EeseDharmaSanātana Library
49काण्ड 20 · सूक्त 49
Atharvaveda Śaunaka Kand 20, Sukta 49.
7 shlokयच्छ॒क्रा वाच॒मारु॑हन्न॒न्तरि॑क्षं सिषासथः । सं दे॒वा अ॑मद॒न् वृषा॑ ॥१॥
yaccha॒krā vāca॒māru॑hanna॒ntari॑kṣaṃ siṣāsathaḥ | saṃ de॒vā a॑mada॒n vṛṣā॑ || १ ||
श॒क्रो वाच॒मधृ॑ष्टा॒योरु॑वाचो॒ अधृ॑ष्णुहि । मं॑हिष्ठ॒ आ म॑द॒र्दिवि॑ ॥२॥
śa॒kro vāca॒madhṛ॑ṣṭā॒yoru॑vāco॒ adhṛ॑ṣṇuhi | maṃ॑hiṣṭha॒ ā ma॑da॒rdivi॑ || २ ||
श॒क्रो वाच॒मधृ॑ष्णुहि॒ धाम॑धर्म॒न् विरा॑जति । विम॑दन् ब॒र्हिरा॒सर॑न् ॥३॥
śa॒kro vāca॒madhṛ॑ṣṇuhi॒ dhāma॑dharma॒n virā॑jati | vima॑dan ba॒rhirā॒sara॑n || ३ ||
तं वो॑ द॒स्ममृ॑ती॒षहं॒ वसो॑र्मन्दा॒नमन्ध॑सः ।
अ॒भि व॒त्सं न स्वस॑रेषु धे॒नव॒ इन्द्रं॑ गी॒र्भिर्न॑वामहे ॥४॥
taṃ vo॑ da॒smamṛ॑tī॒ṣahaṃ॒ vaso॑rmandā॒namandha॑saḥ | a॒bhi va॒tsaṃ na svasa॑reṣu dhe॒nava॒ indraṃ॑ gī॒rbhirna॑vāmahe || ४ ||
द्यु॒क्षं सु॒दानुं॒ तवि॑षीभि॒रावृ॑तं गि॒रिं न पु॑रु॒भोज॑सम्।
क्षु॒मन्तं॒ वाजं॑ श॒तिनं॑ सह॒स्रिणं॑ म॒क्षू गोम॑न्तमीमहे ॥५॥
dyu॒kṣaṃ su॒dānuṃ॒ tavi॑ṣībhi॒rāvṛ॑taṃ gi॒riṃ na pu॑ru॒bhoja॑sam | kṣu॒mantaṃ॒ vājaṃ॑ śa॒tinaṃ॑ saha॒sriṇaṃ॑ ma॒kṣū goma॑ntamīmahe || ५ ||
तत् त्वा॑ यामि सु॒वीर्यं॒ तद् ब्रह्म॑ पू॒र्वचि॑त्तये ।
येना॒ यति॑भ्यो॒ भृग॑वे॒ धने॑ हि॒ते येन॒ प्रस्क॑ण्व॒मावि॑थ ॥६॥
tat tvā॑ yāmi su॒vīryaṃ॒ tad brahma॑ pū॒rvaci॑ttaye | yenā॒ yati॑bhyo॒ bhṛga॑ve॒ dhane॑ hi॒te yena॒ praska॑ṇva॒māvi॑tha || ६ ||
येना॑ समु॒द्रमसृ॑जो म॒हीर॒पस्तदि॑न्द्र॒ वृष्णि॑ ते॒ शवः॑ ।
स॒द्यः सो अ॑स्य महि॒मा न सं॒नशे॒ यं क्षो॒णीर॑नुचक्र॒दे ॥७॥
yenā॑ samu॒dramasṛ॑jo ma॒hīra॒pastadi॑ndra॒ vṛṣṇi॑ te॒ śavaḥ॑ | sa॒dyaḥ so a॑sya mahi॒mā na saṃ॒naśe॒ yaṃ kṣo॒ṇīra॑nucakra॒de || ७ ||