EeseDharmaSanātana Library
69काण्ड 20 · सूक्त 69
Atharvaveda Śaunaka Kand 20, Sukta 69.
12 shlokस घा॑ नो॒ योग॒ आ भु॑व॒त् स रा॒ये स पुरं॑ध्याम्। गम॒द् वाजे॑भि॒रा स नः॑ ॥१॥
sa ghā॑ no॒ yoga॒ ā bhu॑va॒t sa rā॒ye sa puraṃ॑dhyām | gama॒d vāje॑bhi॒rā sa naḥ॑ || १ ||
यस्य॑ सं॒स्थे न वृ॒ण्वते॒ हरी॑ स॒मत्सु॒ शत्र॑वः । तस्मा॒ इन्द्रा॑य गायत ॥२॥
yasya॑ saṃ॒sthe na vṛ॒ṇvate॒ harī॑ sa॒matsu॒ śatra॑vaḥ | tasmā॒ indrā॑ya gāyata || २ ||
सु॒त॒पाव्ने॑ सु॒ता इ॒मे शुच॑यो यन्ति वी॒तये॑ । सोमा॑सो॒ दध्या॑शिरः ॥३॥
su॒ta॒pāvne॑ su॒tā i॒me śuca॑yo yanti vī॒taye॑ | somā॑so॒ dadhyā॑śiraḥ || ३ ||
त्वं सु॒तस्य॑ पी॒तये॑ स॒द्यो वृ॒द्धो अ॑जायथाः । इन्द्र॒ ज्यैष्ठ्या॑य सुक्रतो ॥४॥
tvaṃ su॒tasya॑ pī॒taye॑ sa॒dyo vṛ॒ddho a॑jāyathāḥ | indra॒ jyaiṣṭhyā॑ya sukrato || ४ ||
आ त्वा॑ विशन्त्वा॒शवः॒ सोमा॑स इन्द्र गिर्वणः । शं ते॑ सन्तु॒ प्रचे॑तसे ॥५॥
ā tvā॑ viśantvā॒śavaḥ॒ somā॑sa indra girvaṇaḥ | śaṃ te॑ santu॒ prace॑tase || ५ ||
त्वां स्तोमा॑ अवीवृध॒न् त्वामु॒क्था श॑तक्रतो । त्वां व॑र्धन्तु नो॒ गिरः॑ ॥६॥
tvāṃ stomā॑ avīvṛdha॒n tvāmu॒kthā śa॑takrato | tvāṃ va॑rdhantu no॒ giraḥ॑ || ६ ||
अक्षि॑तोतिः सनेदि॒मं वाज॒मिन्द्रः॑ सह॒स्रिण॑म्। यस्मि॒न् विश्वा॑नि॒ पौंस्या॑ ॥७॥
akṣi॑totiḥ sanedi॒maṃ vāja॒mindraḥ॑ saha॒sriṇa॑m | yasmi॒n viśvā॑ni॒ pauṃsyā॑ || ७ ||
मा नो॒ मर्ता॑ अ॒भि द्रु॑हन् त॒नूना॑मिन्द्र गिर्वणः । ईशा॑नो यवया व॒धम् ॥८॥
mā no॒ martā॑ a॒bhi dru॑han ta॒nūnā॑mindra girvaṇaḥ | īśā॑no yavayā va॒dham || ८ ||
यु॒ञ्जन्ति॑ ब्र॒ध्नम॑रु॒षं चर॑न्तं॒ परि॑ त॒स्थुषः॑ । रोच॑न्ते रोच॒ना दि॒वि ॥९॥
yu॒ñjanti॑ bra॒dhnama॑ru॒ṣaṃ cara॑ntaṃ॒ pari॑ ta॒sthuṣaḥ॑ | roca॑nte roca॒nā di॒vi || ९ ||
यु॒ञ्जन्त्य॑स्य॒ काम्या॒ हरी॒ विप॑क्षसा॒ रथे॑ । शोणा॑ धृ॒ष्णू नृ॒वाह॑सा ॥१०॥
yu॒ñjantya॑sya॒ kāmyā॒ harī॒ vipa॑kṣasā॒ rathe॑ | śoṇā॑ dhṛ॒ṣṇū nṛ॒vāha॑sā || १० ||
के॒तुं कृ॒ण्वन्न॑के॒तवे॒ पेशो॑ मर्या अपे॒शसे॑ । समु॒षद्भि॑रजायथाः ॥११॥
ke॒tuṃ kṛ॒ṇvanna॑ke॒tave॒ peśo॑ maryā ape॒śase॑ | samu॒ṣadbhi॑rajāyathāḥ || ११ ||
आदह॑ स्व॒धामनु॒ पुन॑र्गर्भ॒त्वमे॑रि॒रे। दधा॑ना॒ नाम॑ य॒ज्ञिय॑म् ॥१२॥
ādaha॑ sva॒dhāmanu॒ puna॑rgarbha॒tvame॑ri॒re | dadhā॑nā॒ nāma॑ ya॒jñiya॑m || १२ ||