EeseDharmaSanātana Library
94काण्ड 20 · सूक्त 94
Atharvaveda Śaunaka Kand 20, Sukta 94.
11 shlokआ या॒त्विन्द्रः॒ स्वप॑ति॒र्मदा॑य॒ यो धर्म॑णा तूतुजा॒नस्तुवि॑ष्मान्।
प्र॒त्व॒क्षा॒णो अति॒ विश्वा॒ सहां॑स्यपा॒रेण॑ मह॒ता वृष्ण्ये॑न ॥१॥
ā yā॒tvindraḥ॒ svapa॑ti॒rmadā॑ya॒ yo dharma॑ṇā tūtujā॒nastuvi॑ṣmān | pra॒tva॒kṣā॒ṇo ati॒ viśvā॒ sahāṃ॑syapā॒reṇa॑ maha॒tā vṛṣṇye॑na || १ ||
सु॒ष्ठामा॒ रथः॑ सु॒यमा॒ हरी॑ ते मि॒म्यक्ष॒ वज्रो॑ नृप॑ते॒ गभ॑स्तौ ।
शीभं॑ राजन् सु॒पथा या॑ह्य॒र्वाङ् वर्धा॑म ते प॒पुषो॒ वृष्ण्या॑नि ॥२॥
su॒ṣṭhāmā॒ rathaḥ॑ su॒yamā॒ harī॑ te mi॒myakṣa॒ vajro॑ nṛpa॑te॒ gabha॑stau | śībhaṃ॑ rājan su॒pathā yā॑hya॒rvāṅ vardhā॑ma te pa॒puṣo॒ vṛṣṇyā॑ni || २ ||
एन्द्र॒वाहो॑ नृ॒पतिं॒ वज्र॑बाहुमु॒ग्रमु॒ग्रास॑स्तवि॒षास॑ एनम्।
प्रत्व॑क्षसं वृष॒भं स॒त्यशु॑ष्म॒मेम॑स्म॒त्रा स॑ध॒मादो॑ वहन्तु ॥३॥
endra॒vāho॑ nṛ॒patiṃ॒ vajra॑bāhumu॒gramu॒grāsa॑stavi॒ṣāsa॑ enam | pratva॑kṣasaṃ vṛṣa॒bhaṃ sa॒tyaśu॑ṣma॒mema॑sma॒trā sa॑dha॒mādo॑ vahantu || ३ ||
ए॒वा पतिं॑ द्रोण॒साचं॒ सचे॑तसमू॒र्ज स्क॒म्भं ध॒रुण॒ आ वृ॑षायसे ।
ओजः॑ कृष्व॒ सं गृ॑भाय॒ त्वे अप्यसो॒ यथा॑ केनि॒पाना॑मि॒नो वृ॒धे ॥४॥
e॒vā patiṃ॑ droṇa॒sācaṃ॒ sace॑tasamū॒rja ska॒mbhaṃ dha॒ruṇa॒ ā vṛ॑ṣāyase | ojaḥ॑ kṛṣva॒ saṃ gṛ॑bhāya॒ tve apyaso॒ yathā॑ keni॒pānā॑mi॒no vṛ॒dhe || ४ ||
गम॑न्न॒स्मे वसू॒न्या हि शंसि॑षं स्वा॒शिषं॒ भर॒मा या॑हि सो॒मिनः॑ ।
त्वमी॑शिषे॒ सास्मिन्ना स॑त्सि ब॒र्हिष्य॑नाधृ॒ष्या तव॒ पात्रा॑णि॒ धर्म॑णा ॥५॥
gama॑nna॒sme vasū॒nyā hi śaṃsi॑ṣaṃ svā॒śiṣaṃ॒ bhara॒mā yā॑hi so॒minaḥ॑ | tvamī॑śiṣe॒ sāsminnā sa॑tsi ba॒rhiṣya॑nādhṛ॒ṣyā tava॒ pātrā॑ṇi॒ dharma॑ṇā || ५ ||
पृथ॒क् प्राय॑न् प्रथ॒मा दे॒वहू॑त॒योऽकृ॑ण्वत श्रव॒स्याऽनि दु॒ष्टरा॑ ।
न ये शे॒कुर्य॒ज्ञियां॒ नाव॑मा॒रुह॑मी॒र्मैव ते न्य॑विशन्त॒ केप॑यः ॥६॥
