EeseDharmaSanātana Library
34काण्ड 20 · सूक्त 34
Atharvaveda Śaunaka Kand 20, Sukta 34.
18 shlokयो जा॒त ए॒व प्र॑थ॒मो मन॑स्वान् दे॒वो दे॒वान् क्रतु॑ना प॒र्यभू॑षत्।
यस्य॒ शुष्मा॒द् रोद॑सी॒ अभ्य॑सेतां नृ॒म्णस्य॑ म॒ह्ना स ज॑नास॒ इन्द्रः॑ ॥१॥
yo jā॒ta e॒va pra॑tha॒mo mana॑svān de॒vo de॒vān kratu॑nā pa॒ryabhū॑ṣat | yasya॒ śuṣmā॒d roda॑sī॒ abhya॑setāṃ nṛ॒mṇasya॑ ma॒hnā sa ja॑nāsa॒ indraḥ॑ || १ ||
यः पृ॑थि॒वीं व्यथ॑माना॒मदृं॑ह॒द् यः पर्व॑ता॒न् प्रकु॑पिताँ॒ अर॑म्णात्।
यो अ॒न्तरि॑क्षं विम॒मे वरी॑यो॒ यो द्यामस्त॑भ्ना॒त् स ज॑नास॒ इन्द्रः॑ ॥२॥
yaḥ pṛ॑thi॒vīṃ vyatha॑mānā॒madṛṃ॑ha॒d yaḥ parva॑tā॒n praku॑pitām॒̐ ara॑mṇāt | yo a॒ntari॑kṣaṃ vima॒me varī॑yo॒ yo dyāmasta॑bhnā॒t sa ja॑nāsa॒ indraḥ॑ || २ ||
यो ह॒त्वा हि॒मरि॑णात् स॒प्त सिन्धू॒न् यो गा उ॒दाज॑दप॒धा व॒लस्य॑ ।
यो अश्म॑नोर॒न्तर॒ग्निं ज॒जान॑ सं॒वृक् स॒मत्सु॒ स ज॑नास॒ इन्द्रः॑ ॥३॥
yo ha॒tvā hi॒mari॑ṇāt sa॒pta sindhū॒n yo gā u॒dāja॑dapa॒dhā va॒lasya॑ | yo aśma॑nora॒ntara॒gniṃ ja॒jāna॑ saṃ॒vṛk sa॒matsu॒ sa ja॑nāsa॒ indraḥ॑ || ३ ||
येने॒मा विश्वा॒ च्यव॑ना कृ॒तानि॒ यो दासं वर्ण॒मध॑रं॒ गुहाकः॑ ।
श्व॒घ्नीव॒ यो जि॑गी॒वां ल॒क्षमाद॑द॒र्यः पु॒ष्टानि॒ स ज॑नास॒ इन्द्रः॑ ॥४॥
yene॒mā viśvā॒ cyava॑nā kṛ॒tāni॒ yo dāsaṃ varṇa॒madha॑raṃ॒ guhākaḥ॑ | śva॒ghnīva॒ yo ji॑gī॒vāṃ la॒kṣamāda॑da॒ryaḥ pu॒ṣṭāni॒ sa ja॑nāsa॒ indraḥ॑ || ४ ||
यं स्मा॑ पृ॒च्छन्ति॒ कुह॒ सेति॒ घो॒रमु॒तेमा॑हु॒र्नैषो अ॒स्तीत्ये॑नम्।
सो अ॒र्यः पु॒ष्टीर्विज॑ इ॒वा मि॑नाति॒ श्रद॑स्मै धत्त॒ स ज॑नास॒ इन्द्रः॑ ॥५॥
yaṃ smā॑ pṛ॒cchanti॒ kuha॒ seti॒ gho॒ramu॒temā॑hu॒rnaiṣo a॒stītye॑nam | so a॒ryaḥ pu॒ṣṭīrvija॑ i॒vā mi॑nāti॒ śrada॑smai dhatta॒ sa ja॑nāsa॒ indraḥ॑ || ५ ||
यो र॒ध्रस्य॑ चोदि॒ता यः कृ॒शस्य॒ यो ब्र॒ह्मणो॒ नाध॑मानस्य की॒रेः ।
यु॒क्तग्रा॑व्णो॒ योऽवि॒ता सु॑शि॒प्रः सु॒तसो॑मस्य॒ स ज॑नास॒ इन्द्रः॑ ॥६॥
