EeseDharmaSanātana Library
47काण्ड 20 · सूक्त 47
Atharvaveda Śaunaka Kand 20, Sukta 47.
21 shlokतमिन्द्रं॑ वाजयामसि म॒हे वृ॒त्राय॒ हन्त॑वे । स वृषा॑ वृष॒भो भु॑वत् ॥१॥
tamindraṃ॑ vājayāmasi ma॒he vṛ॒trāya॒ hanta॑ve | sa vṛṣā॑ vṛṣa॒bho bhu॑vat || १ ||
इन्द्रः॒ स दाम॑ने कृ॒त ओजि॑ष्ठः॒ स मदे॑ हि॒तः । द्यु॒म्नी श्लो॒की स सो॒म्यः ॥२॥
indraḥ॒ sa dāma॑ne kṛ॒ta oji॑ṣṭhaḥ॒ sa made॑ hi॒taḥ | dyu॒mnī ślo॒kī sa so॒myaḥ || २ ||
गि॒रा वज्रो॒ न संभृ॑तः॒ सब॑लो॒ अन॑पच्युतः । व॒व॒क्ष ऋ॒ष्वो अस्तृ॑तः ॥३॥
gi॒rā vajro॒ na saṃbhṛ॑taḥ॒ saba॑lo॒ ana॑pacyutaḥ | va॒va॒kṣa ṛ॒ṣvo astṛ॑taḥ || ३ ||
इन्द्र॒मिद् गा॒थिनो॑ बृ॒हदिन्द्र॑म॒र्केभि॑र॒र्किणः॑ । इन्द्रं॒ वाणी॑रनूषत ॥४॥
indra॒mid gā॒thino॑ bṛ॒hadindra॑ma॒rkebhi॑ra॒rkiṇaḥ॑ | indraṃ॒ vāṇī॑ranūṣata || ४ ||
इन्द्र॒ इद्धर्योः॒ सचा॒ संमि॑श्ल॒ आ व॑चो॒युजा॑ । इन्द्रो॑ व॒ज्री हि॑र॒ण्ययः॑ ॥५॥
indra॒ iddharyoḥ॒ sacā॒ saṃmi॑śla॒ ā va॑co॒yujā॑ | indro॑ va॒jrī hi॑ra॒ṇyayaḥ॑ || ५ ||
इन्द्रो॑ दी॒र्घाय॒ चक्ष॑स॒ आ सूर्यं॑ रोहयद् दि॒वि। वि गोभि॒रद्रि॑मैरयत् ॥६॥
indro॑ dī॒rghāya॒ cakṣa॑sa॒ ā sūryaṃ॑ rohayad di॒vi | vi gobhi॒radri॑mairayat || ६ ||
आ या॑हि सुषु॒मा हि त॒ इन्द्र॒ सोमं॒ पिबा॑ इ॒मम्। एदं ब॒र्हिः स॑दो॒ मम॑ ॥७॥
ā yā॑hi suṣu॒mā hi ta॒ indra॒ somaṃ॒ pibā॑ i॒mam | edaṃ ba॒rhiḥ sa॑do॒ mama॑ || ७ ||
आ त्वा॑ ब्रह्म॒युजा॑ हरी॒ वह॑तामिन्द्र के॒शिना॑ । उप॒ ब्रह्मा॑णि नः शृणु ॥८॥
ā tvā॑ brahma॒yujā॑ harī॒ vaha॑tāmindra ke॒śinā॑ | upa॒ brahmā॑ṇi naḥ śṛṇu || ८ ||
ब्र॒ह्माण॑स्त्वा व॒यं यु॒जा सो॑म॒पामि॑न्द्र सो॒मिनः॑ । सु॒ताव॑न्तो हवामहे ॥९॥
bra॒hmāṇa॑stvā va॒yaṃ yu॒jā so॑ma॒pāmi॑ndra so॒minaḥ॑ | su॒tāva॑nto havāmahe || ९ ||
यु॒ञ्जन्ति॑ ब्र॒ध्नम॑रु॒षं चर॑न्तं॒ परि॑ त॒स्थुषः॑ । रोच॑न्ते रोच॒ना दि॒वि ॥१०॥
yu॒ñjanti॑ bra॒dhnama॑ru॒ṣaṃ cara॑ntaṃ॒ pari॑ ta॒sthuṣaḥ॑ | roca॑nte roca॒nā di॒vi || १० ||