pṛtha॒k prāya॑n pratha॒mā de॒vahū॑ta॒yo’kṛ॑ṇvata śrava॒syā’ni du॒ṣṭarā॑ | na ye śe॒kurya॒jñiyāṃ॒ nāva॑mā॒ruha॑mī॒rmaiva te nya॑viśanta॒ kepa॑yaḥ || ६ ||
ए॒वैवापा॒गप॑रे सन्तु दू॒ढ्योऽश्वा॒ येषां॑ दु॒र्युज॑ आयुयु॒ज्रे।
इ॒त्था ये प्रागुप॑रे॒ सन्ति॑ दा॒वने॑ पु॒रूणि॒ यत्र॑ व॒युना॑नि॒ भोज॑ना ॥७॥
e॒vaivāpā॒gapa॑re santu dū॒ḍhyo’śvā॒ yeṣāṃ॑ du॒ryuja॑ āyuyu॒jre | i॒tthā ye prāgupa॑re॒ santi॑ dā॒vane॑ pu॒rūṇi॒ yatra॑ va॒yunā॑ni॒ bhoja॑nā || ७ ||
गि॒रींरज्रा॒न् रेज॑मानां अधारय॒द् द्यौः क्र॑न्दद॒न्तरि॑क्षाणि कोपयत्।
स॒मी॒ची॒ने धि॒षणे॒ वि ष्क॑भायति॒ वृष्णः॑ पी॒त्वा मद॑ उ॒क्थानि॑ शंसति ॥८॥
gi॒rīṃrajrā॒n reja॑mānāṃ adhāraya॒d dyauḥ kra॑ndada॒ntari॑kṣāṇi kopayat | sa॒mī॒cī॒ne dhi॒ṣaṇe॒ vi ṣka॑bhāyati॒ vṛṣṇaḥ॑ pī॒tvā mada॑ u॒kthāni॑ śaṃsati || ८ ||
इ॒मं बि॑भर्मि॒ सुकृ॑तं ते अङ्कु॒शं येना॑रु॒जासि॑ मघवं छफा॒रुजः॑ ।
अ॒स्मिन्त्सु ते॒ सव॑ने अस्त्वो॒क्त्यं सु॒त इ॒ष्टौ म॑घवन् बो॒ध्याभ॑गः ॥९॥
i॒maṃ bi॑bharmi॒ sukṛ॑taṃ te aṅku॒śaṃ yenā॑ru॒jāsi॑ maghavaṃ chaphā॒rujaḥ॑ | a॒smintsu te॒ sava॑ne astvo॒ktyaṃ su॒ta i॒ṣṭau ma॑ghavan bo॒dhyābha॑gaḥ || ९ ||
गोभि॑ष्टरे॒माम॑तिं दु॒रेवां॒ यवे॑न॒ क्षुधं॑ पुरुहूत॒ विश्वा॑म्।
व॒यं राज॑भिः प्रथ॒मा धना॑न्य॒स्माके॑न वृ॒जने॑ना जयेम ॥१०॥
gobhi॑ṣṭare॒māma॑tiṃ du॒revāṃ॒ yave॑na॒ kṣudhaṃ॑ puruhūta॒ viśvā॑m | va॒yaṃ rāja॑bhiḥ pratha॒mā dhanā॑nya॒smāke॑na vṛ॒jane॑nā jayema || १० ||
बृह॒स्पति॑र्नः॒ परि॑ पातु प॒श्चादु॒तोत्त॑रस्मा॒दध॑रादघा॒योः ।
इन्द्रः॑ पु॒रस्ता॑दु॒त म॑ध्य॒तो नः॒ सखा॒ सखि॑भ्यो॒ वरि॑वः कृणोतु ॥११॥
bṛha॒spati॑rnaḥ॒ pari॑ pātu pa॒ścādu॒totta॑rasmā॒dadha॑rādaghā॒yoḥ | indraḥ॑ pu॒rastā॑du॒ta ma॑dhya॒to naḥ॒ sakhā॒ sakhi॑bhyo॒ vari॑vaḥ kṛṇotu || ११ ||