॒śam | udā॑niṣurma॒hīriti॒ tasmā॑duda॒kamu॑cyate || ४ ||
आपो॑ भ॒द्रा घृ॒तमिदाप॑ आसन्न॒ग्नीषोमौ॑ बिभ्र॒त्याप॒ इत् ताः।
ती॒व्रो रसो॑ मधुपृचा॑मरंग॒म आ मा॑ प्रा॒णेन॑ स॒ह वर्च॑सा गमेत् ॥५॥
āpo॑ bha॒drā ghṛ॒tamidāpa॑ āsanna॒gnīṣomau॑ bibhra॒tyāpa॒ it tāḥ | tī॒vro raso॑ madhupṛcā॑maraṃga॒ma ā mā॑ prā॒ṇena॑ sa॒ha varca॑sā gamet || ५ ||
आदित् प॑श्याम्यु॒त वा॑ शृणो॒म्या मा॒ घोषो॑ गच्छति॒ वाङ् मा॑साम्।
मन्ये॑ भेजा॒नो अ॒मृत॑स्य तर्हि॒ हिर॑ण्यवर्णा॒ अतृ॑पं य॒दा वः॑ ॥६॥
ādit pa॑śyāmyu॒ta vā॑ śṛṇo॒myā mā॒ ghoṣo॑ gacchati॒ vāṅ mā॑sām | manye॑ bhejā॒no a॒mṛta॑sya tarhi॒ hira॑ṇyavarṇā॒ atṛ॑paṃ ya॒dā vaḥ॑ || ६ ||
इ॒दं व॑ आपो॒ हृद॑यम॒यं व॒त्स ऋ॑तावरीः ।
इ॒हेत्थमेत॑ शक्वरी॒र्यत्रे॒दं वे॒शया॑मि वः ॥७॥
i॒daṃ va॑ āpo॒ hṛda॑yama॒yaṃ va॒tsa ṛ॑tāvarīḥ | i॒hetthameta॑ śakvarī॒ryatre॒daṃ ve॒śayā॑mi vaḥ || ७ ||