EeseDharmaSanātana Library
93काण्ड 20 · सूक्त 93
Atharvaveda Śaunaka Kand 20, Sukta 93.
21 shlokउत् त्वा॑ मन्दन्तु॒ स्तोमाः॑ कृणु॒ष्व राधो॑ अद्रिवः । अव॑ ब्रह्म॒द्विषो॑ जहि ॥१॥
ut tvā॑ mandantu॒ stomāḥ॑ kṛṇu॒ṣva rādho॑ adrivaḥ | ava॑ brahma॒dviṣo॑ jahi || १ ||
प॒दा प॒णींर॑रा॒धसो॒ नि बा॑धस्व म॒हां अ॑सि । न॒हि त्वा॒ कश्च॒न प्रति॑ ॥२॥
pa॒dā pa॒ṇīṃra॑rā॒dhaso॒ ni bā॑dhasva ma॒hāṃ a॑si | na॒hi tvā॒ kaśca॒na prati॑ || २ ||
त्वमी॑शिषे सु॒ताना॒मिन्द्र॒ त्वमसु॑तानाम्। त्वं राजा॒ जना॑नाम् ॥३॥
tvamī॑śiṣe su॒tānā॒mindra॒ tvamasu॑tānām | tvaṃ rājā॒ janā॑nām || ३ ||
ई॒ङ्खय॑न्तीरप॒स्युव॒ इन्द्रं॑ जा॒तमुपा॑सते । भे॒जा॒नासः॑ सु॒वीर्य॑म् ॥४॥
ī॒ṅkhaya॑ntīrapa॒syuva॒ indraṃ॑ jā॒tamupā॑sate | bhe॒jā॒nāsaḥ॑ su॒vīrya॑m || ४ ||
त्वमि॑न्द्र॒ बला॒दधि॒ सह॑सो जा॒त ओज॑सः । त्वं वृ॑ष॒न् वृषेद॑सि ॥५॥
tvami॑ndra॒ balā॒dadhi॒ saha॑so jā॒ta oja॑saḥ | tvaṃ vṛ॑ṣa॒n vṛṣeda॑si || ५ ||
त्वमि॑न्द्रासि वृत्र॒हा व्य॑१न्तरि॑क्षमतिरः । उद् द्याम॑स्तभ्ना॒ ओज॑सा ॥६॥
tvami॑ndrāsi vṛtra॒hā vya॑१ntari॑kṣamatiraḥ | ud dyāma॑stabhnā॒ oja॑sā || ६ ||
त्वमि॑न्द्र स॒जोष॑सम॒र्कं बि॑भर्षि बा॒ह्वोः । वज्रं॒ शिशा॑न॒ ओज॑सा ॥७॥
tvami॑ndra sa॒joṣa॑sama॒rkaṃ bi॑bharṣi bā॒hvoḥ | vajraṃ॒ śiśā॑na॒ oja॑sā || ७ ||
त्वमि॑न्द्राभि॒भूर॑सि॒ विश्वा॑ जा॒तान्योज॑सा । स विश्वा॒ भुव॒ आभ॑वः ॥८॥
tvami॑ndrābhi॒bhūra॑si॒ viśvā॑ jā॒tānyoja॑sā | sa viśvā॒ bhuva॒ ābha॑vaḥ || ८ ||
सु॒दे॒वो अ॑सि वरुण॒ यस्य॑ ते स॒प्त सिन्ध॑वः ।
अ॒नु॒क्षर॑न्ति का॒कुदं॑ सू॒र्यं सुषि॒रामि॑व ॥९॥
su॒de॒vo a॑si varuṇa॒ yasya॑ te sa॒pta sindha॑vaḥ | a॒nu॒kṣara॑nti kā॒kudaṃ॑ sū॒ryaṃ suṣi॒rāmi॑va || ९ ||
यो व्यतीं॒रफा॑णय॒त् सुयु॑क्तां॒ उप॑ दा॒शुषे॑ ।
त॒क्वो ने॒ता तदिद् वपु॑रुप॒मा यो अमु॑च्यत ॥१०॥
yo vyatīṃ॒raphā॑ṇaya॒t suyu॑ktāṃ॒ upa॑ dā॒śuṣe॑ | ta॒kvo ne॒tā tadid vapu॑rupa॒mā yo amu॑cyata || १० ||
अतीदु॑ श॒क्र ओ॑हत॒ इन्द्रो॒ विश्वा॒ अति॒ द्विषः॑ ।
भि॒नत् क॒नीन॑ ओद॒नं प॒च्यमा॑नं प॒रो गि॒रा ॥११॥
atīdu॑ śa॒kra o॑hata॒ indro॒ viśvā॒ ati॒ dviṣaḥ॑ | bhi॒nat ka॒nīna॑ oda॒naṃ pa॒cyamā॑naṃ pa॒ro gi॒rā || ११ ||
अ॒र्भ॒को न कु॑मार॒कोऽधि॑ तिष्ठ॒न्नवं॒ रथ॑म्।
स प॑क्षन्महि॒षं मृ॒गं पि॒त्रे मा॒त्रे वि॑भु॒क्रतु॑म् ॥१२॥
a॒rbha॒ko na ku॑māra॒ko’dhi॑ tiṣṭha॒nnavaṃ॒ ratha॑m | sa pa॑kṣanmahi॒ṣaṃ mṛ॒gaṃ pi॒tre mā॒tre vi॑bhu॒kratu॑m || १२ ||
