EeseDharmaSanātana Library
89काण्ड 20 · सूक्त 89
Atharvaveda Śaunaka Kand 20, Sukta 89.
11 shlokअस्ते॑व॒ सु प्र॑त॒रं लाय॒मस्य॒न् भूष॑न्निव॒ प्र भ॑रा॒ स्तोम॑मस्मै ।
वा॒चा वि॑प्रास्तरत॒ वाच॑म॒र्यो नि रा॑मय जरितः॒ सोम॒ इन्द्र॑म् ॥१॥
aste॑va॒ su pra॑ta॒raṃ lāya॒masya॒n bhūṣa॑nniva॒ pra bha॑rā॒ stoma॑masmai | vā॒cā vi॑prāstarata॒ vāca॑ma॒ryo ni rā॑maya jaritaḥ॒ soma॒ indra॑m || १ ||
दोहे॑न॒ गामुप॑ शिक्षा॒ सखा॑यं॒ प्र बो॑धय जरितर्जा॒रमिन्द्र॑म्।
कोशं॒ न पू॒र्णं वसु॑ना॒ न्यृ॑ष्ट॒मा च्या॑वय मघ॒देया॑य॒ शूर॑म् ॥२॥
dohe॑na॒ gāmupa॑ śikṣā॒ sakhā॑yaṃ॒ pra bo॑dhaya jaritarjā॒ramindra॑m | kośaṃ॒ na pū॒rṇaṃ vasu॑nā॒ nyṛ॑ṣṭa॒mā cyā॑vaya magha॒deyā॑ya॒ śūra॑m || २ ||
किम॒ङ्ग त्वा॑ मघवन् भो॒जमा॑हुः शिशी॒हि मा॑ शिश॒यं त्वा॑ शृणोमि ।
अप्न॑स्वती॒ मम॒ धीर॑स्तु शक्र वसु॒विदं॒ भग॑मि॒न्द्रा भ॑रा नः ॥३॥
kima॒ṅga tvā॑ maghavan bho॒jamā॑huḥ śiśī॒hi mā॑ śiśa॒yaṃ tvā॑ śṛṇomi | apna॑svatī॒ mama॒ dhīra॑stu śakra vasu॒vidaṃ॒ bhaga॑mi॒ndrā bha॑rā naḥ || ३ ||
त्वां जना॑ ममस॒त्येष्वि॑न्द्र संतस्था॒ना वि ह्व॑यन्ते समी॒के।
अत्रा॒ युजं॑ कृणुते॒ यो ह॒विष्मा॒न्नासु॑न्वता स॒ख्यं व॑ष्टि॒ शूरः॑ ॥४॥
tvāṃ janā॑ mamasa॒tyeṣvi॑ndra saṃtasthā॒nā vi hva॑yante samī॒ke | atrā॒ yujaṃ॑ kṛṇute॒ yo ha॒viṣmā॒nnāsu॑nvatā sa॒khyaṃ va॑ṣṭi॒ śūraḥ॑ || ४ ||
धनं॒ न स्प॒न्द्रं ब॑हु॒लं यो अ॑स्मै ती॒व्रान्त्सोमां॑ आसु॒नोति॒ प्रय॑स्वान्।
तस्मै॒ शत्रू॑न्त्सु॒तुका॑न् प्रा॒तरह्नो॒ नि स्वष्ट्रा॑न् यु॒वति॒ हन्ति॑ वृ॒त्रम् ॥५॥
dhanaṃ॒ na spa॒ndraṃ ba॑hu॒laṃ yo a॑smai tī॒vrāntsomāṃ॑ āsu॒noti॒ praya॑svān | tasmai॒ śatrū॑ntsu॒tukā॑n prā॒tarahno॒ ni svaṣṭrā॑n yu॒vati॒ hanti॑ vṛ॒tram || ५ ||
यस्मि॑न् व॒यं द॑धि॒मा शंस॒मिन्द्रे॒ यः शि॒श्राय॑ म॒घवा॒ काम॑म॒स्मे।