yo ra॒dhrasya॑ codi॒tā yaḥ kṛ॒śasya॒ yo bra॒hmaṇo॒ nādha॑mānasya kī॒reḥ | yu॒ktagrā॑vṇo॒ yo’vi॒tā su॑śi॒praḥ su॒taso॑masya॒ sa ja॑nāsa॒ indraḥ॑ || ६ ||
यस्याश्वा॑सः प्र॒दिशि॒ यस्य॒ गावो॒ यस्य॒ ग्रामा॒ यस्य॒ विश्वे॒ रथा॑सः ।
यः सूर्यं॒ य उ॒षसं॑ ज॒जान॒ यो अ॒पां ने॒ता स ज॑नास॒ इन्द्रः॑ ॥७॥
yasyāśvā॑saḥ pra॒diśi॒ yasya॒ gāvo॒ yasya॒ grāmā॒ yasya॒ viśve॒ rathā॑saḥ | yaḥ sūryaṃ॒ ya u॒ṣasaṃ॑ ja॒jāna॒ yo a॒pāṃ ne॒tā sa ja॑nāsa॒ indraḥ॑ || ७ ||
यं क्रन्द॑सी संय॒ती वि॒ह्वये॑ते॒ परेऽव॑रे उ॒भया॑ अ॒मित्राः॑ ।
स॒मा॒नं चि॒द् रथ॑मातस्थि॒वांसा॒ नाना॑ हवेते॒ स ज॑नास॒ इन्द्रः॑ ॥८॥
yaṃ kranda॑sī saṃya॒tī vi॒hvaye॑te॒ pare’va॑re u॒bhayā॑ a॒mitrāḥ॑ | sa॒mā॒naṃ ci॒d ratha॑mātasthi॒vāṃsā॒ nānā॑ havete॒ sa ja॑nāsa॒ indraḥ॑ || ८ ||
यस्मा॒न्न ऋ॒ते वि॒जय॑न्ते॒ जना॑सो॒ यं युध्य॑माना॒ अव॑से॒ हव॑न्ते ।
यो विश्व॑स्य प्रति॒मानं॑ ब॒भूव॒ यो अ॑च्युत॒च्युत् स ज॑नास॒ इन्द्रः॑ ॥९॥
yasmā॒nna ṛ॒te vi॒jaya॑nte॒ janā॑so॒ yaṃ yudhya॑mānā॒ ava॑se॒ hava॑nte | yo viśva॑sya prati॒mānaṃ॑ ba॒bhūva॒ yo a॑cyuta॒cyut sa ja॑nāsa॒ indraḥ॑ || ९ ||
यः शश्व॑तो॒ मह्येनो॒ दधा॑ना॒नम॑न्यमानां॒छर्वा॑ ज॒घान॑ ।
यः शर्ध॑ते॒ नानु॒ददा॑ति शृ॒ध्यां यो दस्यो॑र्ह॒न्ता स ज॑नास॒ इन्द्रः॑ ॥१०॥
yaḥ śaśva॑to॒ mahyeno॒ dadhā॑nā॒nama॑nyamānāṃ॒charvā॑ ja॒ghāna॑ | yaḥ śardha॑te॒ nānu॒dadā॑ti śṛ॒dhyāṃ yo dasyo॑rha॒ntā sa ja॑nāsa॒ indraḥ॑ || १० ||
यः शम्ब॑रं॒ पर्व॑तेषु क्षि॒यन्तं॑ चत्वारिं॒श्यां श॒रद्य॒न्ववि॑न्दत्।
ओ॒जा॒यमा॑नं॒ यो अहिं॑ ज॒घान॒ दानुं॒ शया॑नं॒ स ज॑नास॒ इन्द्रः॑ ॥११॥
yaḥ śamba॑raṃ॒ parva॑teṣu kṣi॒yantaṃ॑ catvāriṃ॒śyāṃ śa॒radya॒nvavi॑ndat | o॒jā॒yamā॑naṃ॒ yo ahiṃ॑ ja॒ghāna॒ dānuṃ॒ śayā॑naṃ॒ sa ja॑nāsa॒ indraḥ॑ || ११ ||
यः शम्ब॑रं प॒र्यत॑र॒त् कसी॑भि॒र्योऽचा॑रुका॒स्नापि॑बत् सु॒तस्य॑ ।
अ॒न्तर्गि॒रौ यज॑मानं ब॒हुं जनं॒ यस्मि॒न्नामू॑र्छ॒त् स ज॑नास॒ इन्द्रः॑ ॥१२॥
yaḥ śamba॑raṃ pa॒ryata॑ra॒t kasī॑bhi॒ryo’cā॑rukā॒snāpi॑bat su॒tasya॑ | a॒ntargi॒rau yaja॑mānaṃ ba॒huṃ janaṃ॒ yasmi॒nnāmū॑rcha॒t sa ja॑nāsa॒ indraḥ॑ || १२ ||
