EeseDharmaSanātana Library
39काण्ड 20 · सूक्त 39
Atharvaveda Śaunaka Kand 20, Sukta 39.
5 shlokइन्द्रं॑ वो वि॒श्वत॒स्परि॒ हवा॑महे॒ जने॑भ्यः । अ॒स्माक॑मस्तु॒ केव॑लः ॥१॥
indraṃ॑ vo vi॒śvata॒spari॒ havā॑mahe॒ jane॑bhyaḥ | a॒smāka॑mastu॒ keva॑laḥ || १ ||
व्य॑१न्तरि॑क्षमतिर॒न्मदे॒ सोम॑स्य रोच॒ना। इन्द्रो॒ यदभि॑नद् व॒लम् ॥२॥
vya॑१ntari॑kṣamatira॒nmade॒ soma॑sya roca॒nā | indro॒ yadabhi॑nad va॒lam || २ ||
उद् गा आ॑ज॒दङ्गि॑रोभ्य आ॒विष्कृ॒ण्वन् गुहा॑ स॒तीः । अ॒र्वाञ्चं॑ नुनुदे व॒लम् ॥३॥
ud gā ā॑ja॒daṅgi॑robhya ā॒viṣkṛ॒ṇvan guhā॑ sa॒tīḥ | a॒rvāñcaṃ॑ nunude va॒lam || ३ ||
इन्द्रे॑ण रोच॒ना दि॒वो दृ॒ल्हानि॑ दृंहि॒तानि॑ च । स्थि॒राणि॒ न प॑रा॒णुदे॑ ॥४॥
indre॑ṇa roca॒nā di॒vo dṛ॒lhāni॑ dṛṃhi॒tāni॑ ca | sthi॒rāṇi॒ na pa॑rā॒ṇude॑ || ४ ||
अ॒पामू॒र्मिर्मद॑न्निव॒ स्तोम॑ इन्द्राजिरायते । वि ते॒ मदा॑ अराजिषुः ॥५॥
a॒pāmū॒rmirmada॑nniva॒ stoma॑ indrājirāyate | vi te॒ madā॑ arājiṣuḥ || ५ ||