आ॒राच्चि॒त् सन् भ॑यतामस्य॒ शत्रु॒र्न्यऽस्मै द्यु॒म्ना जन्या॑ नमन्ताम् ॥६॥
yasmi॑n va॒yaṃ da॑dhi॒mā śaṃsa॒mindre॒ yaḥ śi॒śrāya॑ ma॒ghavā॒ kāma॑ma॒sme | ā॒rācci॒t san bha॑yatāmasya॒ śatru॒rnya’smai dyu॒mnā janyā॑ namantām || ६ ||
आ॒राच्छत्रु॒मप॑ बाधस्व दू॒रमु॒ग्रो यः शम्बः॑ पुरुहूत॒ तेन॑ ।
अ॒स्मे धे॑हि॒ यव॑म॒द् गोमदिन्द्र कृ॒धी धियं॑ जरि॒त्रे वाज॑रत्नाम् ॥७॥
ā॒rācchatru॒mapa॑ bādhasva dū॒ramu॒gro yaḥ śambaḥ॑ puruhūta॒ tena॑ | a॒sme dhe॑hi॒ yava॑ma॒d gomadindra kṛ॒dhī dhiyaṃ॑ jari॒tre vāja॑ratnām || ७ ||
प्र यम॒न्तर्वृ॑षस॒वासो॒ अग्म॑न् ती॒व्राः सोमा॑ बहु॒लान्ता॑स॒ इन्द्र॑म्।
नाह॑ दा॒मानं॑ म॒घवा॒ नि यं॑स॒न् नि सु॑न्व॒ते व॑हति॒ भूरि॑ वा॒मम् ॥८॥
pra yama॒ntarvṛ॑ṣasa॒vāso॒ agma॑n tī॒vrāḥ somā॑ bahu॒lāntā॑sa॒ indra॑m | nāha॑ dā॒mānaṃ॑ ma॒ghavā॒ ni yaṃ॑sa॒n ni su॑nva॒te va॑hati॒ bhūri॑ vā॒mam || ८ ||
उ॒त प्र॒हामति॑दीवा जयति कृ॒तमि॑व श्व॒घ्नी वि चि॑नोति काले।
यो दे॒वका॑मो॒ न धनं॑ रु॒णद्धि॒ समित् तं रा॒यः सृ॑जति स्व॒धाभिः॑ ॥९॥
u॒ta pra॒hāmati॑dīvā jayati kṛ॒tami॑va śva॒ghnī vi ci॑noti kāle | yo de॒vakā॑mo॒ na dhanaṃ॑ ru॒ṇaddhi॒ samit taṃ rā॒yaḥ sṛ॑jati sva॒dhābhiḥ॑ || ९ ||
गोभि॑ष्टरे॒माम॑तिं दु॒रेवां॒ यवे॑न वा॒ क्षुधं॑ पुरुहूत॒ विश्वे॑ ।
व॒यं राज॑सु प्रथ॒मा धना॒न्यरि॑ष्टासो वृज॒नीभि॑र्जयेम ॥१०॥
gobhi॑ṣṭare॒māma॑tiṃ du॒revāṃ॒ yave॑na vā॒ kṣudhaṃ॑ puruhūta॒ viśve॑ | va॒yaṃ rāja॑su pratha॒mā dhanā॒nyari॑ṣṭāso vṛja॒nībhi॑rjayema || १० ||
बृह॒स्पति॑र्नः॒ परि॑ पातु प॒श्चादु॒तोत्त॑रस्मा॒दध॑रादघा॒योः ।
इन्द्रः॑ पु॒रस्ता॑दु॒त म॑ध्य॒तो नः॒ सखा॒ सखि॑भ्यो॒ वरी॑यः कृणोतु ॥११॥
bṛha॒spati॑rnaḥ॒ pari॑ pātu pa॒ścādu॒totta॑rasmā॒dadha॑rādaghā॒yoḥ | indraḥ॑ pu॒rastā॑du॒ta ma॑dhya॒to naḥ॒ sakhā॒ sakhi॑bhyo॒ varī॑yaḥ kṛṇotu || ११ ||