यः स॒प्तर॑श्मिर्वृष॒भस्तुवि॑ष्मान॒वासृ॑ज॒त् सर्त॑वे स॒प्त सिन्धू॑न्।
यो रौ॑हि॒णमस्फु॑र॒द् वज्र॑बाहु॒र्द्यामा॒रोह॑न्तं॒ स ज॑नास॒ इन्द्रः॑ ॥१३॥
yaḥ sa॒ptara॑śmirvṛṣa॒bhastuvi॑ṣmāna॒vāsṛ॑ja॒t sarta॑ve sa॒pta sindhū॑n | yo rau॑hi॒ṇamasphu॑ra॒d vajra॑bāhu॒rdyāmā॒roha॑ntaṃ॒ sa ja॑nāsa॒ indraḥ॑ || १३ ||
द्यावा॑ चिदस्मै पृथि॒वी न॑मेते॒ शुष्मा॑च्चिदस्य॒ पर्व॑ता भयन्ते ।
यः सो॑म॒पा नि॑चि॒तो वज्र॑बाहु॒र्यो वज्र॑हस्तः॒ स ज॑नास॒ इन्द्रः॑ ॥१४॥
dyāvā॑ cidasmai pṛthi॒vī na॑mete॒ śuṣmā॑ccidasya॒ parva॑tā bhayante | yaḥ so॑ma॒pā ni॑ci॒to vajra॑bāhu॒ryo vajra॑hastaḥ॒ sa ja॑nāsa॒ indraḥ॑ || १४ ||
यः सु॒न्वन्त॒मव॑ति॒ यः पच॑न्तं॒ यः शंस॑न्तं॒ यः श॑शमा॒नमू॒ती।
यस्य॒ ब्रह्म॒ वर्ध॑नं॒ यस्य॒ सोमो॒ यस्ये॒दं राधः॒ स ज॑नास॒ इन्द्रः॑ ॥१५॥
yaḥ su॒nvanta॒mava॑ti॒ yaḥ paca॑ntaṃ॒ yaḥ śaṃsa॑ntaṃ॒ yaḥ śa॑śamā॒namū॒tī | yasya॒ brahma॒ vardha॑naṃ॒ yasya॒ somo॒ yasye॒daṃ rādhaḥ॒ sa ja॑nāsa॒ indraḥ॑ || १५ ||
जा॒तो व्यख्यत् पि॒त्रोरु॒पस्थे॒ भुवो॒ न वे॑द जनि॒तुः पर॑स्य ।
स्त॒वि॒ष्यमा॑णो॒ नो यो अ॒स्मद् व्र॒ता दे॒वानां॒ स ज॑नास॒ इन्द्रः॑ ॥१६॥
jā॒to vyakhyat pi॒troru॒pasthe॒ bhuvo॒ na ve॑da jani॒tuḥ para॑sya | sta॒vi॒ṣyamā॑ṇo॒ no yo a॒smad vra॒tā de॒vānāṃ॒ sa ja॑nāsa॒ indraḥ॑ || १६ ||
यः सोम॑कामो॒ हर्य॑श्वः सू॒रिर्यस्मा॒द् रेज॑न्ते॒ भुव॑नानि॒ विश्वा॑ ।
यो ज॒घान॒ शम्ब॑रं॒ यश्च॒ शुष्णं॒ य ए॑कवी॒रः स ज॑नास॒ इन्द्रः॑ ॥१७॥
yaḥ soma॑kāmo॒ harya॑śvaḥ sū॒riryasmā॒d reja॑nte॒ bhuva॑nāni॒ viśvā॑ | yo ja॒ghāna॒ śamba॑raṃ॒ yaśca॒ śuṣṇaṃ॒ ya e॑kavī॒raḥ sa ja॑nāsa॒ indraḥ॑ || १७ ||
यः सु॑न्व॒ते पच॑ते दु॒ध्र आ चि॒द् वाजं॒ दर्द॑र्षि॒ स किला॑सि स॒त्यः ।
व॒यं त॑ इन्द्र वि॒श्वह॑ प्रि॒यासः॑ सु॒वीरा॑सो वि॒दथ॒मा व॑देम ॥१८॥
yaḥ su॑nva॒te paca॑te du॒dhra ā ci॒d vājaṃ॒ darda॑rṣi॒ sa kilā॑si sa॒tyaḥ | va॒yaṃ ta॑ indra vi॒śvaha॑ pri॒yāsaḥ॑ su॒vīrā॑so vi॒datha॒mā va॑dema || १८ ||