EeseDharmaSanātana Library
60काण्ड 20 · सूक्त 60
Atharvaveda Śaunaka Kand 20, Sukta 60.
6 shlokए॒वा ह्यसि॑ वीर॒युरे॒वा शूर॑ उ॒त स्थि॒रः । ए॒वा ते॒ राध्यं॒ मनः॑ ॥१॥
e॒vā hyasi॑ vīra॒yure॒vā śūra॑ u॒ta sthi॒raḥ | e॒vā te॒ rādhyaṃ॒ manaḥ॑ || १ ||
ए॒वा रा॒तिस्तु॑वीमघ॒ विश्वे॑भिर्धायि धा॒तृभिः॑ । अघा॑ चिदिन्द्र मे॒ सचा॑ ॥२॥
e॒vā rā॒tistu॑vīmagha॒ viśve॑bhirdhāyi dhā॒tṛbhiḥ॑ | aghā॑ cidindra me॒ sacā॑ || २ ||
मो षु ब्र॒ह्मेव॑ तन्द्र॒युर्भुवो॑ वाजानां पते । मत्स्वा॑ सु॒तस्य॑ गोम॑तः ॥३॥
mo ṣu bra॒hmeva॑ tandra॒yurbhuvo॑ vājānāṃ pate | matsvā॑ su॒tasya॑ goma॑taḥ || ३ ||
ए॒वा ह्य॑स्य सू॒नृता॑ विर॒प्शी गोम॑ती म॒ही। प॒क्वा शाखा॒ न दा॒शुषे॑ ॥४॥
e॒vā hya॑sya sū॒nṛtā॑ vira॒pśī goma॑tī ma॒hī | pa॒kvā śākhā॒ na dā॒śuṣe॑ || ४ ||
ए॒वा हि ते॑ विभू॑तय ऊ॒तय॑ इन्द्र॒ माव॑ते । स॒द्यश्चि॒त् सन्ति॑ दा॒शुषे॑ ॥५॥
e॒vā hi te॑ vibhū॑taya ū॒taya॑ indra॒ māva॑te | sa॒dyaści॒t santi॑ dā॒śuṣe॑ || ५ ||
ए॒वा ह्य॑स्य॒ काम्या॒ स्तोम॑ उ॒क्थं च॒ शंस्या॑ । इन्द्रा॑य॒ सोम॑पीतये ॥६॥
e॒vā hya॑sya॒ kāmyā॒ stoma॑ u॒kthaṃ ca॒ śaṃsyā॑ | indrā॑ya॒ soma॑pītaye || ६ ||