यु॒ञ्जन्त्य॑स्य॒ काम्या॒ हरी॒ विप॑क्षसा॒ रथे॑ । शोणा॑ धृ॒ष्णू नृ॒वाह॑सा ॥११॥
yu॒ñjantya॑sya॒ kāmyā॒ harī॒ vipa॑kṣasā॒ rathe॑ | śoṇā॑ dhṛ॒ṣṇū nṛ॒vāha॑sā || ११ ||
के॒तुं कृ॒ण्वन्न॑के॒तवे॒ पेशो॑ मर्या अपे॒शसे॑ । समु॒षद्भि॑रजायथाः ॥१२॥
ke॒tuṃ kṛ॒ṇvanna॑ke॒tave॒ peśo॑ maryā ape॒śase॑ | samu॒ṣadbhi॑rajāyathāḥ || १२ ||
उदु॒ त्यं जा॒तवे॑दसं दे॒वं व॑हन्ति के॒तवः॑ । दृ॒शे विश्वा॑य॒ सूर्य॑म् ॥१३॥
udu॒ tyaṃ jā॒tave॑dasaṃ de॒vaṃ va॑hanti ke॒tavaḥ॑ | dṛ॒śe viśvā॑ya॒ sūrya॑m || १३ ||
अप॒ त्ये ता॒यवो॑ यथा॒ नक्ष॑त्रा यन्त्य॒क्तुभिः॑ । सूरा॑य वि॒श्वच॑क्षसे ॥१४॥
apa॒ tye tā॒yavo॑ yathā॒ nakṣa॑trā yantya॒ktubhiḥ॑ | sūrā॑ya vi॒śvaca॑kṣase || १४ ||
अदृ॑श्रन्नस्य के॒तवो॒ वि र॒श्मयो॒ जनां॒ अनु॑ । भ्राज॑न्तो अ॒ग्नयो॑ यथा ॥१५॥
adṛ॑śrannasya ke॒tavo॒ vi ra॒śmayo॒ janāṃ॒ anu॑ | bhrāja॑nto a॒gnayo॑ yathā || १५ ||
त॒रणि॑र्वि॒श्वद॑र्शतो ज्योति॒ष्कृद॑सि सूर्य । विश्व॒मा भा॑सि रोचन ॥१६॥
ta॒raṇi॑rvi॒śvada॑rśato jyoti॒ṣkṛda॑si sūrya | viśva॒mā bhā॑si rocana || १६ ||
प्र॒त्यङ् दे॒वानां॒ विशः॑ प्र॒त्यङ्ङुदे॑षि॒ मानु॑षीः । प्र॒त्यङ् विश्वं॒ स्वर्दृ॒शे ॥१७॥
pra॒tyaṅ de॒vānāṃ॒ viśaḥ॑ pra॒tyaṅṅude॑ṣi॒ mānu॑ṣīḥ | pra॒tyaṅ viśvaṃ॒ svardṛ॒śe || १७ ||
येना॑ पावक॒ चक्ष॑सा भुर॒ण्यन्तं॒ जनां॒ अनु॑ । त्वं व॑रुण॒ पश्य॑सि ॥१८॥
yenā॑ pāvaka॒ cakṣa॑sā bhura॒ṇyantaṃ॒ janāṃ॒ anu॑ | tvaṃ va॑ruṇa॒ paśya॑si || १८ ||
वि द्यामे॑षि॒ रज॑स्पृ॒थ्वह॒र्मिमा॑नो अ॒क्तुभिः॑ । पश्यं॒ जन्मा॑नि सूर्य ॥१९॥
vi dyāme॑ṣi॒ raja॑spṛ॒thvaha॒rmimā॑no a॒ktubhiḥ॑ | paśyaṃ॒ janmā॑ni sūrya || १९ ||
स॒प्त त्वा॑ ह॒रितो॒ रथे॒ वह॑न्ति देव सूर्य । शो॒चिष्के॑शं विचक्ष॒णम् ॥२०॥
sa॒pta tvā॑ ha॒rito॒ rathe॒ vaha॑nti deva sūrya | śo॒ciṣke॑śaṃ vicakṣa॒ṇam || २० ||
अयु॑क्त स॒प्त शु॒न्ध्युवः॒ सूरो॒ रथ॑स्य न॒प्त्यः । ताभि॑र्याति॒ स्वयु॑क्तिभिः ॥२१॥
ayu॑kta sa॒pta śu॒ndhyuvaḥ॒ sūro॒ ratha॑sya na॒ptyaḥ | tābhi॑ryāti॒ svayu॑ktibhiḥ || २१ ||