आ तू सु॑शिप्र दंपते॒ रथं॑ तिष्ठा हिर॒ण्यय॑म्।
अध॑ द्यु॒क्षं स॑चेवहि स॒हस्र॑पादमरु॒षं स्व॑स्ति॒गाम॑ने॒हस॑म् ॥१३॥
ā tū su॑śipra daṃpate॒ rathaṃ॑ tiṣṭhā hira॒ṇyaya॑m | adha॑ dyu॒kṣaṃ sa॑cevahi sa॒hasra॑pādamaru॒ṣaṃ sva॑sti॒gāma॑ne॒hasa॑m || १३ ||
तं घे॑मि॒त्था न॑म॒स्विन॒ उप॑ स्व॒राज॑मासते ।
अर्थं॑ चिदस्य॒ सुधि॑तं॒ यदेत॑व आव॒र्तय॑न्ति दा॒वने॑ ॥१४॥
taṃ ghe॑mi॒tthā na॑ma॒svina॒ upa॑ sva॒rāja॑māsate | arthaṃ॑ cidasya॒ sudhi॑taṃ॒ yadeta॑va āva॒rtaya॑nti dā॒vane॑ || १४ ||
अनु॑ प्र॒त्नस्यौक॑सः प्रि॒यमे॑धास एषाम्।
पूर्वा॒मनु॒ प्रय॑तिं वृ॒क्तब॑र्हिषो हि॒तप्र॑यस आशत ॥१५॥
anu॑ pra॒tnasyauka॑saḥ pri॒yame॑dhāsa eṣām | pūrvā॒manu॒ praya॑tiṃ vṛ॒ktaba॑rhiṣo hi॒tapra॑yasa āśata || १५ ||
यो राजा॑ चर्षणी॒नां याता॒ रथे॑भि॒रध्रि॑गुः ।
विश्वा॑सां तरु॒ता पृत॑नानां॒ ज्येष्ठो॒ यो वृ॑त्र॒हा गृ॒णे ॥१६॥
yo rājā॑ carṣaṇī॒nāṃ yātā॒ rathe॑bhi॒radhri॑guḥ | viśvā॑sāṃ taru॒tā pṛta॑nānāṃ॒ jyeṣṭho॒ yo vṛ॑tra॒hā gṛ॒ṇe || १६ ||
इन्द्रं॒ तं शु॑म्भ पुरुहन्म॒न्नव॑से॒ यस्य॑ द्वि॒ता वि॑ध॒र्तरि॑ ।
हस्ता॑य॒ वज्रः॒ प्रति॑ धायि दर्श॒तो म॒हो दि॒वे न सूर्यः॑ ॥१७॥
indraṃ॒ taṃ śu॑mbha puruhanma॒nnava॑se॒ yasya॑ dvi॒tā vi॑dha॒rtari॑ | hastā॑ya॒ vajraḥ॒ prati॑ dhāyi darśa॒to ma॒ho di॒ve na sūryaḥ॑ || १७ ||
नकि॒ष्टं कर्म॑णा नश॒द् यश्च॒कार॑ स॒दावृ॑धम्।
इन्द्रं॒ न य॒ज्ञैर्वि॒श्वगू॑र्त॒मृभ्व॑स॒मधृ॑ष्टं धृ॒ष्ण्वोऽजसम् ॥१८॥
naki॒ṣṭaṃ karma॑ṇā naśa॒d yaśca॒kāra॑ sa॒dāvṛ॑dham | indraṃ॒ na ya॒jñairvi॒śvagū॑rta॒mṛbhva॑sa॒madhṛ॑ṣṭaṃ dhṛ॒ṣṇvo’jasam || १८ ||
अषा॑ल्हमु॒ग्रं पृत॑नासु सास॒हिं यस्मि॑न् म॒हीरु॑रु॒ज्रयः॑ ।
सं धे॒नवो॒ जाय॑माने अनोनवु॒र्द्यावः॒ क्षामो॑ अनोनवुः ॥१९॥
aṣā॑lhamu॒graṃ pṛta॑nāsu sāsa॒hiṃ yasmi॑n ma॒hīru॑ru॒jrayaḥ॑ | saṃ dhe॒navo॒ jāya॑māne anonavu॒rdyāvaḥ॒ kṣāmo॑ anonavuḥ || १९ ||
यद् द्याव॑ इन्द्र ते श॒तं श॒तं भूमी॑रु॒त स्युः ।
न त्वा॑ वज्रिन्त्स॒हस्रं॒ सूर्या॒ अनु॒ न जा॒तम॑ष्ट॒ रोद॑सी ॥२०॥
yad dyāva॑ indra te śa॒taṃ śa॒taṃ bhūmī॑ru॒ta syuḥ | na tvā॑ vajrintsa॒hasraṃ॒ sūryā॒ anu॒ na jā॒tama॑ṣṭa॒ roda॑sī || २० ||
आ प॑प्राथ महि॒ना वृष्ण्या॑ वृष॒न् विश्वा॑ शविष्ठ॒ शव॑सा ।
अ॒स्मां अ॑व मघव॒न् गोम॑ति व्र॒जे वज्रिं॑ चि॒त्राभि॑रू॒तिभिः॑ ॥२१॥
ā pa॑prātha mahi॒nā vṛṣṇyā॑ vṛṣa॒n viśvā॑ śaviṣṭha॒ śava॑sā | a॒smāṃ a॑va maghava॒n goma॑ti vra॒je vajriṃ॑ ci॒trābhi॑rū॒tibhiḥ॑ || २१ ||