EeseDharmaSanātana Library
26काण्ड 20 · सूक्त 26
Atharvaveda Śaunaka Kand 20, Sukta 26.
6 shlokयोगे॑योगे त॒वस्त॑रं॒ वाजे॑वाजे हवामहे । सखा॑य॒ इन्द्र॑मू॒तये॑ ॥१॥
yoge॑yoge ta॒vasta॑raṃ॒ vāje॑vāje havāmahe | sakhā॑ya॒ indra॑mū॒taye॑ || १ ||
आ घा॑ गम॒द् यदि॒ श्रव॑त् सह॒स्रिणी॑भिरू॒तिभिः॑ । वाजे॑भि॒रुप॑ नो॒ हव॑म् ॥२॥
ā ghā॑ gama॒d yadi॒ śrava॑t saha॒sriṇī॑bhirū॒tibhiḥ॑ | vāje॑bhi॒rupa॑ no॒ hava॑m || २ ||
अनु॑ प्र॒त्नस्यौक॑सो हु॒वे तु॑विप्र॒तिं नर॑म्। यं ते॒ पूर्वं॑ पि॒ता हु॒वे ॥३॥
anu॑ pra॒tnasyauka॑so hu॒ve tu॑vipra॒tiṃ nara॑m | yaṃ te॒ pūrvaṃ॑ pi॒tā hu॒ve || ३ ||
यु॒ञ्जन्ति॑ ब्र॒ध्नम॑रु॒षं चर॑न्तं॒ परि॑ त॒स्थुषः॑ । रोच॑न्ते रोच॒ना दि॒वि ॥४॥
yu॒ñjanti॑ bra॒dhnama॑ru॒ṣaṃ cara॑ntaṃ॒ pari॑ ta॒sthuṣaḥ॑ | roca॑nte roca॒nā di॒vi || ४ ||
यु॒ञ्जन्त्य॑स्य॒ काम्या॒ हरी॒ विप॑क्षसा॒ रथे॑ । शोणा॑ धृ॒ष्णू नृ॒वाह॑सा ॥५॥
yu॒ñjantya॑sya॒ kāmyā॒ harī॒ vipa॑kṣasā॒ rathe॑ | śoṇā॑ dhṛ॒ṣṇū nṛ॒vāha॑sā || ५ ||
के॒तुं कृ॒ण्वन्न॑के॒तवे॒ पेशो॑ मर्या अपे॒शसे॑ । समु॒षद्भि॑रजायथाः ॥६॥
ke॒tuṃ kṛ॒ṇvanna॑ke॒tave॒ peśo॑ maryā ape॒śase॑ | samu॒ṣadbhi॑rajāyathāḥ || ६ ||