EeseDharmaSanātana Library
62काण्ड 20 · सूक्त 62
Atharvaveda Śaunaka Kand 20, Sukta 62.
10 shlokव॒यमु॒ त्वाम॑पूर्व्य स्थू॒रं न कच्चि॒द् भर॑न्तोऽव॒स्यवः॑ । वाजे॑ चि॒त्रं ह॑वामहे ॥१॥
va॒yamu॒ tvāma॑pūrvya sthū॒raṃ na kacci॒d bhara॑nto’va॒syavaḥ॑ | vāje॑ ci॒traṃ ha॑vāmahe || १ ||
उप॑ त्वा॒ कर्म॑न्नू॒तये॑ स नो॒ युवो॒ग्रश्च॑क्राम॒ यो धृ॒षत्।
त्वामिद्ध्य॑वि॒तारं॑ ववृ॒महे॒ सखा॑य इन्द्र सान॒सिम् ॥२॥
upa॑ tvā॒ karma॑nnū॒taye॑ sa no॒ yuvo॒graśca॑krāma॒ yo dhṛ॒ṣat | tvāmiddhya॑vi॒tāraṃ॑ vavṛ॒mahe॒ sakhā॑ya indra sāna॒sim || २ ||
यो न॑ इ॒दमि॑दं पु॒रा प्र वस्य॑ आनि॒नाय॒ तमु॑ व स्तुषे । सखा॑य॒ इन्द्र॑मू॒तये॑ ॥३॥
yo na॑ i॒dami॑daṃ pu॒rā pra vasya॑ āni॒nāya॒ tamu॑ va stuṣe | sakhā॑ya॒ indra॑mū॒taye॑ || ३ ||
हर्य॑श्वं॒ सत्प॑तिं चर्षणी॒सहं॒ स हि ष्मा॒ यो अम॑न्दत ।
आ तु नः॒ स व॑यति॒ गव्य॒मश्व्यं॑ स्तो॒तृभ्यो॑ म॒घवा॑ श॒तम् ॥४॥
harya॑śvaṃ॒ satpa॑tiṃ carṣaṇī॒sahaṃ॒ sa hi ṣmā॒ yo ama॑ndata | ā tu naḥ॒ sa va॑yati॒ gavya॒maśvyaṃ॑ sto॒tṛbhyo॑ ma॒ghavā॑ śa॒tam || ४ ||
इन्द्रा॑य॒ साम॑ गायत॒ विप्रा॑य बृह॒ते बृ॒हत्। ध॒र्म॒कृते॑ विप॒श्चिते॑ पन॒स्यवे॑ ॥५॥
indrā॑ya॒ sāma॑ gāyata॒ viprā॑ya bṛha॒te bṛ॒hat | dha॒rma॒kṛte॑ vipa॒ścite॑ pana॒syave॑ || ५ ||
त्वमि॑न्द्राभि॒भूर॑सि॒ त्वं सूर्य॑मरोचयः । वि॒श्वक॑र्मा वि॒श्वदे॑वो म॒हाँ अ॑सि ॥६॥
tvami॑ndrābhi॒bhūra॑si॒ tvaṃ sūrya॑marocayaḥ | vi॒śvaka॑rmā vi॒śvade॑vo ma॒hām̐ a॑si || ६ ||
वि॒भ्राजं॒ ज्योति॑षा॒ स्व॑१रग॑च्छो रोच॒नं दि॒वः । दे॒वास्त॑ इन्द्र स॒ख्याय॑ येमिरे ॥७॥
vi॒bhrājaṃ॒ jyoti॑ṣā॒ sva॑१raga॑ccho roca॒naṃ di॒vaḥ | de॒vāsta॑ indra sa॒khyāya॑ yemire || ७ ||
तम्व॒भि प्र गा॑यत पुरुहू॒तं पु॑रुष्टु॒तम्। इन्द्रं॑ गी॒र्भिस्त॑वि॒षमा वि॑वासत ॥८॥
tamva॒bhi pra gā॑yata puruhū॒taṃ pu॑ruṣṭu॒tam | indraṃ॑ gī॒rbhista॑vi॒ṣamā vi॑vāsata || ८ ||
यस्य॑ द्वि॒बर्ह॑सो बृ॒हत् सहो॑ दा॒धार॒ रोद॑सी । गि॒रींरज्रां॑ अ॒पः स्वऽर्वृषत्व॒ना ॥९॥
yasya॑ dvi॒barha॑so bṛ॒hat saho॑ dā॒dhāra॒ roda॑sī | gi॒rīṃrajrāṃ॑ a॒paḥ sva’rvṛṣatva॒nā || ९ ||
स रा॑जसि पुरुष्टुतं॒ एको॑ वृ॒त्राणि॑ जिघ्नसे । इन्द्र॒ जैत्रा॑ श्रव॒स्याऽ च॒ यन्त॑वे ॥१०॥
sa rā॑jasi puruṣṭutaṃ॒ eko॑ vṛ॒trāṇi॑ jighnase | indra॒ jaitrā॑ śrava॒syā’ ca॒ yanta॑ve || १० ||