EeseDharmaSanātana Library
63काण्ड 20 · सूक्त 63
Atharvaveda Śaunaka Kand 20, Sukta 63.
9 shlokइ॒मा नु कं॒ भुव॑ना सीषधा॒मेन्द्र॑श्च॒ विश्वे॑ च दे॒वाः ।
य॒ज्ञं च॑ नस्त॒न्वं च प्र॒जां चा॑दि॒त्यैरिन्द्रः॑ स॒ह ची॑क्लृपाति ॥१॥
i॒mā nu kaṃ॒ bhuva॑nā sīṣadhā॒mendra॑śca॒ viśve॑ ca de॒vāḥ | ya॒jñaṃ ca॑ nasta॒nvaṃ ca pra॒jāṃ cā॑di॒tyairindraḥ॑ sa॒ha cī॑klṛpāti || १ ||
आ॒दि॒त्यैरिन्द्रः॒ सग॑णो म॒रुद्भि॑र॒स्माकं॑ भूत्ववि॒ता त॒नूना॑म्।
ह॒त्वाय॑ दे॒वा असु॑रा॒न् यदाय॑न् दे॒वा दे॑व॒त्वम॑भि॒रक्ष॑माणाः ॥२॥
ā॒di॒tyairindraḥ॒ saga॑ṇo ma॒rudbhi॑ra॒smākaṃ॑ bhūtvavi॒tā ta॒nūnā॑m | ha॒tvāya॑ de॒vā asu॑rā॒n yadāya॑n de॒vā de॑va॒tvama॑bhi॒rakṣa॑māṇāḥ || २ ||
प्र॒त्यञ्च॑म॒र्कम॑नयं॒ छची॑भि॒रादित् स्व॒धामि॑षि॒रां पर्य॑पश्यन्।
अ॒या वाजं॑ दे॒वहि॑तं सनेम॒ मदे॑म श॒तहि॑माः सु॒वीराः॑ ॥३॥
pra॒tyañca॑ma॒rkama॑nayaṃ॒ chacī॑bhi॒rādit sva॒dhāmi॑ṣi॒rāṃ parya॑paśyan | a॒yā vājaṃ॑ de॒vahi॑taṃ sanema॒ made॑ma śa॒tahi॑māḥ su॒vīrāḥ॑ || ३ ||
य एक॒ इद् वि॒दय॑ते॒ वसु॒ मर्ता॑य दा॒शुषे॑ । ईशा॑नो॒ अप्र॑तिष्कुत॒ इन्द्रो॑ अ॒ङ्ग ॥४॥
ya eka॒ id vi॒daya॑te॒ vasu॒ martā॑ya dā॒śuṣe॑ | īśā॑no॒ apra॑tiṣkuta॒ indro॑ a॒ṅga || ४ ||
क॒दा मर्त॑मरा॒धसं॑ प॒दा क्षुम्प॑मिव स्फुरत्। क॒दा नः॑ शुश्रव॒द् गिर॒ इन्द्रो॑ अ॒ङ्ग ॥५॥
ka॒dā marta॑marā॒dhasaṃ॑ pa॒dā kṣumpa॑miva sphurat | ka॒dā naḥ॑ śuśrava॒d gira॒ indro॑ a॒ṅga || ५ ||
यश्चि॒द्धि त्वा॑ ब॒हुभ्य॒ आ सु॒तावां॑ आ॒विवा॑सति । उ॒ग्रं तत् प॑त्यते॒ शव॒ इन्द्रो॑ अ॒ङ्ग ॥६॥
yaści॒ddhi tvā॑ ba॒hubhya॒ ā su॒tāvāṃ॑ ā॒vivā॑sati | u॒graṃ tat pa॑tyate॒ śava॒ indro॑ a॒ṅga || ६ ||
य इ॑न्द्र सोम॒पात॑मो॒ मदः॑ शविष्ठ॒ चेत॑ति । येना॒ हंसि॒ न्य॑१त्त्रिणं॒ तमी॑महे ॥७॥
ya i॑ndra soma॒pāta॑mo॒ madaḥ॑ śaviṣṭha॒ ceta॑ti | yenā॒ haṃsi॒ nya॑१ttriṇaṃ॒ tamī॑mahe || ७ ||
येना॒ दश॑ग्व॒मध्रि॑गुं वे॒पय॑न्तं॒ स्वर्णरम्। येना॑ समु॒द्रमावि॑था॒ तमी॑महे ॥८॥
yenā॒ daśa॑gva॒madhri॑guṃ ve॒paya॑ntaṃ॒ svarṇaram | yenā॑ samu॒dramāvi॑thā॒ tamī॑mahe || ८ ||
येन॒ सिन्धुं॑ म॒हीर॒पो रथां॑ इव प्रचो॒दयः॑ । पन्था॑मृ॒तस्य॒ यात॑वे॒ तमी॑महे ॥९॥
yena॒ sindhuṃ॑ ma॒hīra॒po rathāṃ॑ iva praco॒dayaḥ॑ | panthā॑mṛ॒tasya॒ yāta॑ve॒ tamī॑mahe || ९ ||